18th Oct2017

ພິທີ ຈູດທຳລາຍ ຢາເສບຕິດ ເນື່ອງໃນ ໂອກາດ ວັນແຫ່ງຊາດ ຕ້ານຢາເສບຕິດ ຄົບຮອບ 16 ປີ

by somchan

​ເນື່ອງ​ໃນ​ໂອກາດ​ສະ​ເຫຼີ​ມສະຫຼອງ ວັນ​ແຫ່ງ​ຊາດ ຕ້ານ​ຢາ​ເສບ​ຕິດ ຄົບຮອບ 16 ປີ ຫ້ອງ​ການກວດກາ ​ແລະ ຄວບ​ຄຸມ​ຢາ​ເສບ​ຕິດ ກົມ​ໃຫ່ຍຕຳຫຼວດ ກະຊວງ​ປ້ອງ​ກັນ​ຄວາມ​ສະຫງົບ ​ໄດ້​ຈັດ​ພິທີ​ຈູດ​ທຳລາຍ​ຢາ​ເສບ​ຕິດ ​ໃນ​ວັນ​ທີ 17 ຕຸລາ 2017 ນີ້ ທີ່​ຫາດ​ດອນ​ຈັນ ​ເປັນ​ກຽດ​ເຂົ້າ​ຮ່ວມ​ຂອງ​ທ່ານ ປອ ບຸນ​ທອງ ຈິດ​ມະນີ ຮອງ​ນາຍ​ຍົກ​ລັດຖະມົນຕີ ປະທານ​ອົງການ​ກວດກາ​ລັດຖະບານ ​ແລະ ຫົວໜ້າ​ອົງການ​ຕ້ານ​ການ​ສໍ້​ລາດ​ບັງ​ຫຼວງ​ຂັ້ນ​ສູນ​ກາງ, ມີ​ບັນດາ​ແຂກ​ຖືກ​ເຊີນ, ຄະນະ​ລັດຖະມົນຕີ, ບັນດາ​ທູຕານຸທູດ, ອົງການ​ຈັດ​ຕັ້ງ​ສາກົນ ​ແລະ ພາກສ່ວນ​ທີ່​ກ່ຽວຂ້ອງ​ເຂົ້າ​ຮ່ວມ.

ພົຕ ສົມ​ແກ້ວ ສີ​ລາ​ວົງ ລັດຖະມົນຕີ​ກະຊວງ​ປ້ອງ​ກັນ​ຄວາມ​ສະຫງົບ ​ໄດ້​ລາຍ​ງານ​ກ່ຽວ​ກັບ​ສະພາບ​ການຈັດ​ຕັ້ງ​ປະຕິບັດ​ວຽກ​ງານ​ກວດກາ ​ແລະ ຄວບ​ຄຸມ​ຢາ​ເສບ​ຕິດ ​ໃນ​ໄລຍະ 1 ປີ ຜ່ານ​ມາ ​ເຊິ່ງ​ໃນ​ໄລຍະ​ຜ່ານ​ມາຄະ​ນະ​ພັກ-​ຄະນະນຳກະຊວງ ປກສ ​ໄດ້​ຖື​ເອົາ​ວຽກ​ງານ​ສະກັດ​ກັ້ນ ​ແລະ ຕ້ານ​ຢາ​ເສບ​ຕິດ ​ເປັນ​ວຽກ​ງານ​ທີ່​ສຳຄັນ ​ໂດຍ​ໄດ້​ສຸມ​ໃສ່​ວຽກ​ງານ​ໂຄສະນາ​ເຜີຍ​ແຜ່ ​ແລະ ສຶກສາ​ອົບຮົມ​ດ້ວຍ​ຫຼາຍ​ຮູບ​ການ ​ເພື່ອ​ປູກ​ຈິດ​ສຳນຶກ​ໃຫ້​ຄົນ​ໃນ​ສັງຄົມ​ໄດ້​ຮັບ​ຮູ້ ​ແລະ ​ເຂົ້າ​ໃຈ​ກົດໝາຍ ​ແລະ ​ເຫັນ​ໄດ້​ເຖິງຜົນ​ຮ້າຍຂອງ​ຢາ​ເສບ​ຕິດ ປຸກລະດົມ​ໃຫ້​ປະຊາຊົນ​ບັນດາ​ເຜົ່າ ​ເຂົ້າ​ຮ່ວມ​ໃນ​ຂະ​ບວນການ​ສະກັດ​ກັ້ນ ​ແລະ ​ແກ້​ໄຂ​ບັນຫາ​ຢາ​ເສບ​ຕິດ​ໄດ້​ຈຳນວນ​ຫຼາຍ.ສະ​ແດງ​ອອກ​ນັບ​ແຕ່​ເດືອນ​ມິຖຸນາ 2016 ​ເຖິງ​ເດືອນ ກັນຍາ 2017 ສາມາດ​ມ້າງ​ຄະດີ​ຢາ​ເສບ​ຕິດ​ໃນ​ທົ່ວ​ປະ​ເທດ​ໄດ້ 3.814 ລາຍ, ຈັບ​ຕົວ​ຜູ້​ກະທຳ​ຜິດ 5.811 ຄົນ, ຄົນ​ຕ່າງປະ​ເທດ 127 ຄົນ, ຢຶດຢາ​ບ້າ​ໄດ້ 2.552 ກິ​ໂລກຼາມ, ​ເຮ​ໂຮ​ອິນ 190 kg, ຄາ​ເຟອິນ 1 kg, ຝິ່ນ 224 kg, ຄັນ​ຊາ 5.047 kg, ຢາ​ໄອ 130 kg, ​ແປ້ງຝຸ່ນ​ເພື່ອ​ປະສົມ​ຜະລິດ​ຢາ​ເສບ​ຕິດ 5,916 kg, ​ແກ່ນ​ຝິ່ນ 2 kg. ນອກ​ນັ້ນ​ຍັງ​ສາມາດ​ຍຶດປືນ​ໄດ້ 88 ກະບອກ, ລູກປືນ 1,149 ລູກ, ໝາກ​ແຕກ 8 ໜ່ວຍ ​ແລະ ອຸປະກອນ​ຜະລິດ​ຢາ​ເສບ​ຕິດ​ຈຳນວນ​ໜຶ່ງ. ຢາ​ເສບ​ຕິດ​ທີ່ນຳ​ມາ​ທຳລາຍ​ໃນ​ຄັ້ງ​ນີ້​ມີ ຢາ​ບ້າ 13.430.726 ​ເມັດ ນ້ຳໜັກ 1.349 kg, ຄັນ​ຊາ 2.382 kg, ຢາ​ໄອ 93 kg, ຄາ​ເຟອິນ 4.312 kg,​ໂຮ​ເດ​ຍອອມ 259 kg ​ແລະ ອື່ນໆ.

Off

Comments are closed.