09th Oct2019

ພົບຢາໄອສ໌ 2,1 ກິໂລກຼາມ ນຳຜູ້ໂດຍສານ ທີ່ກຳລັງເດີນທາງອອກນອກປະເທດ

by somchan

ໃນວັນທີ 2 ຕຸລາ 2019 ນີ້ ເຈົ້າໜ້າທີ່ປະຈຳຢູ່ສະໜາມບິນສາກົນວັດໄຕ ໄດ້ກວດພົບເຫັນຢາເສບຕິດປະເພດ ຢາໄອສ໌ 2,1 ກິໂລກຼາມ ໃນກະເປົາເດີນທາງຂອງຜູ້ໂດຍສານ ໃນຂະນະທີ່ກຳລັງເດີນທາງອອກຕ່າງປະເທດ ຈຶ່ງໄດ້ກັກຕົວເຈົ້າຂອງກະເປົາ ແລະ ຢາເສບຕິດ ມອບໃຫ້ກົມຕຳຫຼວດສະກັດກັ້ນ ແລະ ຕ້ານຢາເສບຕິດ ດຳເນີນຄະດີຕາມກົດໝາຍ.

ກົມຕຳຫຼວດສະກັດກັ້ນ ແລະ ຕ້ານຢາເສບຕິດໃຫ້ຮູ້ວ່າ: ຜູ້ຖືກຫາຊື່ນາງ ບູແອ ຍູຊາດ ເຊຊ່າ ( Ms Bauer Usage Cesarce ) ອາຍຸ 66 ປີ ເຊື້ອຊາດ ແລະ ສັນຊາດຝຣັ່ງ, ບ່ອນຢູ່ປັດຈຸບັນ ບ້ານ ແຟັງເຟີດ ເມືອງເຣດເຊັນ ແຂວງແຟັງເຟີດ ປະເທດເຢຍລະມັນ. ເຊິ່ງຢາເສບຕິດຈຳນວນດັ່ງກ່າວຜູ້ກ່ຽວໄດ້ຊຸກເຊື່ອງຢູ່ໃນກະເປົາເດີນທາງທີ່ກຽມຈະເດີນທາງໄປປະເທດຍີ່ປຸ່ນ.

ຜ່ານການສອບສວນເບື້ອງຕົ້ນຜູ້ກ່ຽວຮັບສາລະພາບວ່າ: ຢາໄອສ໌ຈຳນວນດັ່ງກ່າວແມ່ນຂອງຜູ້ກ່ຽວແທ້ ແລະ ຈະນຳໄປປະເທດທີ່ສາມ. ຄະດີດັ່ງກ່າວຢູ່ໃນຂັ້ນຕອນການສອບສວນຂະຫຍາຍຜົນຫາກຸ່ມແກ້ງທີ່ພົວພັນກັບ ຢາເສບຕິດເພື່ອຕິດຕາມຕົວໄປດຳເນີນຄະດີຕາມກົດໝາຍ.

Comments are closed.