10th Jul2019

ມີຜູ້ຕິດເຊື້ອພະຍາດໄຂ້ຍຸ້ງລາຍ 10,000 ກໍລະນີ ແລະ ເສຍຊີວິດ 25 ຄົນ

by somchan

ດຣ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ໄດ້ກ່າວວ່າ: ປະຈຸບັນ ພະຍາດໄຂ້ຍຸ້ງລາຍໄດ້ແຜ່ລະບາດສູ່ປະຊາຊົນຈຳນວນຫຼວງຫຼາຍ ມີຜູ້ຕິດເຊື້ອພະຍາດໄຂ້ຍຸ້ງລາຍ 10,000 ກໍລະນີ ແລະ ເສຍຊີວິດ 25 ຄົນ ຕໍ່ກັບສະພາບການດັ່ງກ່າວ ກະຊວງສາທາລະນະສຸກ ໄດ້ເອົາໃຈໃສ່ ຕິດຕາມເຝົ້າລະວັງຢ່າງໃກ້ຊິດ ໂດຍໄດ້ໃຫ້ການຊີ້ນຳ ແລະ ວາງມາດຕະການຢ່າງເຂັ້ມງວດ ເຖິງບັນດາເມືອງ ແຂວງໃນຂອບເຂດທົ່ວປະເທດ ເພື່ອປ້ອງກັນ ແລະ ຕອບໂຕ້ ການລະບາດຂອງພະຍາດໄຂ້ຍຸ້ງລາຍ ບໍ່ໃຫ້ແຜ່ລາມເປັນວົງກວ້າງ ໂດຍສະເພາະ ໄດ້ອອກຄຳສັ່ງແນະນຳ ເຖິງທ່ານເຈົ້າແຂວງໃນຂອບເຂດທົ່ວປະເທດ ກ່ຽວກັບການເຝົ້າລະວັງ ແລະ ສະກັດກັ້ນພະຍາດໄຂ້ຍຸ້ງລາຍ ແລະ ໄດ້ແຈ້ງເຖິງພະແນກສາທາລະນະສຸກໃນປະເທດ ກ່ຽວກັບການເອົາໃຈໃສ່ທຳລາຍແຫຼ່ງເພາະພັນໝອນນ້ຳຍຸ້ງລາຍ ແລະ ເອົາໃຈໃສ່ຕິດຕາມປິ່ນປົວຄົນເຈັບຢ່າງໃກ້ຊິດ ເພື່ອຫຼຸດຜ່ອນອັດຕາການເຈັບ ແລະ ເສຍຊີວິດຈາກພະຍາດໄຂ້ຍຸ້ງລາຍ ໃນຂອບເຂດທົ່ວປະເທດ. ພ້ອມນີ້ ທ່ານຍັງໄດ້ຮຽກຮ້ອງໃຫ້ປະຊາຊົນທຸກຊັ້ນຄົນໃນຂອບເຂດທົ່ວປະເທດ ຈົ່ງພ້ອມກັນເປັນເຈົ້າການຕ້ານສະກັດກັ້ນ ພະຍາດໄຂ້ຍຸ້ງລາຍ ໂດຍສະເພາະໃຫ້ກວດກາອານະໄນຂອບເຂດເຮືອນຂອງຕົນເປັນປະຈຳ ເພື່ອທຳລາຍແຫຼ່ງເພາະຂອງໜອນນ້ຳ.

Comments are closed.