26th Oct2018

ມ້າງກຸ່ມແກ້ງຄ້າຂາຍຢາເສບຕິດ ພ້ອມຂອງ ກາງ 14 ພັນເມັດ

by somchan

ໃນວັນທີ 19 ຕຸລາ 2018 ເວລາປະມານ 7:30 ນາທີ ເຈົ້າໜ້າທີ່ຕຳຫຼວດສະກັດກັ້ນ ແລະ ຕ້ານຢາເສບຕິດ ແຂວງສະຫວັນນະເຂດ ໄດ້ຈັບຕົວຜູ້ກະທຳຜິດລັກລອບຄ້າຂາຍ ຢາເສບຕິດ ໄດ້ 2 ຄົນ ພ້ອມຂອງກາງ ຢາເສບຕິດ ຈຳນວນ 10,000 ເມັດ ຜູ້ຕ້ອງຫາທັງສອງ ຄື: ທ້າວ ສຸກສະເໜີ ໄຊຍະສານ (ສຸກ) ອາຍຸ 52 ປີ, ຢູ່ບ້ານ ນາພອງທ່າ ເມືອງສອງຄອນ ແລະ ນາງ ວາລຸນີ ທິນະຄອນ (ຫຍໍ້) ອາຍຸ 38 ປີ ຢູ່ບ້ານນາເລົາ ນະຄອນໄກສອນພົມວິຫານ ແຂວງສະຫວັນນະເຂດ  ເຈົ້າໜ້າທີ່ຕຳຫຼວດໄດ້ລາຍງານໃຫ້ຮູ້ວ່າ ໃນວັນທີ 19 ຕຸລາ 2018 ມີພົນລະເມືອງດີແຈ້ງວ່າຈະມີການລັກລອບຄ້າຂາຍຢາເສບຕິດ (ຢາບ້າ) ຢູ່ຕາມສາຍທາງເລກ 09 ສະຫວັນ-ເຊໂນ ຂອບເຂດບ້ານ ອຸດົມວິໄລ ນະຄອນໄກສອນພົມວິຫານ ແຂວງສະຫວັນນະເຂດ ເມື່ອໄດ້ຮັບການລາຍງານຄືດັ່ງກ່າວ ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດແຂວງ ຈຶ່ງໄດ້ຈັດຕັ້ງກຳລັງວິຊາສະເພາະລົງພິສູດແຫຼ່ງຂ່າວດັ່ງກ່າວ ເຫັນວ່າມີມູນຄວາມຈິງ ມາຮອດເວລາ ປະມານ 13:50 ນາທີ ຂອງວັນດຽວກັນຈຶ່ງ ໄດ້ພົບເຫັັນຜູ້ກະທຳຜິດດັ່ງກ່າວ ເຈົ້າໜ້າທີ່ຈຶ່ງໄດ້ຈັບຕົວພວກກ່ຽວມາດຳເນີນຄະດີ.

ຜ່ານການສືບສວນ-ສອບສວນ ພວກກ່ຽວທັງສອງໄດ້ຮັບສາລະພາບວ່າ ຢາບ້າດັ່ງກ່າວ ແມ່ນໄດ້ມາຈາກ ນາງ ວາສະລິນ ລາດສະວົງ ອາຍຸ 50 ປີ ຢູ່ບ້ານນາແກ ນະຄອນໄກສອນພົມວິຫານ ແຂວງສະຫວັນນະເຂດ ເມື່ອຮູ້ ຄືແນວນັ້ນທາງເຈົ້າໜ້າທີ່ວິຊາສະເພາະຈຶ່ງໄດ້ສົມທົບກັບພາກສ່ວນທີ່ກ່ຽວຂ້ອງລົງກວດກາ ແລະ ກັກຕົວນາງ ວາສະລິນ ລາດສະວົງ ພ້ອມຄົ້ນເຮືອຜູ້ກ່ຽວ ພົບຢາບ້າ ຈຳນວນ 2 ມັດ ເທົ່າກັບ 2000 ເມັດ (ສອງພັນເມັດ) ທີ່ຜູ້ກ່ຽວຊຸກເຊື່ອງໄວ້ໃນກະເປົາ ຂ້າງບ່ອນນອນລວມຂອງກາງຢາບ້າໄດ້ທັງໝົດຈຳນວນ 14,000 ເມັດ ລົດໃຫ່ຍ 1 ຄັນ, ລົດຈັກ 2 ຄັນ ແລະ ໂທລະສັບ 4 ໜ່ວຍ ຕໍ່ກັບຄະດີດັ່ງກ່າວ ແມ່ນຍັງຢູ່ໃນຂັ້ນຕອນສືບສວນ-ສອບສວນ ຫາຜູ້ຮ່ວມຂະບວນການມາດຳເນີນຄະດີຕາມລະບຽບກົດໝາຍຕໍ່ໄປ

Off

Comments are closed.