12th Sep2019

ລຕມ ຕ້ອນຮັບການເຂົ້າຢ້ຽມຂ່ຳນັບຂອງ ເອກອັກຄະລັດຖະທູດຝຮັ່ງຄົນໃໝ່ ປະຈຳ ສປປ ລາວ.

by somchan

ໃນວັນທີ 12 ກັນຍາ 2019 ນີ້ ພົທ ວິໄລ ຫຼ້າຄຳຟອງ ລັດຖະມົນຕີກະຊວງປ້ອງກັນຄວາມສະຫົງບ ໄດ້ຕ້ອນຮັບການເຂົ້າຢ້ຽມຂ່ຳນັບຂອງທ່ານ ນາງ ຟລໍຣັອງສ ຊັອງບລັອງ ຣິສແລກ ເອກອັກຄະລັດຖະທູດ ຝຮັ່ງ ປະຈຳ ສປປ ລາວ, ເນື່ອງໃນໂອກາດມາດຳລົງຕຳແໜ່ງເປັນເອກອັກຄະລັດຖະທູດຄົນໃໝ່ ປະຈຳ ສປປ ລາວ.

ໂອກາດນີ້ ທ່ານລັດຖະມົນຕີ ໄດ້ສະແດງຄວາມຕ້ອນຮັບຢ່າງອົບອຸ່ນ ຕໍ່ການເຂົ້າຢ້ຽມຂ່ຳນັບໃນຄັ້ງນີ້, ພ້ອມນັ້ນ ທັງສອງກໍ່ໄດ້ພົບປະປຶກສາຫາລື ແລະ ແລກປ່ຽນບົດຮຽນກັນໃນດ້ານຕ່າງໆ ໂດຍສະເພາະແມ່ນການພົວພັນຮ່ວມມືກັນລະຫ່ວາງສອງປະເທດ, ການຝຶກອົບຮົມດ້ານວຽກງານວິຊາສະເພາະໃຫ້ກຳລັງປ້ອງກັນຄວາມສະຫງົບ ແລະ ການຊ່ວຍເຫຼືອດ້ານອຸປະກອນຕ່າງໆ ໃນການຊ່ວຍເຫຼືອໄພພິບັດ, ບັນຫາສຳຄັນທີ່ທັງສອງປະເທດຈະສືບຕໍ່ພົວພັນຮ່ວມມືກັນ ເວົ້າລວມ, ເວົ້າສະເພາະແມ່ນການພົວພັນຮ່ວມມືກັບກະຊວງປ້ອງກັນຄວາມສະຫງົບ ໃນການຕ້ານບັນຫາອາດຊະຍາກຳຕ່າງໆ ເປັນຕົ້ນແມ່ນ ບັນຫາຢາເສບຕິດ, ການຄ້າມະນຸດ ແລະ ບັນຫາສື່ສັງຄົມອອນລາຍ ເພື່ອແກ້ໄຂບັນຫາດັ່ງກ່າວໃຫ້ຫຼຸດໜ້ອຍຖອຍລົງ ເພື່ອຄວາມສະຫົງບ ແລະ ຄວາມເປັນລະບຽບຮຽບຮ້ອຍຂອງສອງປະເທດ ແລະ ເພື່ອເສີມຂະຫຍາຍສາຍພົວພັນທີ່ດີຂອງສອງປະເທດໃຫ້ແໜ້ນແຟ້ນຂຶ້ນກ່ວາເກົ່າ.

ໂອກາດດຽວກັນນີ້ ພົທ ວິໄລ ຫຼ້າຄຳຟອງ ລັດຖະມົນຕີກະຊວງປ້ອງກັນຄວາມສະຫງົບ ກໍ່ໄດ້ຕ້ອນຮັບການເຂົ້າພົບປະຂອງ ທ່ານ ນິໂກລາຍ ຢູສະຕີນອບ ຜູ້ອຳນວຍການ ບໍລິສັດ ເມດູນາໂລນາຢາກິຍາ-ເຈ້ຍພິເສດ ເພື່ອຕ້ານການປອມແປງ ຈຳກັດ ສະຫະພັນຣັດເຊຍ ພ້ອມຄະນະ ໃນໂອກາດທີ່ເດີນທາງມາເຮັດວຽກຢູ່ ສປປ ລາວ ລະຫ່ວາງ ວັນທີ 11-14 ກັນຍາ 2019 ນີ້, ການເຂົ້າພົບປະຄັ້ງນີ້ ເພື່ອລາຍງານການຮ່ວມມື ແລະ ການຈັດຕັ້ງປະຕິບັດໜ້າວຽກຕ່າງໆ ທີ່ບໍລິສັດໄດ້ຮ່ວມມືກັບພາກສ່ວນທີ່ກ່ຽວຂ້ອງຂອງ ສປປ ລາວ ໃນໄລຍະຜ່ານມາ ໂດຍສະເພາະແມ່ນການຮ່ວມມືໃນການຈັດພິມໜັງສືຜ່ານແດນ ໃຫ້ແກ່ ສປປ ລາວ ພ້ອມທັງປືກສາຫາລືກ່ຽວກັບທິດທາງແຜນການ ແລະ ວິທີການຮ່ວມມືກັນໃນຕໍ່ໜ້າ.

Comments are closed.