13th Feb2019

ລມຕ ກະຊວງ ປກສ ຕ້ອນຮັບການເຂົ້າພົົບປະຢ້ຽມຢາມ

by somchan

ໃນວັນທີ 12 ກຸມພາ ນີ້ ພົທ ວິໄລ ຫຼ້າຄຳຟອງ ລັດຖະມົນຕີກະຊວງປ້ອງກັນຄວາມສະຫງົບ ໄດ້ຕ້ອນຮັບການເຂົ້າຢ້ຽມຂ່ຳນັບຂອງທ່ານ ຊິນຊຸງຊຸນ ເອກອັກຄະລັດຖະທູດ ສ ເກົາຫຼີ ປະຈຳ ສປປ ລາວ ທ່ານ ນາງ ລີນາບິດເຕີ ເອກອັກຄະລັດຖະທູດ ອາເມລິກາປະຈຳລາວ ແລະ ທ່ານ ຈ໋ອງ ເບີນາດຄາຮາສໂກ ເອກອັກຄະລັດຖະທູດ ອົດສະຕຣາລີ ປະຈຳລາວ ພ້ອມຄະນະ ເນື່ອງໃນໂອກາດທີ່ທ່ານໄດ້ຮັບໜ້າທີ່ເປັນລັດຖະມົນຕີ ກະຊວງປ້ອງກັນຄວາມສະຫງົບ.

ໂອກາດດັ່ງກ່າວ ເອກອັກຄະລັດຖະທູດ ທັງສາມປະເທດ ໄດ້ລາຍງານການພົວພັນຮ່ວມມືລະຫວ່າງສອງປະເທດເວົ້າລວມ, ເວົ້າສະເພາະກໍ່ຄືສະຖານທູດ ແລະ ກະຊວງປ້ອງກັນຄວາມສະຫງົບ ໃນຫຼາຍຂົງເຂດວຽກງານເປັນຕົ້ນແມ່ນ ການຊ່ວຍເຫຼືອທາງດ້ານ ວັດຖຸການຊ່ວຍເຫຼືອທາງດ້ານຍົກລະດັບວິຊາສະເພາະໃນກຳລັງປ້ອງກັນຄວາມສະຫງົບ ແລະ ການຮ່ວມມືກັນສະກັດກັ້ນບັນດາປະກົດການຫຍໍ້ທໍ້ຕ່າງໆ ໂດຍສະເພາະແມ່ນບັນຫາຢາເສບຕິດ ການຄ້າມະນຸດ, ອາຍະຢາກຳຂ້າມຊາດ ແລະ ບັນຫາອື່ນໆ.

ໂອກາດນີ້ ພົທ ວິໄລ ຫຼ້າຄຳຟອງ ໄດ້ສະແດງຄວາມຕ້ອນຮັບຢ່າງອົບອຸ່ນ ແລະ ຕີລາຄາສູງຕໍ່ການພົວພັນຮ່ວມມືກັນໃນໄລຍະຜ່ານມາ ແລະ ພ້ອມທີ່ຈະສືບຕໍ່ສາຍພົວພັນດັ່ງກ່າວ ເພື່ອຮ່ວມມືຊ່ວຍເຫຼືອເຊິ່ງກັນ ແລະ ກັນ ໃນການສະກັດກັ້ນບັນຫາປະກົດການຫຍໍ້ທໍ້ຕ່າງໆກໍ່ຄືການພັດທະນາກຳລັງປ້ອງກັນຄວາມສະຫງົບໃຫ້ກາຍເປັນກຳລັງທີ່ມີຄວາມກ້າວໜ້າ ແລະ ທັນສະໄໝ, ພ້ອມທັງເສີມຂະຫຍາຍຄວາມສາມັກຄີຮັກແພງກັນໃຫ້ດີຂື້ນກວ່າເກົ່າ.

Off

Comments are closed.