02nd Aug2018

ລມຕ ປກສ ຕ້ອນຮັບການຢ້ຽມຂ່ຳນັບ ຂອງເອກອັກຂະລັດສະທູດໄທ ຄົນໃໝ່

by somchan

ພົຕ ສົມແກ້ວ ສີລະວົງ ລັດຖະມົນຕີກະຊວງປ້ອງກັນຄວາມສະຫງົບ ໄດ້ຕ້ອນຮັບການເຂົ້າຢ້ຽມຂ່ຳນັບຂອງທ່ານ ກຽດຕິຄຸນ ຊາດປະເສີດ ເອກອັກຂະລັດສະທູດແຫ່ງລາດຊະອານາຈັກໄທ ໃນວັນທີ 1 ສິງຫາ 2018 ນີ້ ທີ່ກະຊວງປ້ອງກັນຄວາມສະຫງົບ ໃນໂອກາດທີ່ທ່ານມາດຳລົງຕຳແໜ່ງ ເປັນເອກອັກຂະລັດສະທູດໄທຄົນໃໝ່ປະຈຳລາວ.

ໃນໂອກາດນີ້ ທ່ານ ເອກອັກຂະລັດສະທູດຄົນໃໝ່ ໄດ້ສະແດງຄວາມຂອບໃຈຕໍ່ການຕ້ອນຮັບຢ່າງອົບອຸ່ນ ຂອງລັດຖະມົນຕີກະຊວງປ້ອງກັນຄວາມສະຫງົບ ແລະ ພ້ອມແລ້ວທີ່ຈະປະຕິ ບັດໜ້າທີ່ ໃຫ້ການຮ່ວມມືຮອບດ້ານ ໃນວຽກງານຕ່າງໆ ເປັນຕົ້ນການຊ່ວຍເຫຼືອຂອງລັດຖະບານ ກໍຄືປະຊາຊົນໄທ ໃນເຫດການໄພພິບັດນ້ຳຖ້ວມຢູ່ລາວ ແລະ ວຽກງານອື່ນໆ. ພ້ອມດຽວກັນນີ້ ທ່ານລັດຖະມົນຕີກະຊວງປ້ອງກັນຄວາມສະຫງົບ ຍັງໄດ້ສະແດງຄວາມຂອບໃຈຕໍ່ລັດຖະບານໄທ ກໍຄືປະຊາຊົນໄທທີ່ໃຫ້ການຊ່ວຍເຫຼືອຜູ້ປະສົບໄພພິບັດນ້ຳຖ້ວມໃນຄັ້ງນີ້ ພ້ອມດຽວກັນນີ້ ກະຊວງປ້ອງກັນຄວາມສະຫງົບ ຈະອຳນວຍຄວາມສະດວກໃນທຸກດ້ານຂອງການພົວພັນຮ່ວມມື ໂດຍສະເພາະວຽກງານຄວາມໜັ້ນຄົງ, ຄວາມເປັນລະບຽບຮຽບຮ້ອຍຂອງສັງຄົມ ເປັນຕົ້ນການແກ້ໄຂບັນຫາຢາເສບຕິດ.

ໂອກາດດັ່ງກ່າວ ທ່ານຍັງອວຍພອນໃຫ້ ທ່ານ ເອກອັກຂະລັດສະທູດ ແຫ່ງລາດຊະອານາຈັກໄທຄົນໃໝ່ປະຈຳລາວ ຈົ່ງປະສົບຜົນສຳເລັດໃນການປະຕິບັດໜ້າທີ່ວຽກງານ ຢູ່ ສປປ ລາວ ເພື່ອເຮັດໃຫ້ການພົວພັນຖານບ້ານໃກ້ເຮືອນຄຽງລະຫວ່າງສອງປະເທດລາວ-ໄທ ໃຫ້ມີຄວາມໜັ້ນຄົງຕະຫຼອດໄປ.

Off

Comments are closed.