12th Jul2019

ລມຕ ພົບປະຢ້ຽມຢາມ ແລະ ຊີ້ນຳວຽກງານຢູ່ກອງບັນຊາການ ປກສ ແຂວງ ຫົວພັນ

by somchan

ໃນວັນທີ 11 ກໍລະກົດ 2019 ນີ້ ພົນໂທ ວິໄລ ຫຼ້າຄຳຟອງ ລັດຖະມົນຕີ ກະຊວງປ້ອງກັນຄວາມສະຫງົບ ໄດ້ເຄື່ອນໄຫວພົບປະຢ້ຽມຢາມ ແລະ ຊີ້ນຳວຽກງານວິຊາສະເພາະ ຢູ່ກອງບັນຊາການ ປກສ ແຂວງ ຫົວພັນ ໂດຍການຕ້ອນຮັບຂອງ ພັນເອກ ແອນ ອຸ່ນອານົງນຸດ ຫົວໜ້າກອງບັນຊາການ ປກສ ແຂວງ ພ້ອມດ້ວຍຄະນະ ແລະ ພະນັກງານຫຼັກແຫຼ່ງ ກອງບັນຊາການ ປກສ ແຂວງ.

ພັນເອກ ແອນ ອຸ່ນອານົງນຸດ ໄດ້ລາຍງານກ່ຽວກັບການຊີ້ນຳ-ນຳພາ ກຳລັງ ປກສ ແຂວງ ຕະຫຼອດໄລຍະຜ່ານມາ, ຄະນະພັກ-ຄະນະບັນຊາ ໄດ້ເອົາໃຈໃສ່ເຮັດວຽກງານນຳພາດ້ານການເມືອງແນວຄິດ ໃຫ້ນາຍ ແລະ ພົນຕຳຫຼວດ ໃຫ້ມີຄວາມໜັກແໜ້ນທາງດ້ານການເມືອງແນວຄິດ ເຂັ້ມແຂງທາງດ້ານການຈັດຕັ້ງ ມີລະບຽບວິໄນເຂັ້ມງວດ ມີຄວາມຮັບຜິດຊອບຕໍ່ໜ້າທີ່ທີ່ໄດ້ຮັບມອບໝາຍ. ດ້ານວຽກງານວິຊາສະເພາະກໍ່ໄດ້ຮັບການປັບປຸງໃຫ້ເຂັ້ມແຂງ ໂດຍສຸມໃສ່ຈັດຕັ້ງປະຕິບັດ ຕາມທິດຊີ້ນຳຂອງຂັ້ນເທີງ ໂດຍສະເພາະການປ້ອງກັນສະກັດກັ້ນແກ້ໄຂກຸ່ມຄົນບໍ່ດີ ທີ່ເຄື່ອນໄຫວສ້າງຄວາມບໍ່ສະຫງົບ ແລະ ຄວາມບໍ່ເປັນລະບຽບຮຽບຮ້ອຍໃນສັງຄົມ.  ເປັນຕົ້ນແມ່ນ ບັນຫາຂີ້ລັກງັດແງະ, ປຸ້ນຈີ້, ຊີງຊັບ, ຢາເສບຕິດ ແລະ ອື່ນໆ ພ້ອມທັງດຳເນີນຄະດີຕໍ່ຜູ້ເຄື່ອນໄຫວກະທຳຜິດ ຕາມຂັ້ນຕອນຂອງກົດໝາຍ. ເຮັດໃຫ້ບັນຫາປະກົດການຫຍໍ້ທໍ້ຕ່າງໆ ລຸດໜ້ອຍຖອຍລົງ ຮັບປະກັນເຮັດໃຫ້ພາຍໃນແຂວງ ມີຄວາມສະຫງົບ ແລະ ເປັນລະບຽບຮຽບຮ້ອຍດີ.

ໂອກາດນີ້ ທ່ານລັດຖະມົນຕີ ກະຊວງປ້ອງກັນຄວາມສະຫງົບ ກໍ່ໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານ ແລະ ຜົນສຳເລັດ ທີ່ຄະນະພັກ ຄະນະບັນຊາແຕ່ລະຂັ້ນຍາດມາໄດ້ໃນໄລຍະຜ່ານມາ ພ້ອມທັງເໜັ້ນໜັກໃຫ້ເພີ່ມທະວີ ປັບປຸງ ແບບແຜນວິທີເຮັດວຽກ ເອົາໃຈໃສ່ສຶກສາອົບຮົມການເມືອງແນວຄິດໃຫ້ພະນັກງານ-ນັກຮົບໃຫ້ທົ່ວເຖິງ ຮັກສາຄວາມສາມັກຄີພາຍໃນໃຫ້ແໜ້ນແຟ້ນ, ສຸມໃສ່ແກ້ໄຂປະກົດການຫຍໍ້ທໍ້ໃນສັງຄົມ ໃຫ້ໝົດໄປ ຫາກມີບັນຫາເກີດຂຶ້ນຢູ່ບ່ອນໃດ ຕ້ອງຮີບຮ້ອນແກ້ໄຂຢູ່ບ່ອນນັ້ນ ໃຫ້ທັນການ ແລະ ຖືກຕ້ອງ, ສືບຕໍ່ຫັນພະນັກງານລົງກໍ່ສ້າງຮາກຖານ ປຸກລະດົມໃຫ້ປະຊາຊົນມີສ່ວນຮ່ວມ ແນໃສ່ສະກັດກັ້ນແກ້ໄຂບັນຫາຢາເສບຕິດ ແລະ ບັນຫາປະກົດການຫຍໍ້ທໍ້ໃຫ້ລຸດໜ້ອຍຖອຍລົງ.

Comments are closed.