11th Jun2019

ລມຕ ຢ້ຽມຢາມສູນປິ່ນປົວ ແລະ ຝຶກວິຊາຊີບ ຜູ້ຕິດຢາເສບຕິດ ປກສ ນະຄອນຫຼວງວຽງຈັນ

by somchan

ໃນວັນທີ 7 ມິຖຸນາ 2019 ນີ້ ພົທ ວິໄລ ຫຼ້າຄຳຟອງ ລັດຖະມົນຕີ ກະຊວງປ້ອງກັນຄວາມສະຫງົບ ພ້ອມຄະນະ ໄດ້ຢ້ຽມຢາມສູນປິ່ນປົວ ແລະ ຝຶກວິຊາຊີບ ຜູ້ຕິດຢາເສບຕິດ ກອງບັນຊາການ ປກສ ນະຄອນຫຼວງວຽງຈັນ ທີ່ຕັ້ງຢູ່ບ້ານສົມສະຫງ່າ ເມືອງໄຊເສດຖາ ນະຄອນຫຼວງວຽງຈັນ.

ພັທ ແສງທອງ ເກື້ອບຸນລ່ຳ ຮອງຫົວໜ້າຫ້ອງຕຳຫຼວດ ປກສ ນະຄອນຫຼວງວຽງຈັນ ທັງເປັນຫົວໜ້າສູນ ໄດ້ລາຍງານສະພາບພາຍໃນສູນ ໃຫ້ລັດຖະມົນຕີ ແລະ ຄະນະຮູ້ວ່າ: ປະຈຸບັນ ທາງສູນມີຜູ້ຕິດຢາເສບຕິດເຂົ້າມາຮັບການບຳບັດ ແລະ ປິ່ນປົວ 1,400 ກວ່າຄົນ ແລະ ຍົກໃຫ້ເຫັນສະພາບຄວາມຫຍຸ້ງຍາກຫຼາຍດ້ານ ເປັນຕົ້ນແມ່ນສະຖານທີ່ຄັບແຄບ, ນ້ຳປະປາບໍ່ສະດວກ, ໄຟຟ້າບໍ່ພຽງພໍຕາມຄວາມຕ້ອງການ, ອຸປະກອນຮັບໃຊ້ຂອງແພດໝໍຍັງຈຳກັດ ຕະຫຼອດຮອດການສັບຊ້ອນກົງຈັກການຈັດຕັ້ງ ຍັງບໍ່ທັນສອດຄ່ອງກັບວຽກງານຕົວຈິງເທົ່າທີ່ຄວນ.

ໃນໂອກາດນີ້, ທ່ານລັດຖະມົນຕີ ກະຊວງປ້ອງກັນຄວາມສະຫງົບ ໄດ້ຊີ້ນຳພາກສ່ວນທີ່ກ່ຽວຂ້ອງ ແກ້ໄຂບັນຫາທີ່ທາງສູນພົບຄວາມຫຍຸ້ງຍາກ. ພ້ອມນັ້ນ, ກໍ່ເໜັ້ນໜັກໃຫ້ປັບປຸງກົງຈັກການຈັດຕັ້ງໃຫ້ມີຄວາມໜັກແໜ້ນ ແລະ ເຂັ້ມແຂງ ສາມາດຕອບສະໜອງຕາມຄວາມຮຽກຮ້ອງຕ້ອງການຂອງວຽກງານວິຊາສະເພາະ.

ທ່ານລັດຖະມົນຕີ ກະຊວງປ້ອງກັນຄວາມສະຫງົບ ຍັງໄດ້ລົງເຄື່ອນໄຫວກວດກາຕົວຈິງ ເປັນຕົ້ນແມ່ນຕຶກອາຄານ, ຢ້ຽມຢາມໂຮງໝໍ, ຜູ້ມາປິ່ນປົວ, ບ່ອນອອກແຮງງານ ແລະ ຢ້ຽມຢາມສວນການຜະລິດອີກດ້ວຍ.

Off

Comments are closed.