05th Nov2019

ລັດຖະບານຫວຽດນາມ ໄດ້ປະດັບຫຼຽນໄຊ ດາວຄຳໃຫ້ ກະຊວງປ້ອງກັນປະເທດ ລາວ ແລະ ກົມກອງລວມໝູ່

by somchan

ລັດຖະບານແຫ່ງສາທາລະນະລັດ ສັງຄົມນິຍົມຫວຽດນາມໄດ້ປະດັບຫຼຽນໄຊ ດາວຄຳເຊີ່ງເປັນຫຼຽນສູງສຸດຂອງຫວຽດນາມ ແລະ ຫຼຽນປະເພດຕ່າງໆໃຫ້ກະຊວງປ້ອງກັນປະເທດ ກົມກອງທັອງຖີ່ນ ແລະ ບຸກຄົນຈຳນວນໜື່ງ ໃນໂອກາດວັນສ້າງຕັ້ງກອງທັບປະຊາຊົນປະຕິວັດລາວ ທີ່ 20 ມັງກອນ ຄົບຮອບ 70 ປີ ພິທີໄດ້ຈັດຂື້ນໃນວັນທີ 4 ພະຈິກ 2019 ນີ້ ຢູ່ທີ່ສະໂມສອນກະຊວງປ້ອງກັນປະເທດ ໂດຍການເປັນກຽດເຂົ້າຮ່ວມຂອງ ປອ ພັນຄຳ ວິລາວັນ ກຳມະການກົມການເມືອງສູນກາງພັກ ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດ. ພົນເອກ ຈັນສະໝອນ ຈັນຍາລາດ ກຳມະການກົມການເມືອງສູນກາງພັກ, ລັດຖະມົນຕີກະຊວງປ້ອງກັນປະເທດ ພ້ອມດ້ວຍບັນດານາຍ ແລະ ພົນທະຫານກົມກອງອ້ອມຂ້າງ ກະຊວງປ້ອງກັນປະເທດ ລາວ ແລະ ຫວຽດນາມເຂົ້າຮ່ວມ.

ໃນພິທີອັນມີຄວາມໝາຍສຳຄັນນີ້ ພົນເອກ ຈັນສະໝອນ ຈັນຍາລາດ ກຳມະການກົມການເມືອງສູນກາງພັກ, ລັດຖະມົນຕີກະຊວງປ້ອງກັນປະເທດ ໄດ້ກ່າວວ່າການປະດັບຫຼຽນໄຊດາວຄຳໃນຄັ້ງນີ້ ແມ່ນເປັນຄວາມພາກພູມໃຈ ແລະ ເປັນກຽດອັນສູງສົ່ງ ຂອງພັກປະຊາຊົນປະຕິວັດລາວ ສະແດງໃຫ້ເຫັນວ່າຕະຫຼອດໄລຍະ 70 ປີ ຜ່ານມາ ຜົນງານທີກອງທັບປະຊາຊົນລາວຍາດມາໄດ້ນັ້ນ ຕິດພັນກັບຜົນງານລວມຂອງປະເທດລາວ-ຫວຽດນາມ ຕະຫຼອດໄລຍະແຫ່ງການຕໍ່ສູ້ກູ້ຊາດຕ້ານສັດຕູໂຕດຽວກັນ ເພື່ອຄວາມເປັນເອກະລາດແຫ່ງຊາດຂອງລາວ ກໍ່ຄືໄລຍະແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດໃນປະຈຸບັນ ລັດຖະບານຫວຽດນາມ ຢາມໃດກໍ່ໃຫ້ການຊ່ວຍເຫຼືອ ແລະ ສະໜັບສະໜູນລາວເວົ້າລວມເວົ້າສະເພາະແມ່ນການຊ່ວຍເຫຼືອກອງທັບປະຊາຊົນລາວ ໃນການກໍ່ສ້າງຊັບພະຍາກອນມະນຸດ ແລະ ອື່ນໆ, ເຊີ່ງເປັນການປະກອບສ່ວນອັນສຳຄັນໃນການເສີມສ້າງຮັດແໜ້ນສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງຊາດ, ສອງກອງທັບລາວ-ຫວຽດນາມ ໃຫ້ແຕກດອກອອກຜົນ ຢ່າງບໍຢຸດຢັ້ງ ແລະ ພ້ອມນີ້ ທ່ານ ໄດ້ຕີລາຄາສູງຕໍ່ການຍ້ອງຍໍຂອງພັກ-ລັດຖະບານແຫ່ງສາທາລະນະລັດສັງຄົມນິຍົມຫວຽດນາມ, ຕໍ່ກອງທັບປະຊາຊົນປະຕິວັດລາວໃນຄັ້ງນີ້. ເຊີ່ງເປັນການສືບຕໍ່ຮັດແໜ້ນສາຍພົວພັນຮ່ວມມື ມິດຕະພາບອັນຍີ່ງໃຫ່ຍ, ຄວາມສາມັກຄີພິເສດ ແລະ ຮອບດ້ານລະຫວ່າງສອງພັກ-ສອງລັດລາວ-ຫວຽດນາມ ທີ່ເປັນມູນເຊື້ອມາແຕ່ດົນນານ ແລະ ເປັນກຳລັງໃຈອັນໃຫ່ຍຫຼວງໃຫ້ແກ່ພະນັກງານ-ນັກຮົບກອງທັບປະຊາຊົນລາວ, ກອງທັບ ແລະ ປະຊາຊົນລາວ ໄດ້ມີຄວາມພາກພູມໃຈເປັນຢ່າງຍີ່ງທີ່ເຫັນວ່າໃນຕະຫຼອດໄລຍະຫຼາຍສິບປີຜ່ານມາ ໂດຍສະເພາະແມ່ນໄລຍະຂອງການປະຕິບັດແນວທາງປ່ຽນແປງໃໝ່ ເຊີ່ງບັນດາທິດນຳຂອງພັກ-ລັດ ສອງປະເທດຕໍ່ຄວາມສາມັກຄີ ການພົວພັນຮ່ວມມືຮອບດ້ານ ແມ່ນສືບຕໍ່ຮັດແໜ້ນເພີມພູນຄູນສ້າງ ໃຫ້ນັບມື້ນັບແໜ້ນແຟ້ນອອກດອກອອກຜົນຍີ່ງໆຂື້ນ.

ໃຫ້ກຽດປະດັບຫຼຽນໄຊດາວຄຳ ໃຫ້ກະຊວງປ້ອງກັນປະເທດ ແຫ່ງສາທາລະນະລັດ ປະຊາທິປະໄຕ ປະຊາຊົນລາວໃນຄັ້ງນີ້ ໂດຍ ພົນເອກ ໂງ ຊ່ວນລິກ ກຳມະການສູນກາງເມືອງ ສູນກາງພັກຄອມມູນິດ ຫວຽດນາມ ລັດຖະມົນຕີກະຊວງປ້ອງກັນປະເທດ ຮັບໂດຍ ພົນເອກ ຈັນສະໝອນ ຈັນຍາລາດ  ກຳມະການກົມການເມືອງສູນກາງພັກ

ລັດຖະມົນຕີ ກະຊວງປ້ອງກັນປະເທດ ແຫ່ງ ສປປ ລາວ ໃນພິທີຍັງໄດ້ມອບຫຼຽນໄຊປະເພດຕ່າງໆໃຫ້ກົມກອງລວມໝູ່ ແລະ ບຸກຄົນອີກຈຳນວນໜື່ງ ປະກອບມີ 7 ກົມກອງ, ຫຼຽນໄຊເອກກະລາດຊັ້ນສາມ ມີ 35 ກົມກອງ ແລະ ມອບໃຫ້ບຸກຄົນຕື່ມອີກ.

Off

Comments are closed.