29th Jul2019

ລມຕ ກະຊວງ ປກສ ເຂົ້າຮ່ວມພິທີປະກາດການແຕ່ງຕັ້ງ ຮອງປະທານ ແລະ ກຳມະການຄະນະ ປກຊ-ປກສ ແຂວງຫົວພັນ

by somchan

ພົທ ວິໄລ ຫຼ້າຄຳຟອງ ເລຂາທິການສູນກາງພັກ ລັດຖະມົນຕີກະຊວງປ້ອງກັນຄວາມສະຫງົບ, ຄະນະກຳມະການ ປກຊ-ປກສ ຂັ້ນສູນກາງ ໄດ້ເຂົ້າຮ່ວມ ປະກາດການແຕ່ງຕັ້ງຮອງປະທານ ແລະ ຄະນະກຳມະການ ປກຊ-ປກສ ແຂວງຫົວພັນ ໃນວັນທີ 26 ກໍລະກົດ 2019 ໂດຍມີ ທ່ານ ວັນໄຊ ແພງຊຸມມາ ກຳມະການສູນກາງພັກ ເຈົ້າແຂວງໆຫົວພັນເຂົ້າຮ່ວມ.

ພັອ ສຸດຕິ ທິບພະສອນ ຮອງຫົວໜ້າຫ້ອງການ ຄະນະກຳມະການ ປກຊ-ປກສ ຜ່ານມະຕິຕົກລົງ ຂອງຄະນະເລຂາສູນກາງພັກ ວ່າດ້ວຍການແຕ່ງຕັ້ງຮອງປະທານ ແລະ ຄະນະກຳມະການ ປກຊ-ປກສ ແຂວງຫົວພັນ ເຊີ່ງໄດ້ແຕ່ງຕັ້ງ ພັອ ແອ່ນ ອຸ່ນອານົງນຸດ ເປັນຮອງປະທານ ຄະນະກຳມະການ ປກຊ-ປກສ ແຂວງຫົວພັນ ແລະ ແຕ່ງຕັ້ງ ພັທ ບຸນທັນ ໄຊມຸງຄຸນ ເປັນກຳມະການ ຄະນະກຳມະການ ປກຊ-ປກສ ແຂວງຫົວພັນ ເຊີ່ງການແຕ່ງຕັ້ງໃນຄັ້ງນີ້ ກໍ່ເພື່ອເປັນການປັບປຸງ ຄະນະກຳມະການ ປກຊ-ປກສ ແຂວງຫົວພັນ ໃຫ້ມີຄວາມໜັກແໜັ້ນເຂັ້ມແຂງ ເຕີບໃຫ່ຍຂະຫຍາຍຕົວ ສາມາດຕອບສະໜອງກັບຄວາມຮຽກຮ້ອງຕ້ອງການຂອງໜ້າທີ່ວຽກງານ ໂດຍສະເພາະແມ່ນການຮັກສາສະຖຽນລະພາບທາງດ້ານການເມືອງ, ຮັບປະກັນໃຫ້ສັງຄົມມີຄວາມເປັນລະບຽບຮຽບຮ້ອຍ ແລະ ທົ່ວແຂວງຫົວພັນມີຄວາມສະຫງົບປອດໄພ.

ໃນໂອກາດດັ່ງກ່າວ ພົທ ວິໄລ ຫຼ້າຄຳຟອງ ເລຂາທິການສູນກາງພັກ ລັດຖະມົນຕີກະຊວງ ປກສ ຄະນະກຳມະການ ປກຊ-ປກສ ຂັ້ນສູນກາງ ກໍ່ໄດ້ສະແດງຄວາມຊົມເຊີຍຕໍ່ສະຫາຍທີ່ໄດ້ຮັບການແຕ່ງຕັ້ງໃນຄັ້ງນີ້ ເຊີ່ງມັນແມ່ນໜ້າທີ່ ແລະ ຄວາມຮັບຜິດຊອບທີ່ມີກຽດສະຫງ່າ ທີ່ພັກ-ລັດ ໄດ້ມອບໝາຍໃຫ້. ພ້ອມທັງ, ໃຫ້ທິດຊີ້ນຳແກ່ຜູ້ທີ່ໄດ້ຮັບການແຕ່ງຕັ້ງໃໝ່ ແລະ ບັນດາ ທ່ານໃນຄະນະກຳມະການ ປກຊ-ປກສ ແຂວງ ກໍ່ຄື ກຳລັງ ປກຊ-ປກສ ທຸກສະຫາຍໃຫ້ມີຄວາມເປັນເອກະພາບ ໃນການຈັດຕັ້ງປະຕິບັດຕາມແນວທາງຂອງພັກ, ເອົາໃຈໃສ່ປະຕິບັດວຽກງານສາມສ້າງຂອງພັກໃຫ້ມີຄວາມສຳເລັດ, ກໍ່ສ້າງ ແລະ ປັບກຳລັງປະກອບອາວຸດໃຫ້ເຕີບໃຫ່ຍເຂັ້ມແຂງ, ມີຄຸນນະພາບໂດຍການສືກສາອົບຮົມການເມືອງແນວຄິດໃຫ້ພະນັກງານ-ນັກຮົບ ມີຄວາມອຸ່ນອ່ຽນທຸ່ນທ່ຽງ ເຊື່ອໝັ້ນຕໍ່ການນຳພາຂອງພັກ, ມີຄຸນທາດການເມືອງ, ມີຄຸນສົມບັດສີນທຳປະຕິວັດ, ມີຄວາມຈົ່ງຮັກພັກດີ, ມີຄວາມອົດທົນ, ມີລະບຽບແບບແຜນ, ມີຄວາມເອກກະພາບ, ມີຄວາມຮູ້ຄວາມສາມາດ ແລະ ຄວາມບຸກບືນຫ້າວຫັນຕໍ່ໜ້າທີ່ການເມືອງທີ່ໄດ້ຮັບມອບໝາຍ, ປັບປຸງການຈັດຕັ້ງໃຫ້ມີຄວາມເຂັ້ມແຂງ ມີແບບແຜນທີ່ທັນສະໄໝ ເພື່ອໃຫ້ແທດເໝາະກັບສະພາບການແຕ່ລະໄລຍະ ພ້ອມກັນປຸກລະດົມ ສຶກສາອົບຮົມອຳນາດການປົກຄອງບ້ານ ໃຫ້ມີແນວຄິດກ້ວາງຂວາງ ນຳເອົາແນວທາງຂອງພັກ-ລັດ ໄປເຜີຍແຜ່ໃຫ້ປະຊາຊົນມີແນວຄິດອຸ່ນອ່ຽງທຸ່ນທ່ຽງ ປະກອບອາຊີບທີ່ໝັ້ນຄົງ ແລະ ມີຊີວິດການເປັນຢູ່ທີ່ດີຂື້ນ ເພື່ອຫລຸດພົ້ນຈາກຄວາມທຸກຍາກ, ສິ່ງສຳຄັນແມ່ນເອົາໃຈໃສ່ສະກັດກັ້ນ ແລະ ແກ້ໄຂປະກົດການຫຍໍ້ທໍ້ໃນສັງຄົມ ເປັນຕົ້ນແມ່ນບັນຫາຢາເສບຕິດ, ຂີ້ລັກ,ງັດແງະ, ການຄ້າຂາຍເຖື່ອນ ແລະ ບັນຫາການຄ້າມະນຸດ. ທັງໝົດນັ້ນ ເພື່ອເຮັດໃຫ້ແຂວງຫົວພັນ ມີຄວາມສະຫງົບ ມີຄວາມເປັນລະບຽບຮຽບຮ້ອຍ ປະຊາຊົນມີຊີວິດການເປັນຢູ່ທີ່ດີຂື້ນ ແລະ ມີຄວາມຈະເລີນສີວິໄລ.

ຈາກນັ້ນ ທ່ານ ລັດຖະມົນຕີ ກະຊວງ ປກສ ກໍ່ໄດ້ໃຫ້ກຽດເຂົ້າຮ່ວມມອບເຄື່ອງຮັບໃຊ້ຫ້ອງການ ໃຫ້ກອງບັນຊາການ ປກສ ແຂວງ ຫົວພັນ ແລະ ຫ້ອງການປ້ອງກັນຊາດປ້ອງກັນຄວາມສະຫງົບ ແຂວງຫົວພັນ. ມອບໂດຍ ທ່ານ ວັນດີ ກວາລີວົງ ປະທານ ບໍລິສັດ ລາວ-ຊາຍນາ ເບຣ ບາຣີສ ເຄືອງໃຊ້ຫ້ອງການທີ່ນຳມາມອບໃຫ້ ກອງບັນຊາການ ປກສ ແຂວງຫົວພັນ ແລະ ຫ້ອງການ ປກຊ-ປກສ ແຂວງຫົວພັນ ປະກອບມີຄອມພີວເຕີ 30 ຊຸດ, ປິນເຕີ 10 ເຄື່ອງ, ລວມມູນຄ່າ 228 ລ້ານກີບ ເພື່ອປະກອບສ່ວນຊຸກຍູ້ ໃຫ້ວຽກງານ ປກຊ-ປກສ ໃຫ້ມີຄວາມສະດວກສະບາຍ ມີຄວາມທັນສະໄໝ ຮັບປະກັນວຽກງານວິຊາສະເພາະໃຫ້ມີຜົນສຳເລັດ.

ໃນໂອກາດດັ່ງກ່າວ ພັອ ແອ່ນ ອຸ່ນອານົງນຸດ ຫົວໜ້າກອງບັນຊາການ ປກສ ແຂວງຫົວພັນ ໄດ້ຕາງໜ້າຄະນະສະແດງຄວາມຂອບໃຈ ຕໍ່ ທ່ານ ວັນດີ ກວາລີວົງ ປະທານ ບໍລິສັດ ລາວ-ຊາຍນາ ເບຣ ບາຣີສ ທີ່ເຫັນໄດ້ຄວາມສຳຄັນຂອງວຽກງານ ປກຊ-ປກສ ແລະ ໄດ້ປະກອບສ່ວນຊຸກຍູ້ເຄື່ອງຮັບໃຊ້ຫ້ອງການ ໃຫ້ກອງບັນຊາການ ປກສ ແລະ ຫ້ອງການ ປກຊ-ປກສ ແຂວງຫົວພັນ. ເຄື່ອງຮັບໃຊ້ຫ້ອງການທີ່ໄດ້ຮັບຄັ້ງນີ້ ຈະນຳໄປມອບໃຫ້ບັນດາ ກອງບັນຊາການ ປກສ ເມືອງ ເພື່ອນຳໃຊ້ເຂົ້າໃນວຽກງານວິຊາສະເພາະໃຫ້ມີຄວາມສະດວກເກີດຜົນປະໂຫຍດສູງສຸດ.

Off

Comments are closed.