06th Feb2018

ລັດຖະມົນຕີກະຊວງ ປກສ ໂອ້ລົມຕໍ່ ຄະນະພັກ-ຄະນະນຳກົມໃຫ່ຍຕຳຫຼວດ ແລະ ພະນັກງານຫຼັກແຫຼ່ງ

by somchan

ພົຕຕີ ສົມແກ້ວ ສີລາວົງ ເລຂາທິການສູນກາງພັກ ລັດຖະມົນຕີກະຊວງປ້ອງກັນຄວາມສະຫງົບ ໄດ້ໂອ້ລົມຕໍ່ຄະນະພັກ-ຄະນະນຳກົມໃຫ່ຍຕຳຫຼວດ ແລະ ພະນັກງານຫຼັກແຫຼ່ງກົມກອງວິຊາສະເພາະ ທີ່ເຮັດວຽກ ງານຕຳຫຼວດໃນຂອບເຂດທົ່ວປະເທດ ໃນໂອກາດທີ່ທ່ານເຂົ້າຮ່ວມກອງປະຊຸມສະຫຼູບ ວຽກງານຕຳຫຼວດປະຈຳປີ 2017 ແລະ ທິດທາງ ແຜນການວຽກງານຈຸດສຸມປີ 2018 ຂອງ ກົມໃຫ່ຍຕຳຫຼວດ ກະຊວງປ້ອງກັນຄວາມສະ ຫງົບໃນວັນທີ່ 1 ກຸມພາ 2018 ທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານ ແລະ ຜົນສຳເລັດ , ທີ່ຄະນະພັກ , ຄະນະນຳກົມໃຫ່ຍຕຳຫຼວດ ແລະ ກົມກອງວິຊາສະເພາະໃນຂອບເຂດທົ່ວປະເທດ ຍາດມາໄດ້ໃນ 1 ປີ ຜ່ານມາ ເປັນຕົ້ນແມ່ນການຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍໃນສັງຄົມ ໂດຍສະເພາະແມ່ນການມ້າງລາຍຄະດີຢາເສບຕິດລາຍໃຫ່ຍ, ການສໍ້ໂກງຊັບ, ການລັກຊັບຂອງພົນລະເມືອງ, ຄ້າຂາຍເທື່ອນ ແລະ ອື່ນໆ ສາມາດແກ້ໄຂໄດ້ຢ່າງທັນການ ແລະ ເຮັດໃຫ້ພື້ນຖານໂຄງລ່າງທາງດ້ານເຖດຖະກິດມີການຂະຫຍາຍຕົວຢ່າງຕໍ່ເນື່ອງ ສະພາບທາງດ້ານການເມືອງມີຄວາມສະຫງົບ ປອດໄພ ຮ້ອຍສ່ວນຮ້ອຍ.

ພ້ອມນີ້, ທ່ານຍັງເນັ້ນໜັກໃຫ້ຄະນະພັກ-ຄະນະນຳ ກົມໃຫ່ຍຕຳຫຼວດ, ກົມກອງວິຊາສະເພາະທີ່ເຮັດວຽກງານຕຳຫຼວດໃນຂອບເຂດທົ່ວປະເທດ ຕ້ອງໄດ້ສຶບຕໍ່ເອົາໃຈໃສ່ຫຼາຍວຽກງານ ເປັນຕົ້ນແມ່ນການຈັດຕັ້ງ ປະຕິບັດຜັນຂະຫຍາຍ 4 ຄາດໝາຍ ແຜນການໃຫ່ຍ 41 ໂຄງການ ທີ່ກະຊວງປ້ອງກັນຄວາມສະຫງົບວາງອອກ ແລະ ແຜນງານຕ່າງໆທີ່ກົມໃຫ່ຍຕຳຫຼວດວາງອອກ, ເອົາໃຈໃສ່ວຽກງານປົກປັກຮັກສາສະຖຽນລະພາບ ທາງດ້ານການເມືອງ ແລະ ຄວາມເປັນລະບຽບ-ຮຽບຮ້ອຍທາງສັງຄົມ, ສຶບຕໍ່ປັກປຸງກໍ່ສ້າງພັກ-ກໍ່ສ້າງພະນັກງານ ໃຫ້ມີຄຸນທາດການເມືອງໜັກແໜ້ນມີຄຸນສົມບັດສີນທຳປະຕິວັດ ແລະ ວຽກງານອື່ນໆທີ່ພັກ-ລັດ, ການຈັດຕັ້ງຂັ້ນເທີງ ແລະ ປະຊາຊົນມອບໝາຍໃຫ້ມີຜົນງານອັນໃໝ່ ແລະ ຍິ່ງໃຫ່ຍກ່ວາເກົ່າ.

Off

Comments are closed.