10th Apr2019

ລັດຖະມົນຕີກະຊວງ ປກສ ຕ້ອນຮັບ ການເຂົ້າຢ້ຽມ ຂ່ຳນັບເອກອັກຄະລັດ ສະທູດແຫ່ງປະເທດ ຮົງກາຣີ

by somchan

ວັນທີ 10 ເມສາ 2019 ນີ້ ຢູ່ທີ່ຫ້ອງຮັບແຂກກະຊວງປ້ອງກັນຄວາມສະຫງົບ ພົທ ວິໄລ ຫຼ້າຄຳຟອງ ລັດຖະມົນຕີກະຊວງປ້ອງກັນຄວາມສະຫງົບ ພ້ອມດ້ວຍຄະນະ ໄດ້ຕ້ອນຮັບ ການເຂົ້າຢ້ຽມຂ່ຳນັບ ຂອງທ່ານ ຊີເວສເຕີ ບຸສ ເອກອັກຄະລັດສະທູດ ວິສາມັນຜູ້ມີອຳນາດເຕັມ ແຫ່ງປະເທດ ຮົງກາຣີ ປະຈຳບາງກອກ ຣາຊະອານາຈັກໄທ ພ້ອມດ້ວຍຄະນະ ເນື່ອງໃນໂອກາດທີ ທ່ານ ໄດ້ເດີນທາງມາເຮັດວຽກ ຢູ່ສາທາລະນະລັດ ປະຊາທິປະໄຕ ປະຊາຊົນລາວ ໃນໂອກາດດັງກ່າວ ທ່ານ ຊີເວສເຕີ ບຸສ ໄດ້ລາຍງານການເຄືອນໄຫວເຮັດວຽກຢູ່ ສປປ ລາວ ໃຫ້ທ່ານລັດຖະມົນຕີ ກະຊວງ ປກສ ພ້ອມທັງຍົກໃຫ້ເຫັນການພົວພັນຮ່ວມມື ລະຫວ່າງ ສອງພັກສອງລັດ ປະຊາຊົນສອງຊາດລາວ ແລະ ຮົງກາຣີ ທີ່ມີມູນເຊື້ອອັນດີງາມມາແຕ່ດົນນານໃຫ້ເຂົ້າສູ່ລວງເລິກ ເປັນຕົ້ນແມ່ນການພົວພັນຮ່ວມມືດ້ານວຽກງານວິຊາສະເພາະໃນກຳລັງປ້ອງກັນຄວາມສະຫງົບ ແລະ ວຽກງານອື່ນໆ ໃນສະພາບການໃໝ່ເພື່ອເຮັດໃຫ້ການພົວພັນຮ່ວມມືມິດຕະພາບລະຫວ່າງສອງຝ່າຍມີຄວາມແໜ້ນແຟ້ນຍິ່ງຂື້ນ.

ພ້ອມນີ້ທ່ານລັດຖະມົນຕີກະຊວງປ້ອງກັນຄວາມສະຫງົບ ໄດ້ສະແດງຄວາມຕ້ອນຮັບຢ່າງອົບອຸ່ນ ແລະ ຕີລາຄາສູງຕໍ່ການເຂົ້າຢ້ຽມຂ່ຳນັບຂອງທ່ານ ເອກອັກຄະລັດຖະທູດ ວິສາມັນຜູ້ມີອຳນາດເຕັມປະເທດຮົງກາຣີ ປະຈຳບາງກອກ ຣາຊະອານະຈັກໄທ ທີ່ໄດ້ສະແດງໃຫ້ເຫັນການພົວພັນມິດຕະພາບອັນດີງາມລະຫວ່າງສອງປະເທດທີ່ມີມາແຕ່ດົນນານ ແລະ ເປັນຂີດໝາຍອັນສຳຄັນ ໃນການພົວພັນຮ່ວມມືກັນ ໃນການສ້າງສາພັດທະນາ ປະເທດຊາດໃຫ້ຈະເລີນຮຸ່ງເຮືອງສີວິໄລ ແລະ ຮັບປະກັນໄດ້ຄວາມສະຫງົບປອດໄພໃຫ້ແກ່ປະເທດຊາດ, ກໍ່ຄືການນຳພັກລັດ ແລະ ປະຊາຊົນສອງຊາດລາວ-ຮົງກາຣີ ມີການຊ່ວຍເຫຼືອເຊິ່ງກັນ ແລະ ກັນ ລະຫວ່າງສອງປະເທດ ໃນດ້ານຕ່າງໆ ໂດຍຕ່າງຝ່າຍ, ຕ່າງໄດ້ຮັບຜົນປະໂຫຍດ, ສືບຕໍ່ສາຍພົວພັນມິດຕະພາບທີ່ດີງາມນີ້ ໃຫ້ເຂົ້າສູ່ລວງເລິກ ແລະ ແໜ້ນແຟ້ນຍິ່ງໆຂື້ນ.

Off

Comments are closed.