11th Jun2018

ລັດຖະມົນຕີກະຊວງ ປກສ ລາຍງານສະພາບ ການແກ້ໄຂບັນຫາຢາເສບຕິດ ແລະ ການເກີດອຸປະຕິເຫດ ຕໍ່ກອງປະຊຸມສະພາ.

by somchan

ກອງປະຊຸມສະໄໝສາມັນເທື່ອທີ 5 ຂອງສະພາ ແຫ່ງຊາດຊຸດທີ 8 ໃນວັນທີ 8 ມິຖຸນາ 2018 ນີ້ ໂດຍການເປັນ ປະທານຂອງທ່ານ ແສງນວນ ໄຊຍະລາດ ຮອງປະທານສະພາແຫ່ງຊາດ. ກອງປະຊຸມສະມາຊິກສະພາແຫ່ງຊາດ ໄດ້ຮັບຟັງບົດລາຍງານສະພາບການແກ້ໄຂ ບັນຫາຢາເສບຕິດ ແລະ ອຸປະຕິເຫດ ເຊິ່ງສະເໜີ ໂດຍ ພົນຕີ ສົມແກ້ວ ສີລາວົງ ລັດຖະມົນຕີ ກະຊວງປ້ອງກັນຄວາມສະຫງົບ ທ່ານໄດ້ກ່າວວ່າ: ບັນຫາຢາເສບຕິດໃນສັງຄົມປະຈຸບັນ ມີລັກສະນະເພີ່ມຂຶ້ນ, ແຜ່ລະບາດໄປທົ່ວທຸກບ່ອນໃນສັງຄົມ, ນັບທັງຕົວເມືອງ ແລະ ຊົນນະບົດເຂດຫ່າງໄກສອກຫຼີກ ໃນລະດັບທີ່ແຕກຕ່າງກັນ, ການພົວພັນຄ້າຂາຍຢາເສບຕິດ ມີທັງຄົນລາວ, ຕ່າງປະເທດ, ການນຳເຂົ້າ-ສົ່ງອອກຢາເສບຕິດປະເພດຕ່າງໆ ເຖິງວ່າເຈົ້າໜ້າທີ່ຕຳຫຼວດໄດ້ເອົາໃຈໃສ່ຕ້ານສະກັດກັ້ນ ແລະ ແກ້ໄຂຢ່າງຕໍ່ເນື່ອງແຕ່ກໍ່ບໍ່ສາມາດເຮັດໃຫ້ຢາເສບຕິດຫຼຸດລົງ, ສິ່ງທີ່ໜ໊າເປັນຫ່ວງ ບັນຫາຢາເສບຕິດໄດ້ຊືມເລິກເຂົ້າຫຼາຍຊັ້ນຄົນ ເປັນສາເຫດເຮັດໃຫ້ເກີດມີປະກົດການຫຍໍ້ທໍ້ໃນສັງຄົມ. ດັ່ງນັ້ນ, ຈຶ່ງໄດ້ວາງມາດຕະການ ແລະ ວິທິການແກ້ໄຂຢາເສບຕິດ ເປັນໜ້າທີ່ລວມຂອງທົ່ວປວງຊົນ ທຸກພາກສ່ວນໃນສັງຄົມຕ້ອງເປັນເຈົ້າການ ແລະ ມີສ່ວນຮ່ວມ ສືບຕໍ່ລົງກໍ່ສ້າງຮາກຖານການເມືອງ ໂດຍນຳເອົາແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານ ຕິດພັນກັບວຽກງານສາມສ້າງພັດທະນາຊົນນະບົດຮອບດ້ານ, ລົງຈັດຕັ້ງເຜີແຜ່ໃຫ້ທຸກຊັ້ນຄົນຮັບຮູ້ເຂົ້າໃຈ. ພ້ອມທັງ, ປັບປຸງ ປກສ ກຸ່ມບ້ານ ໃຫ້ມີປະສິດທິພາບຂຶ້ນ. ສັງລວມແລ້ວ ວຽກງານຕ້ານປະກົດການຫຍໍ້ທໍ້ໃນສັງຄົມ ເວົ້າລວມ ເວົ້າສະເພາະ ວຽກງານຕ້ານ, ສະກັດກັ້ນ ແລະ ແກ້ໄຂບັນຫາຢາເສບຕິດ ແລະ ບັນຫາການເກີດອຸປະຕິເຫດຕາມທ້ອງຖະໜົນ ເປັນບັນຫາໜຶ່ງ ທີ່ກົດໜ່ວງທ່ວງດຶງການພັດທະນາ ເສດຖະກິດ-ສັງຄົມຂອງຊາດ. ສະນັ້ນ, ຢາກແກ້ໄຂບັນຫາດັ່ງກ່າວນັ້ນໃຫ້ໄດ້ ອຳນາດການປົກຄອງທຸກຂັ້ນຕະຫຼອດຮອດທຸກຊັ້ນຄົນໃນສັງຄົມຕ້ອງເປັນເອກະພາບ, ເປັນຫູເປັນຕາຊ່ວຍເຈົ້າໜ້າທີ່ ແລະ ເປັນເຈົ້າການເຄົາລົບປະຕິບັດ ກົດໝາຍຢ່າງເຂັ້ມງວດ, ພ້ອມກັນສຶກສາອົບຮົມລູກຫານຂອງຕົນໃຫ້ຮັບຮູ້ເຂົ້າໃຈເຖິງຜົນຮ້າຍຂອງຢາເສບຕິດ ຮູ້ເຄົາລົບລະບຽບການສັນຈອນ ແລະ ບໍ່ຄວນຖືວ່າວຽກງານດັ່ງກ່າວເປັນວຽກງານຂອງຂະແໜງການປ້ອງກັນຊາດ-ປ້ອງກັນຄວາມສະຫງົບແຕ່ຝ່າຍດຽວ ທຸກຄົນໃນສັງຄົມຕ້ອງຊ່ວຍກັນສະກັດກັ້ນບັນຫາປະກົດການຫຍໍ້ທໍ້ທໍ້ຕ່າງໆໃຫ້ຫຼຸດລົງເທື່ອລະກ້າວ.

 

Comments are closed.