26th Jun2013

ລັດຖະມົນຕີຊ່ວຍ ລົງຢ້ຽມຢາມ ແລະ ຊີ້ນຳວຽກງານຢູ່ 3 ເມືອງຂອງແຂວງບໍລິຄຳໄຊ

by somchan

ໃນລະຫວ່າງວັນທີ 12-14 ມິຖຸນາ 2013ຄະນະນຳກະຊວງປກສ ນຳໂດຍ ທ່ານ ພົຈວ ກົງທອງ ພົງວິຈິດ ລັດຖະມົນຕີຊ່ວຍວ່າການກະຊວງປ້ອງກັນ ຄວາມສະຫງົບພ້ອມຄະນະໄດ້ລົງເຄື່ອນ ໄຫວຢ້ຽມຢາມ ແລະ ເຮັດວຽກຢູ່ເມືອງຄຳເກີດ, ເມືອງວຽງທອງແລະເມືອງບໍລິຄັນ ແຂວງບໍລິຄຳໄຊ.ໃນການລົງຢ້ຽມຢາມແລະເຮັດວຽກໃນຄັ້ງນີ້ ທ່ານ ພົຈວ ກົງທອງ ພົງວິຈິດ ແລະຄະນະໄດ້ຮັບຟັງການລາຍງານສະພາບຈຸດ ພິເສດແລະສະພາບລວມກ່ຽວກັບວຽກງານກໍ່ສ້າງ ຮາກຖານການເມືອງ-ພັດທະນາຊົນນະບົດຮອບດ້ານ ຈາກບັນດາຫົວໜ່້າກອງ ບັນຊາການ ປກສ ເມືອງ, ຫົວໜ້າກອງກໍ່ສ້າງຮາກຖານຢູ່ 3 ເຂດຈຸດສຸມ ໂດຍສະເພາະແມ່ນສະພາບຄວາມບໍ່ສະຫງົບ, ຄວາມບໍ່ເປັນລະບຽບຮຽບຮ້ອຍໃນສັງຄົມຢູ່ 3 ເມືອງ, ແລະ ການປະຕິບັດໜ້າທີ່ໃນການປ້ອງກັນ-ສະກັດກັ້ນ ແລະ ແກ້ໄຂບັນຫາຕ່າງໆທີ່ເກີດຂຶ້ນ.

ໃນໄລຍະຜ່ານມາໄດ້ມີກຸ່ມຄົນບໍ່ຫວັງດີຍຸຍົງສົ່ງເສີມໃຫ້ປະຊາຊົນຈຳນວນໜຶ່ງເຄື່ອນໄຫວບໍ່ຖືກຕ້ອງຕາມແນວທາງນະໂຍບາຍຂອງພັກ ຜິດຕໍ່ລະບຽບກົດໝາຍບ້ານເມືອງ ແລະ ເກີດມີປະກົດການຫຍໍ້ທໍ້ຕ່າງໆ ໃນສັງຄົມເຊັ່ນ: ປຸ້ນຈີ້, ຂີ້ລັກ, ງັດແງະ, ຄ້າ-ຂາຍເຖື່ອນ,ລັກລອບຂຸດຄົ້ນໄມ້, ແຮ່ທາດ,ຄ້າ-ຂາຍຢາເສບຕິດ ແລະ ອື່ນໆ.

ຜ່ານການຮັບຟັງລາຍງານສະພາບການຕ່າງໆພາຍໃນ 3 ເມືອງ, ທ່ານ ພົຈວ ກົງທອງ ພົງວິຈິດ ໄດ້ໃຫ້ທິດຊີ້ນຳຕໍ່ຄະນະພັກ-ຄະນະບັນຊາກ່ຽວກັບຫຼາຍບັນຫາ. ກ່ອນອື່ນໝົດທ່ານໄດ້ກ່າວຍ້ອງຍໍຊົມເຊີຍຕໍ່ຜົນງານທີ່ຍາດມາໄດ້ໃນໄລຍະຜ່ານມາ. ນອກນັ້ນທ່ານຍັງໄດ້ຍົກໃຫ້ເຫັນ 2 ໜ້າທີ່ຍຸດທະສາດທີ່ພັກວາງອອກຄື: ປົກປັກຮັກສາ ແລະ ສ້າງສາພັດທະນາປະເທດຊາດ. ໃນນັ້ນທ່ານໄດ້ເໜັ້ນໜັກ ໃຫ້ຖືເອົາການພັດທະນາເສດຖະກິດເປັນໃຈກາງ ດ້ວຍການຂຸດຄົ້ນທ່າແຮງທຳມະຊາດທີ່ບົ່ມຊ້ອນ. ເຊັ່ນວ່າ: ສຶບຕໍ່ຈັດຕັ້ງຂະຫຍາຍການກະສິກຳປູກຝັງ ແລະ ລ້ຽງສັດໃຫ້ເປັນລະບົບ, ຈັດຕັ້ງເປັນກຸ່ມຜະລິດ ຫຼື ກຸ່ມບ້ານຜະລິດໃດໜຶ່ງ ເພື່ອເຮັດໃຫ້ປະຊາຊົນມີອາຊີບ, ມີລາຍໄດ້ ແລະ ມີຢູ່ມີກິນ, ນຳພາປະຊາຊົນສ້າງສາພັດທະນາດ້ານວັດທະນະທຳ-ສັງຄົມ ແລະ ເຄື່ອນໄຫວວຽກງານປ້ອງກັນຊາດ-ປ້ອງກັນຄວາມສະຫງົບ ໃຫ້ແທດ   ເໝາະກັບຕົວຈິງ, ຮັບປະກັນໃຫ້ມີຄວາມສະຫງົບປອດໄພໃນທ້ອງຖິ່ນ ເພື່ອສະໜອງກັບຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່ ພ້ອມນີ້ຕ້ອງໄດ້ຍົກສູງຄວາມຮັບຜິດຊອບຂຶ້ນຕື່ມອີກ ໂດຍການເອົາໃຈໃສ່ຈັດຕັ້ງປະຕິບັດ 4 ຄາດໝາຍ, 4 ບຸກທະລຸ, 13 ວຽກງານຍຸດທະສາດ ຂອງກະຊວງ ປກສ ໃຫ້ປະກົດຜົນເປັນຈິງ, ສຸມໃສ່ປຸກລະດົມກຳລັງກໍ່ສ້າງຮາກຖານໃຫ້ເຂັ້ມແຂງ, ປອດໃສຂາວສະອາດໂດຍຕິດພັນກັບການປັບປຸງບູລະນະການຈັດຕັ້ງ, ຮູ້ເຮັດ,ຮູ້ນຳພາ ແລະມີລະບຽບວິໄນເຂັ້ມງວດ. ໃນໂອ ກາດດັ່ງກ່າວ, ທ່ານກໍ່ໄດ້ມອບອຸປະກອນຮັບໃຊ້ຫ້ອງການ ແລະ ເຄື່ອງອຸປະໂພກຈຳນວນໜຶ່ງໃຫ້ແກ່ກອງກໍ່ສ້າງຮາກຖານປະຈຳຢູ່ເຂດຈຸດສຸມ 3 ເມືອງດັ່ງກ່າວ.

Off

Comments are closed.