07th Jun2018

ລັດຖະມົນຕີ ກະຊວງ ປກສ ຕ້ອນຮັບການ ເຂົ້າຢ້ຽມຂ່ຳນັບຂອງເອກອັກຄະລັດຖະທູດ ແຫ່ງສາທາລະນະລັດ ຕວກກີ

by somchan

ວັນທີ 6 ມິຖຸນາ 2018 ນີ້ ຫ້ອງຮັບແຂກກະຊວງ ປ້ອງກັນຄວາມສະຫງົບ, ພົນຕີ ສົມແກ້ວ ສີລາວົງ ລັດຖະມົນຕີ ກະຊວງປ້ອງກັນຄວາມສະຫງົບ ໄດ້ຕ້ອນຮັບການເຂົ້າຢ້ຽມຂ່ຳນັບຂອງທ່ານ ອາເມັດ ອີເດັມອາໄຄ ເອກອັກ ຄະລັດຖະທູດ ວິສາມັນ ຜູ້ມີອຳນາດເຕັມ ແຫ່ງສາທາລະນະລັດ ຕວກກີ ທີ່ໄດ້ມາດຳລົງຕຳແໜ່ງ ເປັນເອກອັກ ຄະລັດຖະທູດ ຄົນໃຫມ່ ປະຈຳ ສປປລາວ.

ໃນໂອກາດທີ່ເຂົ້າຢ້ຽມໃນຄັ້ງນີ້, ທ່ານເອກອັກຄະລັດຖະທູດ ກໍ່ໄດ້ລາຍງານຈຸດປະສົງ ໃນການເຂົ້າຢ້ຽມຂ່ຳນັບ ໃຫ້ທ່ານລັດຖະມົນຕີກະຊວງປ້ອງກັນຄວາມສະຫງົບຮັບຊາບ. ພ້ອມດຽວກັນນີ້, ທ່ານລັດຖະມົນຕີກະຊວງປ້ອງກັນຄວາມສະຫງົບ ໄດ້ສະແດງຄວາມຕ້ອນຮັບຢ່າງອົບອຸ່ນ ມີໄມຕີຈິດມິດຕະພາບ ແລະ ຕີລາຄາສູງ ຕໍ່ການເຂົ້າຢ້ຽມຂ່ຳນັບໃນຄັ້ງນີ້ ຂອງທ່ານ ອາເມັດ ອີເດັມອາໄຄ ທີ່ໄດ້ດຳລົງຕຳແໜ່ງ ເປັນເອກອັກຄະລັດຖະທູດ ຄົນໃໝ່ປະຈຳ ສປປ ລາວ.

ໂອກາດນີ້, ທັງສອງຝ່າຍກໍ່ໄດ້ໂອ້ລົມ ແລະ ປຶກສາຫາລືກັນຫຼາຍວຽກງານງານ ເປັນຕົ້ນ ວຽກງານການພົວພັນປະສານຮ່ວມມືກັນ ລະຫວ່າງສອງປະເທດ ໃນການສະກັດກັ້ນ ແລະ ຕ້ານອາຊະຍາກຳຂ້າມຊາດ, ຄ້າ-ຂາຍຢາເສບຕິດ, ການເຂົ້າ-ອອກເມືອງ ແລະ ວຽກງານອື່ນໆ.

ໂອກາດນີ້, ທ່ານ ອາເມັດ ອີເດັມອາໄຄ ກໍ່ໄດ້ສະແດງຄວາມຂອບໃຈ ຕໍ່ທ່ານລັດຖະມົນຕີກະຊວງປ້ອງກັນຄວາມສະຫງົບ ແຫ່ງ ສປປລາວ ພ້ອມດ້ວຍຄະນະທີ່ໄດ້ໃຫ້ການຕ້ອນຮັບຢ່າງອົບອຸ່ນໃນຄັ້ງນີ້, ແລະ ຈະສືບຕໍ່ສາຍພົວພັນທີ່ເປັນມູນເຊື້ອ ລະຫວ່າງສອງຊາດລາວ ແລະ ຕວກກີ ເວົ້າລວມ ເວົ້າສະເພາະ ກໍ່ຄືສອງກຳລັງປ້ອງກັນຄວາມສະຫງົບລາວ ແລະ ຕວກກີ ໃຫ້ແໜ້ນແຟ້ນຍິ່ງໆຂຶ້ນຕໍ່ໜ້າ ແລະ ຍາວນານ.

Off

Comments are closed.