14th Jan2019

ລັດຖະມົນຕີ ກະຊວງ ປກສ ພົບປະໂອ້ລົມ ກົມໃຫ່ຍ 502

by somchan

ວັນທີ 10 ມັງກອນ ນີ້ ຢູ່ທີ່ສະໂມສອນກະຊວງປ້ອງກັນຄວາມສະຫງົບ, ພົທ ວິໄລ ຫຼ້າຄຳຟອງ ເລຂາທິການສູນກາງພັກ ລັດຖະມົນຕີກະຊວງປ້ອງກັນຄວາມສະຫງົບ, ໄດ້ພົບປະໂອ້ລົມຄະນະພັກ, ຄະນະນຳ ແລະ ພະນັກງານຫຼັກແຫຼ່ງ ກົມກອງອ້ອມຂ້າງກົມໃຫ່ຍສັນຕິບານ ໃນໂອກາດທີ່ທ່ານໄດ້ຮັບການແຕ່ງຕັ້ງໃຫ້ປະຕິບັດໜ້າທີ່ເປັນ ລັດຖະມົນຕີກະຊວງ ປກສ ຜູ້ໃໝ່ ໃຫ້ກຽດ ພົຈວ ບຸນມີ ແສງຄຳຢອງ ຄະນະປະຈຳພັກກະຊວງ,                  ຫົວໜ້າກົມໃຫ່ຍສັນຕິບານ, ກະຊວງປ້ອງກັນຄວາມສະຫງົບ, ພ້ອມດ້ວຍຄະນະພັກ-ພະນັກງານຫຼັກແຫຼ່ງກົມກອງອ້ອມຂ້າງກົມໃຫ່ຍສັນຕິບານ.

ໂອກາດດັ່ງກ່າວ ພົຈວ ບຸນມີ ແສງຄຳຢອງ ໄດ້ລາຍງານກ່ຽວກັບການຊີ້ນຳ-ບັນຊາ ແລະ ການເຄື່ອນໄຫວເຮັດໜ້າທີ່ວຽກງານວິຊາສະເພາະຂອງກົມໃຫ່ຍສັນຕິບານ ເປັນຕົ້ນໄດ້ຍົກໃຫ້ເຫັນທີ່ຕັ້ງ, ພາລະບົດບາດ, ສິດໜ້າທີ່, ກົງຈັກການຈັດຕັ້ງຂອງກົມໃຫ່ຍສັນຕິບານ ແລະ ການປະຕິບັດໜ້າທີ່ການເມືອງທີ່ພັກ-ລັດ ແລະ ການຈັດຕັ້ງຂັ້ນເທີງມອບໝາຍໃຫ້ໃນໄລຍະຜ່ານມາ ໃຫ້ທ່ານລັດຖະມົນຕີ ກະຊວງປ້ອງກັນຄວາມສະຫງົບຮັບຊາບ.

ຈາກນັ້ນທ່ານລັດຖະມົນຕີກະຊວງ ປກສ  ກໍໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ຄະນະພັກ-ຄະນະນຳ ນາຍແລະພົນຕຳຫຼວດກຳລັງປ້ອງກັນຄວາມສະຫງົບ ສັນຕິບານຍາດມາໄດ້ໃນໄລຍະຜ່ານມາ ແລະ ຕິລາຄາສູງຕໍ່ໝາກຜົນໄດ້ຮັບ ແລະ ພ້ອມນີ້ໄດ້ມີຄຳເຫັນຊີ້ນຳໃຫ້ຄະນະພັກ,ຄະນະນຳ ແລະ ພະນັກງານຫຼັກແຫຼ່ງ ກົມໃຫ່ຍສັນຕິບານຕ້ອງໄດ້ເພີ່ມທະວີສືບຕໍ່ເອົາໃຈໃສ່ປັບປຸງວຽກງານສຶກສາອົບຮົມການເມືອງ-ແນວຄິດ, ຕິດພັນກັບວຽກງານວິຊາສະເພາະ ແລະ ຄວາມສາມັກຄີຢູ່ໃນກົມກອງ ແລະ ວຽກງານອື່ນໆ.

Comments are closed.