16th Nov2017

ລາຍງານຄວາມຄືບໜ້າການກະກຽມ ຈັດກອງປະຊຸມຕມອາຊຽນ

by somchan

ໃນ​ວັນ​ທີ 15 ພະຈິກ ນີ້ ກະຊວງ​ປ້ອງ​ກັນ​ຄວາມ​ສະຫງົບ ​ໄດ້​ຈັດ​ກອງປະຊຸມ​ປຶກສາ​ຫາລື ​ແລະ ລາຍ​ງານ​ຄວາມ​ຄືບ​ໜ້າ​ຂອງ​ແຕ່​ລະ​ອະນຸ​ກຳມະການ ​ໃນ​ການ​ກະກຽມ​ຄວາມ​ພ້ອມ​ໃຫ້​ແກ່​ກອງ​ປະຊຸມ ຫົວໜ້າ ຕມ ອາ​ຊຽນຮ່ວມ​ກັບ ພະ​ແນ​ກກົງ​ສູນ​ກະຊວງ​ການ​ຕ່າງປະ​ເທດ​ຄັ້ງ​ທີ່ 21 ທີ່ ສປປ ລາວ ​ເປັນ​ເຈົ້າພາບ ​ໃນ​ລະຫວ່າງ​ວັນ​ທີ 20-25 ພະຈິກ 2017 ນີ້ ​ໂດຍ​ການ​ເປັນ​ປະທານ​ຂອງ​ພົຕ ກົງ​ທອງ ພົງ​ວິຈິດ ຮອງ​ລັດຖະມົນຕີ​ກະຊວງ​ປ້ອງ​ກັນຄວາມ​ສະຫງົບ ທັງ​ເປັນ​ຫົວໜ້າ​ຄະ​ນະ​ຮັບຜິດຊອບ​ຊີ້​ນຳ​ລວມ, ມີ​ບັນດາ​ອະນຸ​ກຳມະການ ​ແລະ ພາກສ່ວນ​ທີ່​ກ່ຽວຂ້ອງ​ເຂົ້າ​ຮ່ວມ.

ພັທ ສາຍ​ສະໜິງ ສີວິ​ໄລ ຫົວໜ້າ​ກົມ​ຕຳຫຼວດ​ກວດ​ຄົນ​ເຂົ້າ-​ອອກ​ເມືອງ ກົມ​ໃຫ່ຍສັນຕິ​ບານ ກະຊວງ​ປ້ອງ​ກັນ​ຄວາມ​ສະຫງົບ ​​ໄດ້ລາຍ​ງານຄວາມ​ຄືບ​ໜ້າ​ໃນ​ການ​ກະກຽມ​ກອງ​ປະຊຸມ​ຂອງ​ແຕ່ລະ ອະນຸ​ກຳມະການ ​ເປັນ​ຕົ້ນ​ແມ່ນ​ອະນຸ​ກຳມະການ ດ້ານ​ພິທີການ, ​ເສດຖະກິດ, ​ເນື້ອ​ໃນ ​ແລະ ດ້ານ​ອື່ນ​ໆ ​ເຫັນ​ວ່າ​ມີ​ຄວາມ​ພ້ອມ​ເພື່ອ​ຮັບປະກັນ​ໃຫ້​ແກ່​ກອງ​ປະຊຸມ​ດັ່ງກ່າວ​ໄດ້​ຮັບ​ຜົນສຳ​ເລັດ ຕາມ​ລະດັບ​ຄາດໝາຍ. ​ໂອກາດ​ນີ້ ພົຕ ກົງ​ທອງ ພົງ​ວິຈິດ ຮອງ​ລັດຖະມົນຕີ​ກະຊວງ​ປ້ອງ​ກັນ​ຄວາມ​ສະຫງົບ ​ໄດ້​ໃຫ້​ທິດ​ຊີ້​ນຳ ​ແລະ ​ເໜັ້ນໜັກ​ໃຫ້​ແຕ່​ລະ​ອະນຸ​ກຳມະການ​ເອົາ​ໃຈ​ໃສ່​ປະສານ​ສົມທົບ​ກັບ​ພາກສ່ວນ​ທີ່​ກ່ຽວຂ້ອງ​ເພື່ອ​ພ້ອມ​ກັນ​ເປັນ​ເຈົ້າ​ການ​ໃນ​ການ​ເກັບ​ກຳ​ສະພາບ​ການ​ຕ່າງ​ໆ​ເພື່ອ​ເຮັດ​ໃຫ້​ກອງ​ປະຊຸມ​ໄດ້​ຮັບ​ຜົນສຳ​ເລັດ ບັນຫາ​ສຳຄັນ ​ແມ່ນ​ດ້ານ​ວຽກ​ງານ​ປ້ອງ​ກັນ​ຄວາມ​ສະຫງົບ ​ໃຫ້​ເອົາ​ໃຈ​ໃສ່​ໃນ​ການ​ຮັກສາ​ຄວາມ​ສະຫງົບ, ຄວາມ​ເປັນ​ລະບຽບ​ຮຽບຮ້ອຍ​ໃນ​ສັງຄົມ​ເວົ້າ​ລວມ, ​ເວົ້າ​ສະ​ເພາະ ​ແມ່ນ​ໄລຍະ​ກອງ​ປະຊຸມ​ຫົວໜ້າ ຕມ ອາຊຽນຮ່ວມ​ກັບ​ພະ​ແນ​ກກົງ​ສູນ​ກະຊວງ​ການ​ຕ່າງປະ​ເທດ​ຄັ້ງ​ທີ 21 ນີ້ ຮັບປະກັນ​ຄວາມ​ສະຫງົບ​ປອດ​ໄພ 100%.

Off

Comments are closed.