02nd Aug2018

ລາຍງານປະຈຳວັນ ວັນທີ 2 ກໍລະກົດ 2018 ຄວາມຄືບໜ້າການກອບກູ້ ໄພພິບັດນ້ຳຖ້ວມ ເມືອງສະໜາມໄຊ

by somchan

ປະຕິບັດການກອບກູ້ ແລະ ຊອກຄົ້ນຜູ້ສູນຫາຍ ຈາກເຫດການໄພພິບັດນ້ຳຖ້ວມ ຢູ່ເມືອງສະໜາມໄຊ ແຂວງອັດຕະປື ຕະຫຼອດ 10 ວັນທີ່ຜ່ານມາ ຄະນະຮັບຜິດຊອບສະໜາມທຸກພາກສ່ວນ ນັບທັງຈາກສູນກາງ ແລະ ທ້ອງຖິ່ນ ລວມທັງກຳລັງປ້ອງກັນຊາດ-ປ້ອງກັນຄວາມສະຫງົບ,

ລວມທັງອົງການຈັດຕັ້ງສັງຄົມທຸກພາກສ່ວນໄດ້ສຸມຈິດ, ສຸມໃຈເຂົ້າໃນການປະຕິບັດໜ້າທີ່ຊ່ວຍເຫຼືອ, ກອບກູ້ ແລະ ຊອກຄົ້ນຜູ້ຖືກເຄາະຮ້າຍຢ່າງເອົາຈິງເອົາຈັງ, ຫຼາຍຂະແໜງການ, ພະນັກງານໜ່ວຍກູ້ໄພທຸກຄົນໄດ້ທຸມເທເຫຼືອແຮງ, ສະຕິປັນຍາຂອງຕົນ ເຂົ້າໃນການປະຕິບັດໜ້າທີ່ ແລະ ຮີບຮ້ອນໃນການຄົ້ນຫາຜູ້ທີ່ຍັງສູນຫາຍຢູ່ ເຊິ່ງປະຈຸບັນຈາກການຖະແຫຼງການຂອງສູນບັນຊາການກອບກູ້ໄພພິບັດ ແມ່ນຄົ້ນພົບສົບແລ້ວ 13 ສົບ ແລະ ຍັງມີຜູ້ສູນຫາຍ 118 ຄົນ.

ສຳລັບການຊອກຄົ້ນຫາ ແມ່ນສຸມໃສ່ທາງພາກພື້ນດິນເປັນຕົ້ນຕໍ່ ແລະ ກະຈາຍກຳລັງບ່າງສ່ວນ ເລາະຕາມແຄມຫ້ວຍນ້ຳລຳເຊ, ການປະຕິບັດງານຊອກຄົ້ນຫາແມ່ນຍັງໃຊ້ກຳລັງຄົນເປັນຕົ້ນຕໍ ໂດຍສະເພາະແມ່ນຕ້ອງຍ່າງດ້ວຍຕີນ ຫຼື ເລືອຄານຕາມຕົມ ເພາະພາຫະນະບໍ່ສາມາດຈຳນຳໃຊ້ໄດ້ເທື່ອ ເພາະພື້ນທີ່ສ່ວນຫຼາຍຍັງເປັນຂີ້ຕົມເລິກ ເປັນຕົ້ນແມ່ນບ້ານຫີນລາດ ແລະ ບ້ານທ່າແສງຈັນ, ສ່ວນພື້ນທີ່ໆສະພາບພື້ນດິນແຫ້ງແລ້ວ ຈຳນວນໜຶ່ງກໍ່ແມ່ນໃຊ້ລົດໄຖເຂົ້າມາຊ່ວຍ.

ທ່ານ ພັອ ວັນທອງ ບຸດຕະວົງ ຜູ້ບັນຊາການກອງພົນທະຫານລາດທີ 5 ທັງເປັນຜູ້ບັນຊາການກອບກູ້ໄພພິບັດພາກສະໜາມກັບທີ່ ປະຈຳສູນບັນຊາການ ບ້ານໃໝ່ ເມື່ອງສະໜາມໄຊ ແຂວງອັດຕະປືໄດ້ກ່າວວ່າ: (ຟັງສຽງ)

ສ່ວນວຽກງານການແຈກຢາຍ, ສະໜອງການຊ່ວຍເຫຼືອຜູ້ສົບໄພ ແມ່ນຍັງດຳເນີນຢ່າງເປັນປະຈຳ ເພື່ອເຮັດໃຫ້ຜູ້ປະສົບໄພໄດ້ຮັບຢ່າງທົ່ວເຖິງ ບໍ່ມີການຂາດຕົກບົກຜອງແຕ່ຢ່າງໃດ ທ່ານ ນ. ວິໄລພອນ ວໍລະພິມ ຫົວໜ້າພະແນກກະສິກຳ ແລະ ປ່າໄມ້ ແຂວງອັດຕະປື ທັງເປັນຄະນະຮັບຜິດຊອບການແຈກຢາຍເຄື່ອງບໍລິຈາກຊ່ວຍເຫຼືອໄພພິບັດໃນຄັ້ງນີ້ ໄດ້ກ່າວວ່າ: ໃນໄລຍະຜ່ານມາ ນັບແຕ່ມື້ເກີດເຫດ ຈົນເຖິງປະຈຸບັນ ທາງສູນກອບກູ້ໄພພິບັດໄດ້ຮັບການບໍລິຈາກຊ່ວຍເຫຼືອເປັນຈຳນວນຫຼວງຫຼາຍ ຈາກທາງພາກສ່ວນຕ່າງໆ ຢ່າງບໍ່ຂາດໄລຍະ, ຈຳນວນເຄື່ອງບໍລິຈາກຕ່າງໆ ທີ່ສົ່ງມາແມ່ນໄດ້ແຈກຢາຍຢ່າງທົ່ວເຖິງ.

ແລະ ທ່ານ ຍັງໄດ້ຢັ້ງຢືນວ່າ ຂ່າວທີ່ອອກມາວ່າ ທາງສູນປິດຮັບເຄື່ອງບໍລິຈາກ ຕາມຂ່າວທີ່ກຸ່ມຄົນບໍ່ດີໄດ້ໄພດ ຫຼື ຂຽນລົງສື່ອອນລາຍນັ້ນ ແມ່ນບໍ່ເປັນຄວາມຈິງ, ເພາະໄພພິບັດໃນຄັ້ງນີ້ ແມ່ນມີຜົນເສຍຫາຍຢ່າງໜັກໜ່ວງ ສະນັ້ນຍິ່ງມີຄວາມຕ້ອງການຮັບສິ່ງຊ່ວຍເຫຼືອເປັນຈຳນວນຫຼາຍ ບໍ່ວ່າຈະເປັນເຄື່ອງອຸປະໂພກ, ບໍລິໂພກ ຫຼື ເງີນສົດເພື່ອການແກ້ໄຂຊີວິດການເປັນຢູ່ໃນໄລຍະຍາວໃຫ້ຜູ້ປະສົບໄພ, ສະນັ້ນໃຫ້ມີສະຕິໃນການບໍລິໂພກຂ່າວສານທາງອິນເຕີເນັດ ເພາະກຸ່ມຄົນບໍ່ດີອາດໃຊ້ເປັນເຄື່ອງມືໃນການປັ່ນປ່ວນເຮັດໃຫ້ບໍ່ມີຄວາມສະຫງົບ.

ສ່ວນແຜນການໃນຕໍ່ໜ້າ ນອກຈະສຸມໃສ່ໃນການຄົ້ນຫາຜູ້ສູນຫາຍທີ່ຍັງເຫຼືອ 118 ຄົນແລ້ວ, ພັກ-ລັດຖະບານຍັງຈະໄດ້ມີແຜນໃນການຈັດທີ່ພັກພາອາໃສ, ຟື້ນຟູທາງດ້ານຈິດໃຈ ແລະ ຕອບສະໜອງໃນດ້ານຕ່າງໆ ທີ່ມີຄວາມຈຳເປັນເພື່ອແກ້ໄຂຊີວິດການເປັນຢູ່ຂອງພໍ່ແມ່ປະຊາຊົນ ທີ່ຖືກຜົນກະທົບໃນຄັ້ງນີ້.

Off

Comments are closed.