21st Mar2018

ລາວ-ມ້ຽນມາ ສືບຕໍ່ເພີ່ມທະວີການຮ່ວມມື ວຽກງານປ້ອງກັນຄວາມສະຫງົບ ໃນສັງຄົມ ແລະ ຊາຍແດນ

by somchan

ໂດຍຕອບສະໜອງຕາມຄຳເຊີນ ຂອງ ພົນຕີ ສົມແກ້ວ ສີລາວົງ ລັດຖະມົນຕີກະຊວງປ້ອງກັນ ຄວາມສະຫງົບ ແຫ່ງ ສປປ ລາວ, ຄະນະ ຜູ້ແທນຂັ້ນສູງພາຍໃນ ແຫ່ງສາທາລະນະລັດ ສະຫະພາບມ້ຽນມາ ນຳໂດຍພົນໂທ ຈໍສະເວ ລັດຖະມົນຕີກະຊວງພາຍໃນ ແຫ່ງສາທາລະນະລັດ ສະຫະພາບມ້ຽນມາ ພ້ອມດ້ວຍຄະນະໄດ້ເຄື່ອນໄຫວ ຢ້ຽມຢາມ ແລະ ເຂົ້າຮ່ວມກອງປະຊຸມລັດຖະມົນຕີ ຄັ້ງທີ 7 ວ່າດ້ວຍການຮ່ວມມືສອງຝ່າຍ ລະຫວ່າງກະຊວງ ປ້ອງກັນຄວາມສະຫງົບລາວ ແລະ ກະຊວງພາຍໃນມ້ຽນມາ ປະຈະປີ 2018. ພິທີຕ້ອນຮັບຢ່າງເປັນທາງການ ໄດ້ຈັດຂຶ້ນທີ່ກະຊວງປ້ອງກັນຄວາມສະຫງົບ ສປປລາວ ໃນຕອນບ່າຍຂອງວັນທີ 20 ມີນາ 2018 ນີ້.

ຈາກນັ້ນ, ຄະນະຜູ້ແທນຂັ້ນສູງກະຊວງປ້ອງກັນຄວາມສະຫງົບ ແຫ່ງ ສປປລາວ ແລະ ກະຊວງພາຍໃນ ສາທາລະນະລັດ ສະຫະພາບມ້ຽນມາ ໄດ້ເຂົ້າຮ່ວມກອງປະຊຸມລັດຖະມົນຕີ ຄັ້ງທີ 7 ວ່າດ້ວຍການຮ່ວມມືສອງຝ່າຍ ປະຈຳປີ 2018. ໂດຍການເປັນປະທານຮ່ວມຂອງ ພົນຕີ ສົມແກ້ວ ສີລາວົງ ລັດຖະມົນຕີກະຊວງປ້ອງກັນຄວາມສະຫງົບ ຫົວໜ້າຄະນະຜູ້ແທນກະຊວງປ້ອງກັນຄວາມສະຫງົບລາວ ແລະ ພົນໂທ ຈໍສະເວ ລັດຖະມົນຕີກະຊວງພາຍໃນ ຫົວໜ້າຄະນະຜູ້ແທນກະຊວງພາຍໃນມ້ຽນມາ.

ກອງປະຊຸມຫົວໜ້າຄະນະຜູ້ແທນທັງສອງກະຊວງ ໄດ້ລາຍງານສະພາບການປະຕິບັດໜ້າທີ່ ປົກປັກຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍທາງສັງຄົມ, ເພື່ອສ້າງເງື່ອນໄຂອໍານວຍຄວາມສະດວກໃຫ້ແກ່ການສ້າງສາພັດທະນາເສດຖະກິດ-ສັງຄົມ ກໍ່ຄືປະເທດຊາດໃຫ້ກັນ ແລະກັນຊາບ. ຈາກນັ້ນ ຄະນະຜູ້ແທນທັງສອງກະຊວງ ຍັງໄດ້ພ້ອມກັນທົບທວນຕີລາຄືນການປະສານສົມທົບແລກປ່ຽນຂໍ້ມູນຂ່າວສານ ແລະ ການຮ່ວມມືຈັດຕັ້ງປະຕິບັດບັນດາເນື້ອໃນບົດບັນທຶກກອງປະຊຸມວ່າດ້ວຍການຮ່ວມມືສອງຝ່າຍ ທີ່ລັດຖະມົນຕີທັງສອງກະຊວງໄດ້ລົງນາມຮ່ວມກັນໃນປີຜ່ານມາ. ພ້ອມທັງໄດ້ຄົ້ນຄວ້າປຶກສາຫາລື ແລະຄາດກະສະພາບການໃນຕໍ່ໜ້າ. ຈາກນັ້ນ, ກໍ່ໄດ້ພິຈາລະນາ ແລະ ຮັບຮອງເອົາເນື້ອໃນບົດບັນທຶກຂອງກອງປະຊຸມລັດຖະມົນຕີ ຄັ້ງທີ 7 ວ່າດ້ວຍການຮ່ວມມືສອງຝ່າຍ ລະຫວ່າງກະຊວງປ້ອງກັນຄວາມສະຫງົບລາວ ແລະ ກະຊວງພາຍໃນມ້ຽນມາ. ໃນຕໍ່ໜ້າ ໃນນັ້ນ ຄະນະຜູ້ແທນທັງສອງຝ່າຍໄດ້ຕົກລົງເຫັນເປັນເອກະພາບ ສືບຕໍ່ເພີ່ມທະວີປົກປັກຮັກສາຄວາມສະຫງົບ ແລະ ຄວາມມີສະຖຽນລະພາບຂອງທັງສອງປະເທດ; ສືບຕໍ່ເພີ່ມທະວີການຮ່ວມມືແລກປ່ຽນບົດຮຽນ; ແລກປ່ຽນຂໍ້ມູນຂ່າວສານ, ການສົ່ງເສີມກົນໄກຂອງຫ້ອງການປະສານງານຊາຍແດນ, ການຮ່ວມມືສະກັດກັ້ນ ແລະ ຕ້ານຢາເສບຕິດ, ການຮ່ວມມືຕ້ານການຄ້າມະນຸດ, ການສະກັດກັ້ນອາຊະຍາກຳຂ້າມຊາຍແດນ, ການຮ່ວມມືການຄວບຄຸມການເຂົ້າ-ອອກເມືອງຜິດກົດໝາຍ, ການຮ່ວມມືທາງດ້ານການສຶກສາ-ບຳລຸງກໍ່ສ້າງພະນັກງານ ແລະອື່ນໆ.

ພ້ອມນັ້ນ, ພົນຕີ ສົມແກ້ວ ສີລາວົງ ລັດຖະມົນຕີກະຊວງປ້ອງກັນຄວາມສະຫງົບລາວ ແລະ ພົນໂທ ຈໍສະເວ ລັດຖະມົນຕີກະຊວງພາຍໃນ ມ້ຽນມາ ໄດ້ຮ່ວມມືລົງນາມເຊັນບົດບັນທຶກກອງປະຊຸມ ເພື່ອເປັນການຢັ້ງຢືມເຖິງຜົນສຳເລັດຂອງກອງປະຊຸມຄັ້ງນີ້ ແລະທັງເປັນບ່ອນອີງໃຫ້ແກ່ບັນດາກອງປະຊຸມອ້ອມຂ້າງກະຊວງ ແລະ ຂັ້ນທ້ອງຖິ່ນທີ່ກ່ຽວຂ້ອງທັງສອງປະເທດ. ໃນການຈັດຕັ້ງປະຕິບັດບັນດາເນື້ອໃນບົດບັນທຶກກອງປະຊຸມໃຫ້ມີຜົນສຳເລັດ ແນໃສ່ເງື່ອນໄຂສະພາບແວດລ້ອມທີ່ດີ ທາງດ້ານວຽກງານປ້ອງກັນຄວາມສະຫງົບ ແລະ ຄວາມເປັນລະບຽບຮຽບຮ້ອຍທາງສັງຄົມ ແລະ ຄວາມຮັ່ງມີເຂັ້ມແຂງຂອງສອງປະເທດ.

Off

Comments are closed.