20th Nov2019

ລາວ-ຫວຽດນາມ ພົບປະແລກປ່ຽນບົດຮຽນກ່ຽວກັບ ການຄົ້ນຄວ້າ ຮຽບຮຽງປະຫວັດສາດ

by somchan

ກອງປະຊຸມພົບປະແລກປ່ຽນບົດຮຽນລະຫ່ວາງກົມຄົ້ນຄວ້າວິທະຍາສາດ ແລະ ປະຫັວດສາດ ກະຊວງປ້ອງກັນຄວາມສະຫົງບ ລາວ ແລະ ກົມວິທະຍາສາດ, ຍຸດທະສາດ ແລະ ປະຫວັດສາດ ກະຊວງຕຳຫຼວດ ຫວຽດນາມ ກ່ຽວກັບ ການຄົ້ນຄວ້າ ຮຽບຮຽງປະຫວັດສາດການເຄື່ອນໄຫວຂອງ ຄະນະຊ່ຽວຊານ ກະຊວງຕຳຫຼວດ ສສ ຫວຽດ ຢູ່ ສປປ ລາວ. ໃນວັນທີ 19 ພະຈິກ 2019 ນີ້, ຝ່າຍລາວນຳໂດຍ ພັອ ປອ ມາລາ ວິລະຈິດ ຫົວໜ້າກົມຄົ້ນຄວ້າວິທະຍາສາດ-ປະຫັວດສາດ ກະຊວງ ປ້ອງກັນຄວາມສະຫງົບລາວ, ຝ່າຍຫວຽດນາມໂດຍ ພົຈວ ໂດເລຈີ ຫົວໜ້າກົມວິທິຍາສາດ, ຍຸດທະສາດ ແລະ ປະຫັວດສາດ ກະຊວງ ຕຳຫຼວດຫວຽດນາມ, ພ້ອມຄະນະຜູ້ແທນທັງສອງຝ່າຍເຂົ້າຮ່ວມ.

ພັອ ປອ ມາລາ ວິລະຈິດ ຫົວໜ້າກົມຄົ້ນຄວ້າ ວິທະຍາສາດ-ປະຫັວດສາດ ກະຊວງ ປກສ ລາວ ໄດ້ລາຍງານສະພາບການເຄື່ອນໄຫວຈັດຕັ້ງປະຕິບັດ ການຄົ້ນຄວ້າ ຮຽບຮຽງປະຫວັດສາດການເຄື່ອນໄຫວ ຄະນະຊ່ຽວຊານ ກະຊວງຕຳຫຼວດ ສສ ຫວຽດນາມ ຢູ່ ສປປ ລາວ ປີ 1961-2016. ເພື່ອເປັນການທົບທວນຫວນຄືນສາຍພົວພັນມິດຕະພາບ ໃນການຊ່ວຍເຫຼືອເຊິ່ງກັນ ແລະ ກັນ ຂອງສອງຊາດ; ໃນໄລຍະຜ່ານມາ ສອງພັກ-ສອງລັດ ໄດ້ມີການຄົ້ນຄວ້າ ຮຽບຮຽງປະຫັວດສາດ ສາຍພົວພັນພິເສດລະຫ່ວາງ ລາວ-ຫວຽດນາມ, ຫວຽດນາມ-ລາວ ເວົ້າລວມ, ເວົ້າສະເພາະ ໃນຂົງເຂດວຽກງານປ້ອງກັນຄວາມສະຫງົບ, ໄດ້ໃຫ້ມີການຄົ້ນຄວ້າ ຮຽບຮຽງປະຫັວດສາດ ຄະນະຊ່ຽວຊານ ກະຊວງຕຳຫຼວດ ສສຫວຽດນາມ ຢູ່ ສປປ ລາວ ປີ 1961-2016 ເຊິ່ງເປັນການພົວພັນຮ່ວມມືຈັດຕັ້ງປະຕິບັດ ໃນຂົງເຂດວຽກງານການຄົ້ນຄວ້າສະຫຼຸບເຫດການປະຫວັດສາດ ຄັ້ງທີ 2 ລະຫ່ວາງກະຊວງ ປກສ ລາວ ແລະ ກະຊວງຕຳຫຼວດຫວຽດນາມ, ການຄົ້ນຄວ້າ ຮຽບຮຽງປະຫັວດສາດນີ້ ແມ່ນມີຄວາມໝາຍສຳຄັນຫຼາຍ ເພາະວ່າເປັນການທົບທວນ ແລະ ຮັດແໜ້ນຄວາມສາມັກຄີພິເສດ ລະຫ່ວາງສອງພັກ ສອງລັດ ກໍ່ຄືກະຊວງປ້ອງກັນຄວາມສະຫົງບ ລາວ ແລະ ກະຊວງຕຳຫຼວດຫວຽດນາມໃຫ້ເລິກເຊິ່ງ ທັງເປັນການຄົ້ນຄວ້າຊອກຫາຂໍ້ມູນພຶດຕິກຳຕົວຈິງ ຂອງຄະນະຊ່ຽວຊານ ກະຊວງຕຳຫຼວດຫວຽດນາມ ຢູ່ ສປປ ລາວ ໃນໄລຍະຜ່ານມາ ແລະ ເປັນການຕີລາຄາຜົນງານການເຄື່ອນໄຫວ ຂອງຄະນະຊ່ຽວຊານກະຊວງຕຳຫຼວດຫວຽດນາມ ໃນການຊ່ວຍເຫຼືອ ສປປ ລາວ ນັບແຕ່ໄລຍະຕໍ່ສູ້ປົດປ່ອຍຊາດ ກໍ່ຄືໄລຍະປົກປັກຮັກສາ ແລະ ສ້າງສາພັດທະນາປະເທດຊາດ ຈົນຮອດປີ 2016. ໃນໂອກາດດັ່ງກ່າວ, ຄະນະຜູ້ແທນທັງສອງຝ່າຍກໍ່ໄດ້ປຶກສາຫາລືກັນ ໃນການຈັດຕັ້ງປະຕິບັດ ຍົກໃຫ້ເຫັນຂໍ້ສະດວກ ແລະ ຂໍ້ຫຍຸ້ງຍາກ ພ້ອມທັງສະເໜີບັນຫາຕ່າງໆ ເພື່ອເຮັດໃຫ້ວຽກງານດັ່ງກ່າວມີຜົນສຳເລັດຕາມຄາດໝາຍທີ່ວາງໄວ້; ພ້ອມດຽວກັນນີ້ທັງສອງຝ່າຍກໍ່ໄດ້ເຊັນບົດບັນທຶກຮ່ວມກັນ.

 

 

Off

Comments are closed.