27th Mar2020

ສອງກະຊວງ ໄດ້ຮັບຊ່ວຍເຫຼືອໃນການປ້ອງກັນພະຍາດ ໂຄວິດ-19 ຄືໜ້າກາກອານະໄນຈຳນວນ 20.000 ອັນ

by somchan

ໃນວັນທີ 26 ມີນາ 2020 ນີ້, ທ່ານ ມາ ຮຸ້ຍຫາວ ປະທານບໍລິສັດ ເຄວີພີ-ຫົວເຫວີຍ ບໍລິການຄວາມ ປອດໄພ ຈໍາກັດ ສະມາຄົມພັດທະນາເສດຖະກິດອາຊີຈີນ ໄດ້ມອບຫນ້າກາກຊຸດປ້ອງກັນເຊື້ອພະຍາດຕ້ານ ໂຄວິດ-19 ຈໍານວນ 8 ແກັດ ໃຫ້ກະຊວງ ຍຸຕິທໍາ ແລະ ກະຊວງ ປ້ອງກັນຄວາມສະຫງົບ ໂດຍມີຕາງຫນ້າຄະນະນໍາແຕ່ລະກະຊວງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ທ່ານ ມາ ຮຸ້ຍຫາວ ພ້ອມດ້ວຍຄະນະ ກ່າວວ່າ: ການນໍາຫນ້າກາກຊຸດປ້ອງກັນຕ້ານການແພ່ລະບາດຂອງພະຍາດເຊື້ອຈຸລະໂລກ (ໂຄວິດ-19) ມາມອບໃນຄັ້ງນີ້, ລວມທັງຫມົດ 8 ແກັດ ມີ 20.000 ອັນ. ເຊິ່ງມອບໃຫ້ກະຊວງຍຸດຕິທໍາ ຈໍານວນ 4 ແກັດ ມີ 10.000 ອັນ, ຕາງຫນ້າຮັບ ໂດຍ ທ່ານ ໄຊສີ ສັນຕິວົງ ລັດຖະມົນຕີກະຊວງຍຸຕິທໍາ ແລະ ມອບໃຫ້ກະຊວງປ້ອງກັນຄວາມສະຫງົບ ຈໍານວນ 4 ແກັດ ມີ 10.000 ອັນ ຕາງໜ້າຮັບໂດຍ ພົຈວ ສຸວັນນີ ສີສຸພາບມີໄຊ ຮອງຫົວຫນ້າກົມໃຫຍ່ການເມືອງ ປກສ ພ້ອມຄະນະ. ທັງນີ້, ກໍເພື່ອມອບໃຫ້ທັງສອງກະຊວງນໍາໄປແຈກຢາຍໃຫ້ກັບພະນັກງານ, ລັດຖະກອນ ຕະຫຼອດຮອດປະຊາຊົນໃຫ້ທົ່ວເຖິງ ເພື່ອປ້ອງກັນ ແລະ ສະກັດກັ້ນບໍ່ໃຫ້ເຊື້ອພະຍາດແພ່ ລະບາດອອກສູ່ວົງກວ້າງ ຄືກັນກັບປະເທດອື່ນ ເນື່ອງຈາກວ່າ: ສປປ ລາວ ມີຜູ້ຕິດເຊື້ອທີ່ຍັງມີຈໍານວນຫນ້ອຍ ເມື່ອທຽບໃສ່ກັບປະເທດເພື່ອນບ້ານແລ້ວ ແລະ ຖ້າຫາກເຮົາມີການປ້ອງກັນທີ່ເຂັ້ມງວດ ກໍຈະບໍ່ເຮັດໃຫ້ມີການແພ່ລະບາດຂອງເຊື້ອພະຍາດອອກສູ່ວົງກວ້າງ ພ້ອມທັງຫຼຸດຜ່ອນການເສຍຊີວິດຂອງປະຊາກອນອີກດ້ວຍ.

 

ໂອກາດດຽວກັນ, ຄະນະນໍາທັງ 2 ກະຊວງ ກໍໄດ້ກ່າວສະແດງຄວາມຂອບໃຈມາຍັງທ່ານ ປະທານບໍລິສັດ ເຄວີພີ-ຫົວເຫວີຍ ບໍລິການຄວາມປອດໄພ ຈໍາກັດ ສະມາຄົມພັດທະນາເສດຖະກິດ ອາຊີຈີນ ທີ່ມີຄວາມເປັນຫ່ວງເປັນໄຍ ແລະ ໄດ້ນຳເອົາຫນ້າກາກປ້ອງກັນມາມອບໃຫ້ ເຊິ່ງຈະໄດ້ນໍາເອົາສິ່ງນີ້ ໄປແຈກຢາຍໃຫ້ເກີດປະໂຫຍດທີ່ສຸດ ແລະ ຫວັງ ວ່າໂອກາດຫນ້າ ຈະໄດ້ຮັບຄວາມຊ່ວຍເຫຼືອຕື່ມອີກ. ພ້ອມນີ້, ທັງ 2 ກະຊວງ ກໍໄດ້ມອບໃບກຽດຕິຄຸນ ໃຫ້ບໍລິສັດອີກດ້ວຍ.

Comments are closed.