22nd Nov2017

ສອງ​ກົມ​ຄຸມ​ຂັງ-​ດັດ​ສ້າງ ​ລາວ-​ກຳປູ​ເຈຍ ​ແລກປ່ຽນ​ວຽກ​ງານ​ວິຊາ​ສະ​ເພາະ

by somchan

ຄະນະ​ຜູ້​ແທນ​ກົມ​ຕຳຫຼວດ​ຄຸມ​ຂັງ-​ດັດ​ສ້າງ ກະຊວງ​ປ້ອງ​ກັນ​ຄວາມ​ສະຫງົບ ສປປ ລາວ ​ແລະ ຄະນະ​ຜູ້​ແທນ​ກົມ​ໃຫ່ຍຄຸມ​ຂັງ-​ດັດ​ສ້າງ ກະຊວງ​ພາຍ​ໃນ ​ແຫ່ງຣາຊະ​ອານະຈັກ ກຳປູ​ເຈຍ ​ໄດ້​ຈັດ​ກອງ​ປະຊຸມ​ແລກປ່ຽນ​ບົດຮຽນ​ວຽກ​ງານ​ວິຊາ​ສະ​ເພາະ ​ໃນ​ວັນ​ທີ 14 ພະຈິກ 2017 ທີ່​ນະຄອນຫຼວງ​ພະນົມ​ເປັນ ປະ​ເທດ​ກຳປູ​ເຈຍ; ຝ່າຍ​ລາວ ນຳ​ໂດຍ ພັອ ສົມ​ລິດ ດາວ​ຮຸ່ງ​ສຸລິ ຫົວໜ້າກົມ​ຕຳຫຼວດ​ຄຸມ​ຂັງ-​ດັດ​ສ້າງ ກະຊວງ​ປ້ອງ​ກັນ​ຄວາມ​ສະຫງົບ ​ແລະ ຝ່າຍ​ກຳປູ​ເຈ​ຍ ນຳ​ໂດຍ ພົອ ຈັນ ກິ​ເຊັງ ຫົວໜ້າກົມ​​ໃຫ່ຍ​ຄຸມ​ຂັງ-​ດັດ​ສ້າງ ກະຊວງ​ພາຍ​ໃນ ແຫ່ງຣາຊະ​ອານະຈັກ ກຳປູ​ເຈຍ ພ້ອມ​ດ້ວຍ​ຄະນະ​ຜູ້​ແທນ​ທັງ​ສອງ​ຝ່າຍ ​ເຂົ້າ​ຮ່ວມ.

​      ໃນ​ການ​ພົບ​ປະ​ແລກປ່ຽນ​ບົດຮຽນ​ດ້ານ​ວຽກ​ງານວິຊາ​ສະ​ເພາະວຽກ​ງານ​ຄຸມ​ຂັງ-​ດັດ​ສ້າງ​ໃນ​ຄັ້ງ​ນີ້ ຄະນະ​ຜູ້​ແທນ​​ສອງ​ຝ່າຍ​ໄດ້​ຜັດ​ປ່ຽນ​ກັນ​ຂື້ນ​ລານ​ງານການຈັດ​ຕັ້ງ​ປະຕິບັດ​ວຽກ​ງານ​ຄຸມ​ຂັງ-​ດັດ​ສ້າງ ​ໃນ​ໄລຍະ​ຜ່ານ​ມາ​ໃຫ້​ກັນຊາ​ບ ​ເພື່ອ​ນຳ​ເອົາ​ບັນຫາ​ທີ່​ເຫັນ​ວ່າ​ເປັນ​ຈຸດ​ອ່ອນ​ຂໍ້ຄົງຄ້າງ​ນຳ​ມາ​ຄົ້ນຄວ້າ ປຶກສາ​ຫາລື​ແກ້​ໄຂ​ໃຫ້​ດີ​ຂື້ນ​​ໃນ​ຕໍ່ໜ້າ ສຳລັບ​ໃນ​ຂົງ​ເຂດ​ວຽກ​ງານ​ກະຊວງ ປກສ ​ແຫ່ງ​ສປປ ລາວ.

ທ່ານ ພັອ ສົມ​ລິດ ດາວ​ຮຸ່ງ​ສຸລິ ​ໄດ້​ຍົກ​ໃຫ້​ເຫັນ​ສະພາບ​ຄວາມ​ສະຫງົບແລະຄວາມ​ເປັນ​ລະບຽບ​ຮຽບຮ້ອຍ​ໃນ​ສັງຄົມ​ຂອງ ສປປ ລາວ, ​ໂດຍ​ລວມ​ແລ້ວ ສະພາບ​ການທາງ​ດ້ານ​ການ​ເມືອງ ​ແມ່ນ​ມີ​ຄວາມ​ສະຖຽນ​ລະ​ພາບ​ດີ, ສັງຄົມ​ມີ​ຄວາມ​ສະຫງົບ ​ແລະ ປອດ​ໄພ​ໂດຍ​ພື້ນຖານ; ​ແຕ່​ຍັງ​ມີ​ບາງ​ປະກົດ​ການ​ຫຍໍ້​ທໍ້​ທີ່​ເກີດ​ຂື້ນ​ພາຍ​ໃນ​ສັງຄົມ ​ເປັນ​ຕົ້ນ​​ແມ່ນ​ບັນຫາ​ຢາ​ເສບ​ຕິດ, ລັກ​ຊັບ​ພົນລະ​ເມືອງ, ປຸ້ນ​ຈີ້, ຊິງ​ຊັບ, ຂີ້ລັກ​ງັດ​ແງະ, ການ​ຄ້າ​ມະນຸດ ​ແລະ ບັນຫາ​ອື່ນໆ. ທີ່​ກໍ່​ໃຫ້​ເກີດ​ຄວາມ​ບໍ່​ສະຫງົບ ​ແລະ ມີ​ຜົນ​ກະທົບ​ຕໍ່​ກັບ​ຂົງ​ເຂດ​ວຽກ​ງານ​ຄຸມ​ຂັງ-​ດັດ​ສ້າງ, ສະ​ແດງ​ອອກ​ໃນ​ໄລຍະ​ຜ່ານ​ມາ, ​ໄດ້​ມີ​ພວກ​ກຸ່ມ​ຄົນ​ບໍ່​ດີ​ທີ່​ຫວັງ​ເຂົ້າ​ມາ​ແຊກ​ຊ້ອນ, ທຳລາຍ​ມ້າງ​ເພ​ພັກ-​ລັດ ກໍ​ຄື​ໃນ​ຂົງ​ເຂດ​ຄ້າຍ​ຄຸມ​ຂັງ-​ດັດ​ສ້າງ ​ເພື່ອ​ກຳ​ເອົາ​ບັນດາ​ເຂດ​ຊ່ອງ​ວ່າງ​ນຳ​ໄປ​ໂຄສະນາ​ບິດ​ເບືອນ, ​ໃສ່​ຮ້າຍປ້າຍ​ສີ​ຕໍ່​ແນວທາງ​ນະ​ໂຍບາຍ​ຂອງ​ພັກ, ລະບຽບ​ກົດໝາຍ​ຂອງ​ລັດ ທີ່​ມັນ​ສະທ້ອນ​ເຖິງ​ວຽກ​ງານ​ຄຸມ​ຂັງ-​ດັດ​ສ້າງ ​ແລະ ສ້າງ​ຄວາມ​ເສຍ​ຫາຍ​ສູ່​ກົມ​ກອງ, ຕໍ່​ກັບ​ສະພາບ​ການ​ດັ່ງກ່າວ ຄະນະ​ພັກ​ກົມ​ຕຳຫຼວດ​ຄຸມ​ຂັງ-​ດັດ​ສ້າງ ກະຊວງ​ ປກສ ກໍ​ໄດ້​ເອົາ​ໃຈ​ໃສ່​ຢ່າງ​ຕັ້ງໜ້າ​ເຂົ້າ​ໃນ​ການ​ຊີ້​ນຳ-​ນຳພາ​ພະນັກງານ-​ນັກຮົບ​ຈັດ​ຕັ້ງ​ປະຕິບັດ​ວຽກ​ງານ​ວິຊາ​ສະ​ເພາະ​ຢ່າງ​ເຂັ້ມ​ງວດ, ​ເປັນ​ຕົ້ນ​ແມ່ນ​ປ້ອງ​ກັນ​ເວນຍາມ​ຄ້າຍ​ຄຸມ​ຂັງ, ຄຸ້ມ​ຄອງ​ນັກ​ໂທດ ​ແລະ ອື່ນໆ ​ໃຫ້​ມີ​ຄວາມ​ສະຫງົບ ​ແລະ ປອດ​ໄພ.

​ໃນ​ກອງ​ປະຊຸມຄະນະ​ຜູ້​ແທນ​ທັງ​ສອງ​ຝ່າຍ​ໄດ້​ເຫັນ​ດີ ທີ່​ຈະ​ສືບ​ຕໍ່​ຮ່ວມ​ມື​ກັນ​ແລ​ກປ່ຽນ​ບົດຮຽນ​ເຊິ່ງກັນ ​ແລະ ກັນ ກ່ຽວ​ກັບ​ລະບົບ​ການຈັດ​ຕັ້ງ​ພາຍ​ໃນ​ຂອງ​ກົມ​ຄຸມ​ຂັງ-​ດັດ​ສ້າງ, ການ​ຄຸ້ມ​ຄອງ​ສູນ​ບຳບັດ​ຜູ້​ຕິດ​ຢາ​ເສບ​ຕິດ, ການ​ນຳ​ບັດ​ປິ່ນປົວ, ວຽກງານ​ຄຸ້ມ​ຄອງ, ວຽກ​ງານ​ສຶກສາ​ອົບຮົມ ​ແລະ ວຽກ​ງານ​ຝຶກ​ອົບຮົມ​ວິຊາ​ຊີບ​ໃຫ້​ນັກ​ໂທດ, ການ​ຄຸ້ມ​ຄອງ​ຄົນ​ຕ່າງປະ​ເທດ ​ໂດຍ​ສະ​ເພາະ​ແມ່ນ​ນັກ​ໂທດ​ຕ່າງປະ​ເທດ​ທີ່​ໝົດ​ໂທດ ​ແຕ່​ບໍ່​ທັນ​ໄດ້​ຊຳລະ​ຄ່າ​ເສຍ​ຫາຍ​ທາງ​ແພ່ງ, ຄ່າ​ປັບ​ໃໝ ​ແລະ ກໍລະນີ​ນັກ​ໂທດ​ເສຍ​ຊີວິດ; ສືບ​ຕໍ່​ແລກປ່ຽນ​ຂໍ້​ມູນ​ກ່ຽວ​ກັບ​ນັກ​ໂທດ​ລາວ​ທີ່​ພວມ​ປະຕິບັດ​ໂທດ​ຢູ່ກຳ​ປູ​ເຈຍ ​ແລະ ນັກ​ໂທ​ດກຳປູ​ເຈຍ ພວມ​ປະຕິບັດ​ໂທດ​ຢູ່​ລາວ​ຢ່າງ​ຕໍ່​ເນື່ອງ ​ແລະ ບັນດາ​ນິຕິ​ກຳ​ຕ່າງໆ​ທີ່​ຮັບ​​ໃຊ້​ໃຫ້​ແກ່​ວຽກ​ງານ​ຄຸມ​ຂັງ-​ດັດ​ສ້າງ ​ເຊິ່ງການຢ້ຽມຢາມ​ແລກປ່ຽນ​ບົດຮຽນ​ໃນ​ຄັ້ງ​ນີ້ ​ແມ່ນ​ເລີ່​ມ​ແຕ່​ວັນ​ທີ 13-17 ພະຈິກ 2017 ຈຶ່ງ​ຈະ​ສຳ​ເລັດ.

Off

Comments are closed.