05th Feb2020

ສະຕິຊາດອັນສູງສົ່ງຂອງທົ່ວປວງຊົນ ແມ່ນຄວາມຮຽກຮ້ອງຕ້ອງການ ຂອງພາລະກິດປົກປັກຮັກສາ ແລະ ສ້າງສາພັດທະນາ ປະເທດຊາດ

by somchan

ປະ​ຈຸ​ບັນ ສະພາບ​ການ​ຂອງ​ໂລກ​ມີ​ການ​ຜັນ​ແປ​ໄປ​ຢ່າງ​ສະຫຼັບສັບ​ຊ້ອນ ເ​ຊິ່ງມີ​ທັງ​ອັນ​ດີທີ່ເອື້ອອຳນວຍ ​ແລະ​ ສິ່ງ​ທ້າ​ທ້າຍ​ທີ່ມີ​ຜົນ​ກະທົບ​​ຕໍ່ການ​ພັດ​ທະ​ນາ​ປະ​ເທດ​ຊາດ,​ ວິຖີ​ຊີວິດ ແລະ ສັງຄົມ​ລາວ​ຢ່າງຫຼີກ​ລ້ຽງບໍ່​ໄດ້, ເປັນຕົ້ນແມ່ນບັນຫາສົງຄາມກາງເມືອງຢູ່ບາງປະເທດ, ການກໍ່ການຮ້າຍ, ອາຊະຍາກຳຂ້າມຊາດ, ບັນຫາຂໍ້ຂັດແຍ່ງ ແລະ ວິ​ກິດ​ເສດຖະກິດ​ໂລກ​ທີ່ມີ​ຄວາມ​ຖົດຖອຍ, ​ການ​ຂາດ​ແຄນ​ອາຫານ,​ໂລກລະບາດ ​ແລະ ​ອື່ນໆ,

ດັ່ງນັ້ນ ມັນຈິ່ງຮຽກຮ້ອງໃຫ້ທົ່ວສັງຄົມ​ລາວ​​ຕ້ອງ​ມີ​ສະຕິຊາດອັນສູງສົ່ງ ​ແລະ ​ເອົາ​ຈິງ​ເອົາ​ຈັງ​ກັບ​ການ​ປູກ​ຈິດ​ສຳນຶກ​ອັນ​ດີງາມ​ຂອງຊາ​ດ, ຂອງ​ບັນພະບຸລຸດ​​​ ໂດຍ​ສະ​ເພາະຊາວໜຸ່ມ​ເຍົາວະ​ຊົນ ​ເພື່ອ​ສ້າ​ງພູມ​ຕ້ານທານ ​ແລະ ຫຼໍ່ຫຼອມ​ໃຫ້​ມີ​ນ້ຳ​ໃຈ​ຮັກ​ຊາດ, ຮັກບ້ານເກີດເມືອງນອນ, ມີຄວາມສາມັກຄີເປັນປຶກແຜ່ນ, ຮັກ​ ແລະ ມີຄວາມສຳນຶກຄວາມເປັນຄົນລາວທີ່ສູງສົ່ງ  –  ເຂັ້ມແຂງ ທີ່ຈະເຮັດ​ໃຫ້​ປວງ​ຊົນ​ລາວທັງ​ຊາດ ສາມາດຕໍ່ສູ້ຕ້ານຄວາມພະຍາຍາມແຊກແຊງທຸກຮູບແບບຈາກພາຍນອກ,  ຄວາມພະຍາຍາມລະເມີດອຳນາດອະທິປະໄຕ,  ຄວາມພະຍາຍາມທຳລາຍຄວາມສາມັກຄີ, ຄວາມຫມັ້ນຄົງ, ຄວາມສະຫງົບ – ປອດໄພ ຂອງອິດທິກຳລັງປໍລະປັກ ແລະພວກຄົນບໍ່ດີທີ່ມີຕໍ່ ສປປ ລາວ ເພື່ອເຮັດໃຫ້ການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ 10 ຂອງພັກ, ແຜນພັດທະນາເສດຖະກິດ – ສັງຄົມແຫ່ງຊາດ 5 ປີ ຄັ້ງທີ 8 ແລະ ອື່ນໆ ຂອງທົ່ວພັກ, ທົ່ວກຳລັງປະກອບອາວຸດ ແລະ ທົ່ວປວງຊົນລາວທັງຊາດ ໃນປີ 2020 ນີ້ ໄດ້ດຳເນີນໄປຢ່າງເປັນຂະບວນຟົດຟື້ນ, ກວ້າງຂວາງ ແລະ ມີຜົນສຳເລັດ.

ໃນປີ 2019 ຜ່ານມາ ເຖິງແມ່ນວ່າການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ບໍ່ສາມາດບັນລຸໄດ້ຕາມຄາດຫມາຍກໍຕາມ ແຕ່ໂດຍລວມແລ້ວເສດຖະກິດມະຫາພາກຂອງປະເທດລາວຍັງຢູ່ໃນທ່າຂະຫຍາຍຕົວຢ່າງຫມັ້ນທ່ຽງ, ການບໍລິຫານ,ຄຸ້ມຄອງລັດ,ຄຸ້ມຄອງເສດຖະກິດ-ສັງຄົມ ແມ່ນຢູ່ໃນລະບຽບ, ຫຼັກການ; ພ້ອມກັນນີ້ ປະເທດຊາດຍັງມີສະຖຽນລະພາບ ມີຄວາມຫມັ້ນຄົງ ມີຄວາມສະຫງົບ ທາງດ້ານການເມືອງ, ສັງຄົມມີຄວາມເປັນລະບຽບຮຽບຮ້ອຍ – ປອດໄພດີ; ປະຊາຊົນມີສະຕິຄວາມຕື່ນຕົວເຄົາລົບປະຕິບັດແນວທາງນະໂຍບາຍຂອງພັກ,ລັດຖະທຳມະນູນຂອງຊາດ, ກົດຫມາຍຂອງລັດ ແລະ ລະບຽບຫຼັກການຂອງບ້ານເມືອງ ພ້ອມທັງໄດ້ເປັນເຈົ້າການພັດທະນາຊີວິດການເປັນຢູ່ໃຫ້ນັບມື້ດີຂຶ້ນເລື້ອຍໆ ເຊິ່ງເປັນປັດໄຈສຳຄັນປະກອບສ່ວນເຂົ້າໃນການສ້າງເງື່ອນໄຂ ແລະ ສະພາບແວດລ້ອມທີ່ເອື້ອອຳນວຍໃຫ້ແກ່ການປົກປັກຮັກສາ ແລະ ສ້າງສາພັດທະນາປະເທດຊາດ.

ໃນປີ 2019 ຜ່ານມາ ສປປ ລາວ ກໍປະເຊີນກັບອຸປະສັກ, ບັນຫາທົດສອບທີ່ທ້າທາຍໜັກໜ່ວງ ຈາກການປ່ຽນແປງຂອງສະພາບແວດລ້ອມ-ດິນຟ້າອາກາດ ສົ່ງຜົນເຮັດໃຫ້ເກີດມີໄພພິບັດທາງທຳມະຊາດ ໂດຍສະເພາະແມ່ນຜົນກະທົບຈາກອິດທິພົນຂອງພາຍຸຕ່າງໆ ເຮັດໃຫ້ມີຝົນຕົກໜັກຕິດຕໍ່ກັນຫຼາຍວັນ ແລະ ເກີດໄພນ້ຳຖ້ວມ ສົ່ງຜົນກະທົບຕໍ່ຊີວິດການເປັນຢູ່ຂອງປະຊາຊົນຢູ່ ໃນຂອບເຂດທົ່ວປະເທດ; ໃນນີ້ ໜັກໜ່ວງທີ່ສຸດແມ່ນຢູ່ 4 ແຂວງພາກໃຕ້ ແລະ ອີກ 2 ແຂວງພາກກາງ ຄື : ແຂວງຈຳປາສັກ, ສາລະວັນ, ເຊກອງ, ອັດຕະປື, ສະຫວັນນາເຂດ ແລະ ຄຳມ່ວນ. ເຊິ່ງໄດ້ສ້າງຄວາມເສຍຫາຍໃຫ້ແກ່ພື້ນຖານເສດຖະກິດ-ສັງຄົມ, ພື້ນຖານການຜະລິດກະສິກຳ, ອຸດສາຫະກຳ,ຕະຫຼາດ, ອາຄານບ້ານເຮືອນ, ຊີວິດ-ສຸຂະພາບ, ສັດລ້ຽງ ແລະ ອື່ນໆ ມູນຄ່າມະຫາສານ; ແຕ່ຍ້ອນຄວາມເອົາໃຈໃສ່ຂອງພັກ-ລັດ, ອຳນາດການປົກຄອງ, ຄວາມສາມັກຄີຮ່ວມແຮງຮ່ວມໃຈຂອງປະຊາຊົນ ແລະ ການຊ່ວຍເຫຼືອຈາກບັນດາປະເທດເພື່ອນມິດ ໄດ້ເຮັດໃຫ້ ສປປ ລາວ ສາມາດຜ່ານພົ້ນວິກິດຕ່າງໆ ມາໄດ້ດ້ວຍດີ.

ເຖິງຢ່າງໃດກໍຕາມ ບໍ່ວ່າຈະເປັນຫມາກຜົນຂອງການປະຕິວັດ ຫຼື ການປົກປັກຮັກສາ ແລະ ການສ້າງສາພັດທະນາປະເທດຊາດ ກໍລ້ວນແຕ່ໄດ້ມາດ້ວຍຄວາມຫຍຸ້ງຍາກລຳບາກ ແລະ ຄວາມເສຍສະຫຼະ; ແຕ່ການປົກປັກຮັກສາ ແລະ ເສີມຂະຫຍາຍຫມາກຜົນທີ່ໄດ້ມາດ້ວຍຄວາມຫຍຸ້ງຍາກລຳບາກນັ້ນມັນຍິ່ງຮຽກຮ້ອງໃຫ້ທົ່ວພັກ, ທົ່ວລັດ, ທົ່ວກຳລັງປະກອບອາວຸດ ແລະ ທົ່ວປວງຊົນລາວທັງຊາດ ຕ້ອງໄດ້ເຊີດຊູສະຕິຄວາມເປັນຊາດທີ່ສູງສົ່ງ ເພື່ອພ້ອມກັນນຳເອົາປະເທດຊາດ ກ້າວຂຶ້ນສູ່ຈຸດຫມາຍຕາມເສັ້ນທາງສັງຄົມນິຍົມ ໂດຍສະເພາະການກໍ່ສ້າງຄວາມສຳນຶກ ​ແລະ ​ພູມ​ໃຈ​ໃນ​ຄວາມ​ເປັນຄົນ​ລາວ ເຊິ່ງປະກອບ​ດວ້ຍຫຼາຍ​ຊົນ​ເຜົ່າ ທີ່​ດຳລົງຊີວິດ ອາ​ໃສ​ຢູ່ໃນ​ຜືນແຜ່ນດິນ​ລາວ ​ແລະ ​ອາ​ໃສ​ຢູ່​ຕ່າງປະ​ເທດ; ຄວາມ​ສຳນຶກ ​ແລະ ​ຄວາມ​ພາກພູມ​ໃຈ​ທີ່​ໄດ້​ເກິ​ດ​ເປັນ​ຄົນ​ລາວ​ເຊີ່ງ​ຢູ່​ໃຕ້​ຮົ່ມ​ທຸງ ​ແລະ ​ການ​ນໍາພາ​ຂອງ​ພັກ​ປະຊາຊົນ​ປະຕິວັດ​ລາວ; ຄວາມ​ສຳນຶກວ່າປະ​ເທດ​ລາວມີປະຫວັດສາດການກໍ່ສ້າງ, ປົກປັກຮັກສາ, ການພັດທະນາ ທີ່ຍາວນານ ແລະ ມີປັດໄຈ, ເງື່ອນໄຂ,ຄວາມສາມາດ​ພັດທະນາ​ສັກ​ກາຍະ​ພາບ​ດ້ານ​ຕ່າງໆ​ໃຫ້​ເທົ່າ​ທັນ​ກັບ​ບັນດາ​ປະ​ເທດ​ຕ່າງໆ​ ໃນ​ພາກ​ພື້ນ ​ແລະ​ ໃນ​ໂລກ; ຄວາມສຳນຶກ​ຄວາມ​ເປັນ​ລາວ​ທີ່​ຮັກຄວາມ​ມີ​ອິດສະຫຼະພາບ​ເຊິ່ງບໍ່ພຽງ​ແຕ່​ການ​ມີ​ປະຊາທິປະໄຕ​ຂອງ​ຊາດ​ເທົ່າ​ນັ້ນ ​ແຕ່​ຍັງ​ລວມ​ເຖິງ​ການ​ທີ່​ບໍ່​ເປັນ​ຫົວ​ເມືອງ​ຂຶ້ນ​ຂອງໃຜ ທາງ​ດ້ານ​ເສດຖະກິດ, ​ການ​ເມືອງ, ​ສາມາດ​ສ້າງ​ຄວາມ​ສຳພັນ​ກັບ​ຜູ້​ອື່ນ​ໄດ້​ຢ່າງ​ມີ​ສັກ​ສີ ​ແລະ ​ສະ​ເໝີພາບ; ຕະຫຼອດຮອດຄວາມສໍານຶກ​ເຄົາລົບ​ສະ​ຖາ​ບັນ​ຂອງ​ຊາດ,ສາດສະໜາ,ບັນພະບຸລຸດຜູ້​ທີ່​ມີ​ຄຸນງາມຄວາມດີ​ຕໍ່​ປະ​ເທດ​ຊາດ, ສັງຄົມກໍ່​ຄື​ຕົນ​ເອງ; ຄວາມສຳນຶກ​ປະຊາທິປະ​ໄຕ ແລະ ​ບອບ​ສັງຄົມນິຍົມ ​ທີ່ເປັນ​ລະບອບ​ທີ່​ກ້າວໜ້າທີ່​ສຸດ​ຂອງ​ມວນ​ມະນຸດ​ໃນ​ການ​ປົກຄອງ ​ແລະ ​ການ​ພັດທະນາ​ປະ​ເທດ, ເຊິ່ງຈະ​ພັດທະນາ​ໄດ້​ດີ ​ແລະ ໝັ້ນຄົງ​ພຽງ​ໃດ​ແມ່ນ​ຂຶ້ນ​ຢູ່​ກັບ​​ຄົນ​ລາວ​ທຸກຄົນ; ​ການ​ໃຊ້​ສິດ​ໃນ​ວຽກງານ​ການ​ເມືອງ ກໍ​ເປັນໜຶ່ງ​ໃນ​ອົງ​ປະກອບ​ທີ່​ສຳຄັນ​ໃນ​ວຽກງານ​ການ​ພັດທະນາ​ປະ​ເທດ​ຊາດ ​ເພາະວຽກງານ​ການ​ເມືອງ​ ຄືພາລະກິດທີ່ພັກ, ປະເທດຊາດ ແລະ ປະຊາຊົນ ມອບຫມາຍໃຫ້ ດ້ວຍຄວາມໄວ້ເນື້ອເຊື່ອໃຈທີ່ສຸດ ແລະ ເຊື່ອຫມັ້ນວ່າຈະປະຕິບັດໜ້າທີ່​ຂອງ​ຕົນ​ເອງ​ຢ່າງ​ສຸ​ດຄວາມ​ສາມາດ, ດ້ວຍ​ຄວາມ​ຊື່ສັດ, ຖືກຕ້ອງ​ດີງາມ; ນອກນີ້ ຍັງມີຄວາມສຳນຶກ​ເຄົາລົບປະຕິບັດ ແລະ ຮັບຮູ້ເຂົ້າໃຈ ຕໍ່ສິດ-ພັນທະພື້ນຖານ​ ທີ່ໄດ້​ກຳນົດ​ໄວ້​ໃນ​ລັດຖະທຳ​ມະນູນ​ແຫ່ງ ສປປ ລາວ ລວມເຖິງກົດຫມາຍ ແລະ ລະບຽບການຕ່າງໆ ​ໃນ​ຖາ​ນະ​ພົນລະ​ເມືອງ​ລາວ; ຄວາມສໍານຶກຮັບ​ຮູ້ເຂົ້າໃຈຕໍ່​ສະພາບ​ບັນຫາ​ຂອງ​ສັງຄົມ​​ທີ່​ກຳລັງ​ເປັນ​ຢູ່​ ພ້ອມ​ທັງ​ຮ່ວມ​ກັນ​ຄົ້ນຄວ້າ ​ແລະ ​ຊອກ​ຫາ​ວິທີ​ທາງ​ທີ່​ເໝາະສົມ​ໃນ​ການ​ແກ້ໄຂ​ບັນຫາຕາມ​ບົດບາດ, ​ເວລາ ​ແລະ ​ໂອກາດ​ທີ່​ເໝາະສົມ ​ເປັນ​ຕົ້ນ​ບັນຫາ​ຢາ​ເສບ​ຕິດ, ອຸບັດ​ຕິ​ເຫດ, ບັນຫາ​ເສດຖະກິດ, ບັນຫາ​ຄວາມທຸກ​ຍາກ, ການ​ສໍ້​ລາດ​ບັງຫຼວງ, ບັນຫາ​ສິ່ງ​ແວ​ດລ້ອມຫຼື ໄພພິບັດຈາກທຳມະຊາດ ​ເຊິ່ງທຸກ​ຄົນ​ລ້ວນແຕ່ມີ​ສ່ວນ​ຮ່ວມ​ຮັບ​ຜົນ​ກະທົບ​; ດັ່ງນັ້ນ  ທຸກ​ຄົນ​ຕ້ອງຮັບ​ຮູ້​ເຂົ້າໃຈໜ້າທີ່ໃນ​ການ​ມີ​ສ່ວນ​ຮ່ວມ​​ແກ້​ໄຂ ຫມາຍຄວາມວ່າທຸກຄົນບໍ່ພຽງ​ແຕ່​ເປັນ​ຜູ້​ສ້າງຫຼືຕັ້ງ​ບັນຫາ​ເທົ່ານັ້ນ ​ແຕ່​ຈະ​ຕ້ອງ​ຮ່ວມ​ກັນ​ມີວິໄສທັດ ແລະ ຊອກຫາ​ຄຳ​ຕອບ​ໃນ​ທຸກ​ບັນຫາ; ໄປພ້ອມກັບການກໍ່ສ້າງຈິດສໍານຶກ​ໃນ​​ຄວາມ​ເປັນ​ລາວ​ ​ຄື: ນິຍົມ​​ໃຊ້​ຂອງ​ລາວ, ​ຮ່ວມ​ທະນຸ​ບຳລຸງສົ່ງ​ເສີມ ອະນຸລັກ ​ແລະ ​ເຜິ​ຍ​ແຜ່​ຂະ​ນົບ​ທຳນຽມປະ​ເພນີ ​ແລະ ສິລະປະ-​ວັດທະນະທຳ​ລາວ, ​ໃຊ້​ພາສາ​ລາວ​,ຮູ້ນຳເອົາ​ພູມ​ປັນຍາ​ຂອງ​ທ້ອງ​ຖິ່ນ ​ແລະ ​ຂອງ​ຊາດ​ລາວ​ມາ​ນຳ​ໃຊ້​ໃນ​ຊີວິດ​ປະຈຳ​ວັນ; ຕະຫຼອດຮອດການສ້າງຈິດສຳນຶກ​ໃນ​ການ​ຊອກ​ຮູ້​ຮໍ່າຮຽນ ​​ເພື່ອ​ສ້າງ​ສັງຄົມລາວ​ໃຫ້​ເປັນ​ສັງຄົມ​ແຫ່ງ​ການ​ຮຽນຮູ້, ສາມັກຄີ, ສັນຕິ​ສຸກ​ ໂດຍ​​ການ​ກ້າ​ຄິດ, ກ້າ​ຕັດສິນ​ໃຈ, ກ້າເຮັດໃນສິ່ງທີ່ຖືກຕ້ອງ, ກ້າຮັບຜິດຊອບ, ມີຄວາມດຸໝັ່ນ​, ສະ​ແຫວ​ງຫາ​​ຈິນຕະນະ​ການ ​ແລະ​ ໃຝ່ຝັນ​ໃນ​ຄວາມ​ສຳ​ເລັດ, ພູມ​ໃຈ ​ແລະ ​ເຫັນ​ຄຸນຄ່າ​ຂອງ​ຄວາມ​ຮູ້​; ພ້ອມທັງຮຽນຮູ້​ທີ່ຈະ​ເປັນ​ຜູ້​ຄິດ ​ແລະ ​ຜະລິດຫຼາຍກວ່າ​ເປັນ​ຜູ້​ບໍລິ​ໂພ​ກຢ່າງ​ຟຸມ​ເຟືອຍ; ນອກນີ້ ຍັງຕ້ອງມີຄວາມສຳນຶກ​ຮັກ​ຖິ່ນ​ຖານ ບ້ານເກີດເມືອງນອນ ເຊິ່ງ​ເປັນ​ສ່ວນໜຶ່ງຂອງ​ຄວາມ​ຮັກ​ຊາດ ເນື່ອງຈາກວ່າການ​ຮັກ​ຖິ່ນ​ຖານ​ກໍ່​ຄື​ຄວາມ​ພາກພູມ​ໃຈ​ໃນ​ຖິ່ນ​ຖານ​ທີ່​ເຮົາ​ອາ​ໃສດຳລົງຊີວິດ​ຢູ່, ທຳ​ມາ​ຫາ​ກິນ ​ແລະ​ ​ມີ​ສ່ວນ​ຮ່ວມ​ໃນ​ການ​ສ້າງສາ​ພັດທະນາ​ຖິ່ນ​ຖານ​ໃຫ້​​ເປັນ​ສັງຄົມທີ່ມີ​ຄວາມ​ເຂັ້ມ​ແຂງ; ພ້ອມກັນນີ້ກໍຕ້ອງ​ຮູ້​ພັດ​ທະ​ນາ​ຕົນ​ເອງ ທັງ​ກາຍ ​ແລະ ​ຈິດ​ໃຈ​ ເພື່ອນຳ​ໄປ​ສູ້​ການ​ພັດທະນາຄອບຄົວ, ພັດທະນາ​ການຈັດ​ຕັ້ງ, ສັງຄົມ ​ແລະ ​ປະ​ເທດ​ຊາດ​ໃຫ້​ມີ​ຄວາມ​ເຂັ້ມ​ແຂງ​.

ໃນຊຸມປີຕໍ່ໜ້າ ສ ປປ ລາວ ຍັງຈະປະເຊີນກັບບັນຫາສະພາບການຂອງໂລກທີ່ມີການຜັນແປໄປຢ່າງສະຫຼັບສັບຊ້ອນ ເຊິ່ງມີທັງອັນດີທີ່ເອື້ອອຳນວຍ ແລະ ສິ່ງທ້າທ້າຍທີ່ມີຜົນກະທົບຕໍ່ການພັດທະນາປະເທດຊາດ, ວິຖີຊີວິດ ແລະ ສັງຄົມລາວຢ່າງຫຼີກລ້ຽງບໍ່ໄດ້; ດັ່ງນັ້ນ ພາລະໜ້າທີ່ຂອງຄົນລາວທຸກຄົນ ກໍຍິ່ງໜັກໜ່ວງຍິ່ງຂຶ້ນ; ເພື່ອຕໍ່ສູ້ຕ້ານຄວາມພະຍາຍາມແຊກແຊງທຸກຮູບແບບຈາກພາຍນອກ,  ຄວາມພະຍາຍາມລະເມີດອຳນາດອະທິປະໄຕ,  ຄວາມພະຍາຍາມທຳລາຍຄວາມສາມັກຄີ, ຄວາມຫມັ້ນຄົງ, ຄວາມສະຫງົບ – ປອດໄພ ຂອງພວກຄົນບໍ່ດີທີ່ມີຕໍ່ ສປປ ລາວ; ສະນັ້ນ ມັນຈິ່ງຮຽກຮ້ອງໃຫ້ທົ່ວພັກ, ທົ່ວລັດ, ທົ່ວກຳລັງປະກອບອາວຸດ ແລະ ທົ່ວປວງຊົນລາວທັງຊາດ ຕ້ອງໄດ້ເຊີດຊູສະຕິຄວາມເປັນຊາດທີ່ສູງສົ່ງ ເພື່ອພ້ອມກັນນຳເອົາປະເທດຊາດກ້າວຂຶ້ນສູ່ຈຸດຫມາຍຕາມເສັ້ນທາງສັງຄົມນິຍົມຢ່າງໜັກແໜ້ນ.

Comments are closed.