18th Jun2018

ສະພາແຫ່ງຊາດພິຈາລະນາການຮັບຮອງ ຮ່າງກົດໝາຍວ່າດ້ວຍນາຍທະຫານ ກອງທັບປະຊາຊົນລາວ ສະບັບປັບປຸງ

by somchan

ການດຳເນີນກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ 8 ໃນຕອນເຊົ້າຂອງວັນທີ 14 ມິຖຸນາ 2018 ນີ້, ພາຍໃຕ້ການເປັນປະທານຂອງທ່ານ ແສງນວນ ໄຊຍະລາດ ຮອງປະທານສະພາແຫ່ງຊາດ. ໃນກອງປະຊຸມໄດ້ຮັບຟັງການສະເໜີ ຮ່າງກົດໝາຍວ່າດ້ວຍນາຍທະຫານ ກອງທັບປະຊາຊົນ ປະຕິວັດລາວ ສະບັບປັບປຸງ ສະເໜີໂດຍ ພົນໂທ ຈັນສະໝອນ ຈັນຍາລາດ ລັດຖະມົນຕີກະຊວງປ້ອງກັນປະເທດ. ເຊິ່ງທ່ານໄດ້ຍົກໃຫ້ເຫັນສະພາບການຈັດຕັ້ງປະຕິບັດກົດໝາຍໃນໄລຍະຜ່ານມາ, ເຫດຜົນ ແລະ ຄວາມຈຳເປັນໃນການປັບປຸງ, ສະພາບການຄົ້ນຄ້ວາ ແລະ ການປັບປຸງກົດໝາຍ, ໂຄງປະກອບ ແລະ ເນື້ອໃນທີ່ໄດ້ປັບປຸງກົດໝາຍ ແລະ ຄາດຄະເນຜົນໄດ້ຮັບຈາການປັບປຸງ. ການປັບປຸງກົດໝາຍໃນຄັ້ງນີ້ ແມ່ນເປັນການປັບປຸງບັນດາຫຼັກການ, ລະບຽບການ, ມາຕະການ, ແລະ ນະໂຍບາຍກ່ຽວກັບການຈັດຕັ້ງການເຄື່ອນໄຫວປະຕິບັດໜ້າທີ່ຂອງນາຍທະຫານໃຫ້ສອດຄ່ອງກັບສະພາບການເຕີບໃຫຍ່ຂະຫຍາຍຕົວຂອງກອງທັບປະຊາຊົນລາວ ຕາມຄວາມຮຽກຮ້ອງຕ້ອງການຂອງການພັດທະນາໃນໄລຍະໃຫມ່ ເພື່ອເຊື່ອມໂຍງກັບພາກພື້ນ ສາກົນ ໂດຍສພເພາະແມ່ນປະເທດເພື່ອມິດຍຸດທະສາດ ໃຫ້ມີຄວາມໜັກແໜ້ນເຂັ້ມແຂງ, ເປັນການກຳນົດທີ່ຕັ້ງພາລະບົດບາດ, ໜ້າທີ່, ຄວາມຮັບຜິດຊອບ, ສິດ ແລະ ພັນທະ, ໜ້າທີ່ຕຳແໜ່ງ, ຂັ້ນ, ຊັ້ນຂອງນາຍທະຫານໃຫ້ມີຄວາມເໝາະສົມ, ລະອຽດ, ຈະແຈ້ງ, ເຂົ້າໃຈງ່າຍ ແລະ ສາມາດຈັດຕັ້ງປະຕິບັດໄດ້.

ກົດໝາຍວ່າດ້ວຍນາຍທະຫານກອງທັບປະຊາຊົນລາວ ສະບັບປີ 2004 ມີແຕ່ໝວດ ແລະ ມາດຕາ, ສ່ວນສະບັບປັບປຸງປະກອບມີ 5 ພາກ, 8 ໝວດ, 50 ມາດຕາ, ໃນນີ້, ຮັກສາໄວ້ 10 ມາດຕາ ສ້າງໃຫມ່ 19 ມາດຕາ, ປັບປຸງ 21 ມາດຕາ.

ຫຼັງຈາກນັ້ນ, ປະທານກອງປະຊຸມໄດ້ເຈາະຈິ້ມ ແລະ ໃຫ້ທິດຊີ້ນຳ ເພື່ອເປັນບ່ອນອີງ ໃຫ້ບັນດາສະມາຊິກສະພາແຫ່ງຊາດ ປະກອບຄຳເຫັນໃສ່ຮ່າງກົດໝາຍສະບັບດັ່ງກ່າວ, ເພື່ອໃຫ້ມີເນື້ອໃນຄົບຖ້ວນສົມບູນ. ໃນນີ້, ທ່ານນາງ ໃບຄຳ ຂັດຕິຍັດ ສະມາຊິກສະພາແຫ່ງຊາດ ເຂດເລືອກຕັ້ງທີ 15 ແຂວງຈຳປະສັກ ໄດ້ປະກອບຄຳເຫັນໃສ່ມາດຕາ 19 ວ່າດ້ວຍອາຍຸກະສຽນປະດັບຊັ້ນ, ເລື່ອນຊັ້ນ, ປະດັບທຽບຊັ້ນ, ເລື່ອນທຽບຊັ້ນ ໃຫ້ນາຍທະຫານແຕ່ລະຂັ້ນ, ມາດຕາ 25 ການກຳນົດ ຊັ້ນໃສ່ຕຳແໜ່ງບັນຊາຂອງນາຍທະຫານ.

ແລະ ທ່ານນາງເກສອນ ແສງຍະວົງ ສະມາຊິກສະພາແຫ່ງຊາດເຂດເລືອກຕັ້ງທີ 30 ແຂວງຫຼວງນ້ຳທາໄດ້ປະກອບຄຳເຫັນໃສ່ມາດຕາທີ 5 ຫຼັກການພຶ້ນຖານໃນການຄຸ້ມຄອງນາຍທະຫານ, ມາດຕາ 6 ການປົກປ້ອງນາຍທະຫານ ແລະ ມາດຕາທີ 19.

ພາຍຫຼັງ ບັນດາສະມາຊິກສະພາແຫ່ງຊາດປະກອບຄຳຄິດຄຳເຫັນໃສ່ຮ່າງກົດໝາຍສະບັບດັ່ງກ່າວແລ້ວ. ປະທານກອງປະຊຸມໄດ້ສະຫຼຸບສັງລວມການປະກອບຄຳເຫັນ ແລະ ເໜີໃຫ້ສະມາຊິກສະພາແຫ່ງຊາດລົງຄະແນນສຽງຮັບຮອງເອົາກົດໝາຍສະບັບດັ່ງກ່າວ.

Off

Comments are closed.