05th Mar2019

ສະຫະພັນແມ່ຍິງກະຊວງ ປກສ ໄດ້ຈັດຕັ້ງ ປາຖະກະຖາວັນແມ່ຍິງສາກົນ ຄົບຮອບ 109 ປີ

by somchan

ສະຫະພັນແມ່ຍິງກະຊວງປ້ອງກັນຄວາມສະຫງົບ ໄດ້ຈັດຕັ້ງປາຖະກະຖາວັນແມ່ຍິງສາກົນ ຄົບຮອບ 109 ປີ ຄືວັນທີ່ 8 ມີນາ 1910- 8 ມີນາ 2019. ໃນວັນທີ່ 5 ມີນານີ້ ໂດຍການເປັນກຽດເຂົ້າຮ່ວມຂອງ ພົຕ ປອ ສົມຫັວງ ທຳມະສິດ ຮອງລັດຖະມົນຕີກະຊວງປ້ອງກັນຄວາມສະຫງົບ, ພົຈວ ອາລູ ວາລີຊື່ ຫົວໜ້າກົມໃຫຍ່ການເມືອງ ຜູ້ຊີ້ນຳອົງການຈັດຕັ້ງມະຫາຊົນຂັ້ນກະຊວງ, ມີຄະນະປະທານສະຫະພັນແມ່ຍິງກະຊວງ ປກສ, ແຂກຖືກເຊີນ ແລະ ສະຫະພັນແມ່ຍິງບັນດາກົມກອງອ້ອມຂ້າງກະຊວງເຂົ້າຮ່ວມ.

ພັອ ນາງ ວັດຊະລີ ສິດທິລືໄຊ ຄະນະບໍລິຫານງານສູນກາງສະຫະພັນແມ່ຍິງລາວ ປະທານສະຫະພັນແມ່ຍິງກະຊວງປ້ອງກັນຄວາມສະຫົງບ ໄດ້ເລົ່າຄືນປະຫວັດຄວາມເປັນມາຂອງວັນແມ່ຍິງສາກົນໄດ້ກຳເນີດຂຶ້ນໃນທ່າມກາງສະພາບເສດຖະກິດຂອງພວກສັກດີນາ ແລະ ນາຍທືນຂະຫຍາຍຕົວ, ເມື່ອໂຮງຈັກ, ໂຮງງານອຸດສະກະກຳຂອງນາຍທຶນຂະຫຍາຍຕົວ ມັນໄດ້ສ້າງຄວາມຮັ່ງມີໃຫ້ແກ່ພວກນາຍທຶນ, ແຕ່ຊ້ຳພັດຍິ່ງເພີ່ມຄວາມທຸກຍາກລຳບາກໃຫ້ແກ່ຊາວຜູ້ອອກແຮງງານ ໂດຍສະເພາະແມ່ນກຳມະກອນຍິງ ພາຍໃຕ້ລະບອບສັກດີນາ, ນາຍທຶນ, ແມ່ຍິງຖືກກົດຂີ່ຂູດຮີດຢ່າງໜັກໜ່ວງ, ເຮັດວຽກຫຼາຍຊົ່ວໂມງແຕ່ໄດ້ຮັບຄ່າຈ້າງແຮງງານດ້ວຍລາຄາຖືກ, ເຮັດວຽກບໍມີການຮັບປະກັນ, ບໍ່ມີລະບອບປົກປັກຮັກສາສຸຂະພາບຂອງແມ່ຍິງ ແລະ ເດັກນ້ອຍ, ນອກຈາກນັ້ນແມ່ຍິງຍັງຖືກດູຖູກໝິ່ນປະໝາດ, ຖືເປັນຄືສິນຄ້າ, ຖືກເຕະຕີ, ຖຶກຂົ່ມຂືນທຳສຳເລົາ ແລະ ຖືກໄລ່ອອກຈາກວຽກໃນເວລາຖືພາ, ເວລາເກີດລູກ ຫລື ເວລາເຈັບເປັນ ບໍ່ໄດ້ຮັບການປິ່ນປົວ, ຕໍ່ໜ້າສະພາບການ ແລະ ຄວາມທຸກທໍລະມານດັ່ງກ່າວ ກຳມະກອນແມ່ຍິງ, ຈຶ່ງໄດ້ສາມັກຄີກັນລຸກຂຶ້ນຕໍ່ສູ້, ທວງໃຫ້ພວກນາຍທຶນ,ຊື່ງແມ່ນເຈົ້າຂອງໂຮງຈັກໂຮງງານຕ້ອງແກ້ໄຂຊີວິດການເປັນຢູ່ໃຫ້ເຂົາເຈົ້າ. ໃນວັນທີ່ 8 ມີນາ 1908 ແມ່ຍິງຈຳນວນໜື່ງໝື່ນກ່ວາຄົນໄດ້ເດີນຂະບວນຢູ່ເມືອງນິວຢອກ ປະເທດສະຫະລັດອາເມລິກາເພື່ອທວງໃຫ້ນາຍທຶນຫຼຸດຜ່ອນຊົ່ວໂມງເຮັດວຽກ, ຢຸດເຊົາການຂູດຮີດແຮງງານເດັກ ແລະ ທວງໃຫ້ແມ່ຍິງມີສິດໃນການອອກສຽງເລືອກຕັ້ງ ແລະ ການຮັບສະໝັກເລືອກຕັ້ງ, ປີ 1910 ຂະບວນການຕໍ່ສູ້ຂອງແມ່ຍິງໄດ້ແຜ່ຂະຫຍາຍກ້ວາງອອກໄປສູ່ປະເທດນາຍທຶນ ຢູ່ທະວີບເອີລົບ, ກອງປະຊຸມສາກົນກ່ຽວກັບບັນຫາແມ່ຍິງຄັ້ງທຳອິດໄດ້ຈັດຂຶ້ນຢູ່ນະຄອນຫຼວງປະເທດເດນມາກ, ກອງປະຊຸມດັ່ງກ່າວໄດ້ຕົກລົງຮັບຮອງເອົາວັນທີ່ 8 ມີນາ ຂອງທຸກໆປີເປັນວັນແມ່ຍິງສາກົນ. ວັນດັ່ງກ່າວໄດ້ເປັນເຫດການ ການເມືອງທີ່ສຳຄັນ, ເປັນຂີດໝາຍແຫ່ງໄຊຊະນະອັນພື້ນຖານຂອງຂະບວນການແມ່ຍິງສາກົນ ໃນການຕໍ່ສູ້ຂອງແມ່ຍິງເພື່ອປົດປ່ອຍຕົນເອງ ແລະ ທວງໃຫ້ມີສິດສະເໝີພາບ ປະຊາທິປະໄຕ ຄືກັນກັບຜູ້ຊາຍ, ຢ່າງຮອບດ້ານ.

 

 

 

Off

Comments are closed.