14th Jan2019

ສະຫະພັນແມ່ຍິງ ກະຊວງ ປກສ ໄດ້ປາຖະ ກະຖາວັນສ້າງຕັ້ງສະຫະພັນແມ່ຍິງກຳລັງ ປ້ອງກັນຄວາມສະຫງົບ ຄົບຮອບ 53 ປີ

by somchan

ສະຫະພັນແມ່ຍິງ ກະຊວງປ້ອງກັນຄວາມສະຫງົບ ໄດ້ປາຖະກະຖາ ວັນສ້າງຕັ້ງສະຫະພັນແມ່ຍິງ ກຳລັງປ້ອງກັນຄວາມສະຫງົບ ຄົບຮອບ 53 ປີ ໃນວັນທີ 11 ມັງກອນ ນີ້ ໂດຍການເປັນກຽດເຂົ້າຮ່ວມ ພົຈວ ອາລູ ວາລືຊື່ຄະນະພັກກະຊວງ ຫົວໜ້າກົມໃຫ່ຍການເມືອງ ປ້ອງກັນຄວາມສະຫງົບ ຜູ້ຊີ້ນຳອົງການຈັດຕັ້ງມະຫາຊົນກະຊວງ, ມີຄະນະສະຫະພັນແມ່ຍິງກະຊວງ, ບັນດາກົມກອງອ້ອມຂ້າງເຂົ້າຮ່ວມ.

ພັທ ນ. ສົມພອນ ແສງຄຳຢອງ ຮອງປະທານສະຫະພັນແມ່ຍິງ ກະຊວງປ້ອງກັນຄວາມສະຫງົບ ໄດ້ເລົ່າປະຫວັດມູນເຊື້ອການກຳເນີດເຕີບໃຫ່ຍຂອງສະຫະພັນແມ່ຍິງ ກຳລັງປ້ອງກັນຄວາມສະຫງົບປະຊາຊົນ ຄືວັນທີ 9 ມັງກອນ 1966 ແມ່ນວັນສ້າງຕັ້ງສະຫະພັນແມ່ຍິງ ກຳລັງປ້ອງກັນຄວາມສະຫງົບ ເຊິ່ງເປັນວັນທີ່ມີຄວາມໝາຍຄວາມສຳຄັນທາງດ້ານປະຫວັດສາດຂອງແມ່ຍິງໃນກຳລັງປ້ອງກັນຄວາມສະຫງົບ ແລະ ຕິດພັນກັບມູນເຊື້ອຂອງຊາດ, ຂອງພັກຂອງກຳລັງປ້ອງກັນຄວາມສະຫງົບປະຊາຊົນ, ນັບແຕ່ມື້ສ້າງຕັ້ງເຖິງປະຈຸບັນສະຫະພັນແມ່ຍິງກຳລັງປ້ອງກັນຄວາມສະຫງົບໄດ້ປະກອບສ່ວນຢ່າງຫຼວງຫຼາຍ ແລະ ຄຽງບ່າ-ຄຽງໄຫຼ່ກັບເພດຊາຍອຸທິດເຫື່ອແຮງ, ສະຕິປັນຍາເພື່ອພາລະກິດຕໍ່ສູ້ປົດປ່ອຍຊາດຕໍ່ສູ້ປາບປາມພວກອິດທິກຳລັງປໍລະປັກ, ສາມາດປົກປັກຮັກສາຄວາມສະຫງົບຂອງປະເທດຊາດ ແລະ ຄວາມເປັນລະບຽບຮຽບຮ້ອຍຂອງສົງຄົມ, ປົກປັກຮັກສາຊີວິດ ແລະ ຜົນປະໂຫຍດອັນຊອບທຳຂອງປະຊາຊົນລາວບັນດາເຜົ່າ, ປົກປັກຮັກສາ ແລະ ສ້າງສາພັດທະນາປະເທດຊາດກໍ່ຄືພັດທະນາກຳລັງປ້ອງກັນຄວາມສະຫງົບ ແລະ ພັດທະນາແມ່ຍິງກຳລັງປ້ອງກັນຄວາມສະຫງົບ ຕະຫຼອດໄລຍະ 53 ປີຜ່ານມາ.ຈາກພຶດຕິກຳຕົວຈິງຕະຫຼອດໄລຍະຜ່ານມາ ສະຫະພັນແມ່ຍິງກຳລັງປ້ອງກັນຄວາມສະຫງົບໄດ້ມີມູນເຊື້ອອັນດີງາມມີຄວາມບໍລິສຸດ, ຈົງຮັກພັກດີຕໍ່ພັກຕໍ່ປະເທດຊາດຕໍ່ປະຊາຊົນ, ມີນ້ຳໃຈເສຍສະຫຼະສູງສົ່ງ, ອົດທົນຜ່ານຜ່າຄວາມຫຍຸ້ງຍາກ, ອົງອາດກ້າຫານ ແລະ ເດັດດ່ຽວຕໍ່ສູ້ບໍ່ຍອມຈຳນົນ, ປະຕິບັດມະຕິ, ຄຳສັ່ງ ແລະ ລະບຽບວິໄນເຂັ້ມງວດ, ມີນ້ຳໃຈເອື້ອເຟື້ອເພື່ອແຜ່ຮັກແພງຊ່ວຍເຫຼືອເຊິ່ງກັນ ແລະ ກັນ, ສາມັກຄີພາຍໃນແໜ້ນແຟ້ນແລະສາມັກຄີກັບສາກົນຢ່າງຫວ້າງຂວາງ.

Off

Comments are closed.