14th Nov2017

ເລຂາທິການໃຫ່ຍຄະນະກຳມະການສູນກາງ ພັກກອມມູນິດຈີນປະທານປະເທດ ສປ ຈີນ ຢ້ຽມຢາມທາງລັດຖະກິດ ສ ປ ປ ລາວ

by somchan

​ໂດຍ​ຕອບ​ສະໜອງ ​ຕາມ​ການ​ເຊີນ ​ຂອງ ສະຫາຍ ບຸນ​ຍັງ ວໍລະ​ຈິດ, ​ເລາ​ຂາ​ທິການ​ໃຫ່ຍ ຄະນະ​ບໍລິຫານ​ງານ​ ສູ​ນກາ​ງ ພັກ​ປະຊາຊົນ ປະຕິບັດ​ລາວ ປະທານ ​ປະ​ເທດ ​ແຫ່ງ​ ສາທາລະນະ​ລັດ ປະຊາທິປະ​ໄຕ ປະຊາຊົນ​ລາວ, ສະຫາຍ ສີ ຈິ້ນ​ຜິ​ງ ​ເລຂາທິການ​ໃຫ່ຍ ຄະນະ​ກຳມະການ ​ສູນ​ກາງ​ພັກ​ ກອມ​ມູນິ​ດຈີນ ປະທານ​ປະ​ເທດ ສປ ຈີນ ພ້ອມດ້ວຍ​ຄະນະ​ ຜູ້​ແທນ​ຂັ້ນ​ ສູງ​ພັກ, ລັດ ​ແຫ່ງ​ ສາທາລະນະ​ລັດ ປະຊາຊົ​ນຈີນ ​ໄດ້​ເດີນທາງ​ ມານະ​ຄອນ​ຫຼວງ​ວຽງ​ຈັນ ​ເພື່ອຢ້ຽມຢາມ​ ທາງ​ລັດຖະກິດ ສປປ ລາວ ​ໃນ​ລະຫວ່າງ​ ວັນ​ທີ 13-14 ພະຈິກ 2017.

 

ຕ້ອນຮັບ​ສະຫາຍ​ເລຂາ​ທິການ​ໃຫ່ຍ ສີ ຈິ້ນ​ຜິ​ງ ​ແລະ ຄະນະ, ​ໃນ​ຕອນ​ບ່າຍ​ຂອງ​ວັນ​ທີ 13 ພະຈິກ ທີ່​ສະໜາມ​ບິນ​ສາກົນ​ວັດ​ໄຕ, ມີ​ສະຫາຍ ພັນ​ຄຳ ວິພາ​ວັນ, ກຳມະການ​ກົມ​ການ​ເມືອງ​ສູນ​ກາງ​ພັກ, ຜູ້​ປະຈຳການ​ຄະນະ​ເລຂາ​ທີ່​ການ​ສູນ​ກາງ​ພັກ, ຮອງ​ປະທານ​ປະ​ເທດ ​ແຫ່ງ ສປປ ລາວ ພ້ອມ​ດ້ວຍ​ບັນດາ​ສະຫາຍ​ໃນ​ຄະນະ​ຕ້ອນຮັບ​ຂອງ​ຝ່າຍ​ລາວ, ມີ​ເອກ​ອັກຄະ​ລັດຖະທູດ ສປ ຈີນ , ຊາວ​ໜຸ່ມ, ​ເຍົາວະ​ຊົນ, ນັກ​ສຶກສາລາ​ວ ​ແລະ ມວນ​ຊົນ​ຊາວ​ນະຄອນຫຼວງ​ວຽງ​ຈັນ ​ແລະ ຊາວ​ຈີນ ​ເພື່ອ​ຂ່ຳນັບ​ຊົມ​ເຊີຍ​ການ​ເດີນທາງ​ມາ​ເຖິງ​ນະຄອນຫຼວງ​ວຽງ​ຈັນ ຂອງ​ຄະນະ​ຢ່າງ​ຄືກ​ຄື້ນຕາມ​ເສັ້ນທາງ ຈາກ​ສະໜາມ​ບິນ​ຫາ​ໂຮງ​ແຮມ​ແລນ​ມາກ.

ພິທີ​ຕ້ອນຮັບ ສະຫາຍ ສີ ຈິ້ນ​ຜິ​ງ ພ້ອມ​ດ້ວຍ​ຄະນະ​ຜູ​ເທ​ນຂັ້ນ​ສູງ​ພັກ, ລັດ ສປ ຈີນ ຢ່າງ​ເປັນ​ທາງ​ການ ​ໄດ້​ຈັດ​ຂື້ນ​ຢ່າງ​ສົມ​ກຽດ ທີ່​ທຳນຽບປະທານ​ປະ​ເທດ ​ໃນ​ຕອນ​ບ່າຍ​ຂອງ​ວັນ​ທີ 13 ພະຈິກ 2017 ​ໂດຍ​ສະຫາຍ​ເລຂາທິການ​ໃຫ່ຍ ບຸນ​ຍັງ ວໍ​ລະຈິດ ຊຶ່ງ​ມີ​ບັນດາ​ສະຫາຍ​ການ​ນຳ​ຂັ້ນ​ສູງ ພັກ-​ລັດ ຂອງ ສປປ ລາວ ​ເຂົ້າ​ຮ່ວມ​ຢ່າງ​ພ້ອມພຽງ. ສະຫາຍ ບຸນ​ຍັງ ວໍລະ​ຈິດ ​ໄດ້​ນຳພາ​ສະຫາຍ​ເລຂາທິການ​ໃຫ່ຍ ສີ ຈິ້ນ​ຜິ​ງ ​ໄປ​ຍັງ​ແທ່ນ​ກຽດຕິຍົດ ​ເພື່ອ​ເຄົາລົບ​ທຸງຊາດ​ຈີນ, ລາວ ຕາມ​ລຳດັບ; ຕໍ່​ຈາກ​ນັ້ນ ສະຫາຍ ບຸນ​ຍັງ ວໍລະ​ຈິດ ​ແລະ ສະຫາຍ ສີ ຈິ້ນ​ຜິ​ງ ຍ່າງ​ກວດ​ແຖວ​ທະຫານ​ກອງ​ກຽດຕິຍົດ​ກອງທັບ​ປະຊາຊົນ​ລາວ ​ແລະ ຜູ້ນຳ​ທັງ​ສອງ​ສະຫາຍ​ໄດ້​ຮັບ​ການ​ແນະນຳ​ຕໍ່ ຄະນະຕ້ອນຮັບທາງ​ການ​ຝ່າຍ ສປປ ລາວ ​ແລະ ຄະນະ​ຜູ້​ແທນ​ຂັ້ນ​ສູງ​ຂອງ ສປ ຈີນ. ພາຍ​ຫຼັງ​ສຳ​ເລັດ​ພິທີ​ຕ້ອນຮັບ​ຢ່າງ​ເປັນ​ທາງ​ການ, ສະຫາຍ ບຸນ​ຍັງ ວໍລະ​ຈິດ ​ແລະ ສະຫາຍ ສີ ຈິ້ນ​ຜິ​ງ ​ໄດ້​ນຳພາ​ຄະນະ​ຜູ້​ແທນ​ຂັ້ນ​ສູງ​ພົບ​ປະ​ສອງ​ຝ່າຍ, ຊຶ່ງ​ຈັດ​ຂື້ນ​ຢູ່​ຫ້ອງ​ປະຊຸມ ທີ່​ທຳນຽບປະທານ​ປະ​ເທດ ການ​ຢ້ຽມຢາມ​ທາງ​ລັດຖະກິດ ສປປ ລາວ ຂອງ​ສະຫາຍ​ເລຂາ​ທິການ​ໃຫ່ຍ ສີ ຈິ້ນ​ຜິ​ງ ​ໃນ​ຄັ້ງ​ນີ້, ​ເປັນ​ຂີດ​ໝາຍ​ປະຫວັດສາດ​ສຳຄັນ​ແຫ່ງ​ການ​ຮັດ​ແໜ້ນ​ສາຍ​ພົວພັນ ​ແລະ ​ເສີມ​ຂະຫຍາຍ​ການ​ເປັນ​ຄູ່​ຮ່ວມ​ຍຸດ​ທະ​ສາດ​ຮອບດ້ານ​ໜັ້ນຄົງ​ຍາວ​ນານ ທີ່​ມີ​ມູນ​ເຊື້ອ​ແຫ່ງ​ມິດຕະພາບ ​ແລະ ການ​ຮ່ວມ​ມື​ອັນ​ໜັກ​ແໜ້ນ​ຍາວ​ນານ​ມາ​ແລ້ວ​ນັ້​ນ​ໃຫ້​ສືບ​ຕໍ່​ຂະຫຍາ​ຍຕົວຢ່າງ​ບໍ່​ຢຸດ​ຢັ້ງ.

​ໃນ​ການ​ພົບ​ປະ​ຄັ້ງ​ນີ້, ສະຫາຍ ບຸນ​ຍັງ ວໍລະ​ຈິດ ​ໄດ້​ກ່າວ​ສະ​ແດງ​ຄວາມ​ຍິນ​ດີ​ຕ້ອນຮັບ ສະຫາຍ ສີ ຈິ້ນ​ຜິ​ງ ພ້ອມ​ດ້ວຍ​ຄະນະ​ຜູ້​ແທນ​ຂັ້ນ​ສູງ​ພັກ-​ລັດ ສປ ຈີນ ດ້ວຍ​ໄມຕີ​ຈິດ​ມິດຕະພາບ​ອັນ​ອົບ​ອຸ່ນ ​ແລະ ສະ​ແດງ​ຄວາມ​ປິ​ຕິ​ຊົມ​ຊື່ນ​​ເປັນຢ່າງຍິ່ງ​ທີ່​ໄດ້​ພົບ​ປະ​ກັບ ສະຫາຍ​ເລຂາທິການ​ໃຫ່ຍ ປະທານ​ປະ​ເທດ ສປ ຈີນ ທີ່​ໄດ້​ນຳພາ​ຄະນະ​ຜູ້​ແທນ​ຂັ້ນ​ສູງ ພັກ-​ລັດ​ການ​ຢ້ຽມຢາມ​ທາງ​ລັດຖະກິດ ສປປ ລາວ ພາຍຫຼັງ​ທີ່​ພັກ​ກອມ​ມຸນິ​ດຈີນ ຫາ​ກໍ່​ສຳ​ເລັດ​ກອງ​ປະຊຸມ​ໃຫ່ຍຄັ້ງ​ທີ່ 19 ຂອງ​ພັກ​ຢ່າງ​ສະຫງ່າ​ງາມ ​ແລະ ​ໃນ​ບັນຍາກາດ​ທີ່​ການ​ພົວພັນ​ມິດຕະພາບ​ທີ່​ເປັນ​ມູນ​ເຊື້ອ​ອັນ​ດີງາມ ​ແລະ ​ແບບ​ຄູ່​ຮ່ວມ​ຍຸດ​ທະ​ສາດ​ຮອບດ້ານ ລາວ-​ຈີນ ພວມ​ຢູ່​ໃນ​ໄລຍະ​ທີ່​ໄດ້​ຮັບ​ການ​ເສີມ​ຂະຫຍາຍ​ຢ່າງ​ຕັ້ງໜ້າ; ພ້ອມ​ດຽວ​ກັນ​ນີ້ ສະຫາຍ ບຸນ​ຍັງ ວໍລະ​ຈິດ ກໍ່​ໄດ້​ສະ​ແດງ​ຄວາມ​ຊົມ​ເຊີຍ ​ແລະ ອວຍພອນ​ໄຊ​ຢ່າງ​ຈິງ​ໃຈ​ຕໍ່ ສະຫາຍ ສີ ຈິ້ນ​ຜິ​ງ ທີ່​ໄດ້​ຮັບ​ການ​ເລື​ອກຕັ້ງ​ເປັນ​ເລຂາທິການ​ໃຫ່ຍ ຄະນະ​ກຳມະການ​ສູນ​ກາງ​ພັກ​ກອມ​ມູນິດ​ຈີນ​ອີກ​ສະ​ໄໝ​ໜຶ່ງ, ​ເຊິ່ງ​ເປັນ​ການສະ​ແດງ​ໃຫ້​ດຫັນ​ຄວາມ​ໄວ້​ວາງ​ໃຈ, ຄວາມ​ເຊື່ອ​ໜັ້ນຢ່າງ​ສູງ​ຂອງ​ທົ່ວ​ພັກ ທີ່​ມີ​ຕໍ່​ສະຫາຍ ​ເຊິ່ງ​ເປັນ​ຜູ້​ມີ​ປະສົບ​ການ​ໃນ​ການ​ນຳພາ​ອັນ​ໂດດ​ເດັ່ນ​ໃນ​ໄລຍະ 5 ປີ​ທີ່​ຜ່ານ​ມາ ​ໃນ​ການ​ສ້າງສາ​ພັດ​ທະ​ນາ​ຕາມ​ທິດ​ສັງຄົມ​ນິຍົມ ຕາມ​ສີສັນ​ພິ​ເສດ​ຂອງ​ຈີນ ​ແລະ ​ໄດ້​ຮັບ​ຜົນສຳ​ເລັດ​ຢ່າງ​ສູງ ​ແລະ ​ແບບ​ກະ​ໂດດ​ຂັ້ນ​ເປັນ​ທີ່​ປະຈັກ​ຕາ​ຕໍ່​ສາກົນ. ສະຫາຍ ບຸນ​ຍັງ ວໍລະ​ຈິດ ​ໄດ້​ຕີ​ລາຄາ​ສູງ​ຕໍ່​ການ​ມາ​ຢ້ຽມຢາມ ສປປ ລາວ ຂອງ​ສະຫາຍ ​ເລຂາທິການ​ໃຫ່ຍ ສີ ຈິ້ນ​ຜິ​ງ, ​ເຊິ່ງ​ເປັນ​ການສະ​ແດງ​ເຖິງ​ຄວາມ​ເອົາ​ໃຈ​ໃສ່ ​ແລະ ​ໃຫ້​ຄວາມ​ສຳຄັນ​ຂອງ​ພັກ​ກອມ​ມູນິດ​ຈີນ, ລັດຖະບານ​ຈີນ ຕໍ່​ສາຍ​ພົວພັນ​ມິດຕະພາບ​ທີ່​ເປັນ​ມູນ​ເຊື້ອ ​ແລະ ​ແບບ​ຄູ່​ຮ່ວມ​ຍຸດ​ທະ​ສາດ ຮອບດ້ານ​ໜັ້ນຄົງ ຍາວ​ນານ ລະຫວ່າງ 2 ພັກ, 2 ລັດ ​ແລະ ປະຊາຊົນ 2 ຊາດ, ​ເຊິ່ງ​ເປັນ​ການ​ນຳ​ເອົາ​ສາຍ​ພົວພັນ​ດັ່ງກ່າວ ກ້າວ​ສູ່​ລະດັບ​ສູງ​ອັນ​ໃໝ່ ​ແລະ ສະ​ແດງ​ຄວາມ​ເຊື່ອ​ໜັ້ນວ່າ ການ​ຢ້ຽມຢາມ​ຄັ້ງ​ນີ້​ຈະ​ເປັນ​ໂອກາດ​ດີ​ທີ່​ສຸດ ​ໃຫ້​ແກ່​ການ​ນຳ​ຂັ້ນ​ສູງ​ຂອງ 2 ປະ​ເທດ ລາວ-​ຈີນ ​ເພື່ອ​ຮ່ວມ​ກັນ​ຕີ​ລາຄາ ກ່ຽວ​ກັບ​ການ​ພົວພັນ​ຮ່ວມ​ມື​ສອງ​ຝ່າຍ​ໃນ​ໄລຍະ​ຜ່ານ​ມາ ​ແລະ ປຶກສາ​ຫາລື​ກ່ຽວ​ກັບ​ທິດ​ທາງ​ການ​ຮ່ວມ​ມື​ໃນ​ຕໍ່​ໜ້າ ​ໃນ​ການ​ເປັນຄູ່​ຮ່ວມ​ຊາຕາກຳ​ລະຫວ່າງ​ສອງ​ພັກ, ສອງ​ລັດ​ຢູ່​ໃນ​ສະພາບ​ການ​ໃໝ່.

ສະຫາຍ​ເລຂາທິການ​ໃຫ່ຍ ບຸນ​ຍັງ ວໍລະ​ຈິດ ​ໄດ້​ຕາງໜ້າ​ໃຫ້​ພັກ-​ລັດ ​ແລະ ປະຊາຊົນ​ລາວ​ບັນດາ​ເຜົ່າ​ສະ​ແດງ​ຄວາມ​ຮູ້​ບຸນຄຸນ ​ແລະ ຂອບ​ອົກ​ຂອບໃຈຕໍ່​ພັກ-​ລັດ ​ແລະ ປະຊາຊົນ​ຈີນ ທີ່​ໄດ້​ໃຫ້ການ​ຊ່ວຍ​ເຫຼືອ​ອັນ​ລ້ຳ​ຄ່າ,​ໃນ​ການ​ສະໜັບສະໜູນ​ອັນ​ໃຫ່ຍຫຼວງ​ແກ່​ປະຊາຊົນ​ລາວ​ໃນ​ພາລະກິດ​ຕໍ່ສູ້ ​ເພື່ອ​ຍາດ​ເອົາ​ເອກະລາດ​ແຫ່ງ​ຊາດ ​ແລະ ​ໃນ​ການ​ປົກ​ປັກ​ຮັກສາ ​ແລະ ສ້າງສາ ສປປ ລາວ ​ໃນ​ປະຈຸ​ບັນ.

​ໂອກາດ​ດຽວ​ກັນ​ນີ້, ສະຫາຍ​ເລຂາທິການ​ໃຫ່ຍ ສີ ຈິ້ນ​ຜິ​ງ ​ໄດ້​ກ່າວ​ສະ​ແດງ​ຄວາມ​ຂອບ​ອົກ​ຂອບ ໃຈຕໍ່​ການ​ຕ້ອນຮັບຄະນະ​ຜູ້​ແທນ​ຂັ້ນ​ສູງ​ພັກ-​ລັດ ສປ ຈີນ ຢ່າງ​ອັນ​ອົບ​ອຸ່ນ ​ເຕັມ​ໄປ​ດ້ວຍ​ໄມຕີ​ຈິດ​ມິດຕະ ພາບທີ່​ສະໜິດສະໜົມ​ຂອງ ສະຫາຍ ບຸນ​ຍັງ​ ວໍລະ​ຈິດ ​ແລະ ການ​ນຳ​ຂັ້ນ​ສູງ​ຂອງ​ລາວ ພ້ອມ​ດ້ວນ​ມວນ​ຊົນ​ຊາວ​ນະຄອນຫຼວງ​ວຽງ​ຈັນ​ຢ່າງ​ຫຼວງ​ຫຼາຍ ​ແລະ ​ໄດ້​ກ່າວ​ສະ​ແດງ​ຄວາມ​ປິ​ຕິ​ຍິນ​ດີ​ເປັນ​ຢ່າງ​ຍິ່ງ ທີ່​ໄດ້​ນຳພາ​ຄະນະ​ຜູ້​ແທນ​ຂັ້ນ​ສູງ ພັກ-​ລັດ ສປ ຈີນ ​ເດີນທາງ​ມາ​ຢ້ຽມຢາມ​ທາງ​ລັດຖະກິດ ສປປ ລາວ ​ເປັນ​ຄັ້ງ​ທຳ​ອິດ ​ໃນ​ຖານະ​ເປັນ​ເລຂາທິການ​ໃຫ່ຍອີກ​ຄັ້ງ​ໃໝ່ ​ໃນ​ກອງ​ປະຊຸມ​ໃຫ່ຍຄັ້ງ​ທີ່ 19 ຂອງ​ພັກ​ກອມ​ມູນິດ​ຈີນ, ​ເຊິ່ງ​ເປັນ​ການສະ​ແດງ​ໃຫ້​​ເຫັນ​​ເຖິງ​ການ​ໃຫ້​ຄວາມ​ສຳຄັນ​ ​ແລະ ​ເອົາ​ໃຈ​ໃສ່​ຕໍ່​ການ​ຊຸກຍູ້​ສົ່ງ​ເສີມ​ສາຍ​ພົວພັນ​ມິດຕະພາບ​ອັນ​ເປັນ​ມູນ​ເຊື້ອ ​ແລະ ​ແບບ​ຄູ່​ຮ່ວມ​ຍຸດ​ທະ​ສາດ ຮອບດ້ານ ໜັ້ນຄົງ ​ຍາວ​ນານ ລະຫວ່າງ​ສອງ​ພັກ, ສອງ​ລັດ ​ແລະ ປະຊາຊົນ​ສອງ​ຊາດ​ລາວ-​ຈີນ ທີ່​ນັບ​ມື້​ນັບ​ໄດ້​ຮັບ​ການ​ເສີມ​ຂະຫຍາຍ, ​ແຕກ​ດອກ​ອອກ​ຜົນ​ຍິ່ງໆ​ຂື້ນ​ຕະຫຼອດ​ມາ. ພ້ອມ​ດຽວ​ກັນ​ນີ້, ສະຫາຍ ສີ ຈິ້ນ​ຜິ​ງ ກໍ່​ໄດ້​ຊົມ​ເຊີຍ​ປະຊາຊົນ​ລາວ​ອ້າຍ​ນ້ອງ ພາຍ​ໃຕ້​ການ​ນຳພາ​ຂອງ​ພັກ​ປະຊາຊົນ ປະຕິວັດ​ລາວ ​ໂດຍ​ມີ​ສະຫາຍ ບຸນ​ຍັງ ວໍລະ​ຈິດ ​ເປັນ​ຜູ້ນຳ​ໜ້າ​ຍາດ​ໄດ້ຜົນ​ສຳ​ເລັດ​ອັນ​ໃຫ່ຍ ​ໃນ​ການ​ພັດທະນາ​ເສດຖະກິດ-​ສັງຄົມ ​ໃນ​ໄລຍະ​ຜ່ານ​ມາ ​ແລະ ​ໄດ້​ຢືນຢັນ​ວ່າ ສປ ຈີນ ຈະ​ຮ່ວມ​ກັບ ສປປ ລາວ ສືບ​ຕໍ່​ເພີ່ມ​ພູມ​ຄູນ​ສ້າງສາ​ຍພົວພັນ ​ແລະ ຮ່ວມ​ມື​ດັ່ງກ່າວ ​ໃຫ້​ນັບ​ມື້​​ເກີດດອກອອກ​ຜົນ​ຢ່າງ​ບໍ່​ຢຸດ​ຢັ້ງ.

ສອງ​ຝ່າຍ​ໄດ້​ຮ່ວມ​ກັນ​ທົບ​ທວນຄືນ ​ແລະ ຕີ​ລາຄາ​ສູງ​ກ່ຽວ​ກັບ​ການ​ພົວພັນ​ຮ່ວມ​ມື​ສອງ​ຝ່າຍ​ໃນ​ໄລຍະ​ຜ່ານ​ມາ ​ເຊິ່ງ​ໄດ້​ຮັບ​ການ​ເສີມ​ຂະຫຍາຍ​ທັງ​ທາງ​ກວ້າງ ​ແລະ ລວງ​ເລິກ ປະ​ເທດ​ບ້ານ​ໃກ້​ເຮືອນ​ຄຽງ​ທີ່​ດີ ລາວ-​ຈີນ ລ້ວນ​ແຕ່​ເປັນ​ປະ​ເທດ​ສັງຄົມ​ນິຍົ​ມທີ່​ມີ​ພັກ​ກອມ​ມູນິດ​ນຳພາ, ມີ​ອຸດົມ​ການ, ລະບອບ​ການ​ເມືອງ, ສ້າງ​ທາງ​ແຫ່ງ​ການ​ພັດທະນາ​ທີ່​ຄ້າຍ​ກັນ​ສອງ​ຝ່າຍ ​ໄດ້​ຍຶດໜັ້ນທິດ​ທາງ​ທິດ​ທາງ​ການ​ພົວພັນ​ແບບ​ຄູ່​ຮ່ວມ​ຍຸດ​ທະ​ສາດ​ຮອບດ້ານ ໜັ້ນຄົງ​ຍາວ​ນານ ​ຕາມ​ທິດ​ 4 ດີ​ ​ເປັນຄູ່​ຮ່ວມ​ຊາຕາ​ສັງຄົມ​ນິຍົມ ລາວ-​ຈີນ ທີ່​ບໍ່​ສາມາດ​ຕັດ​ແຍກອອກ​ຈາກ​ກັນ​ໄດ້ ການ​ພົວພັນດ້ານ​ການ​ເມື​ອງ​ໄດ້​ມີ​ການ​ເສີມ​ຂະຫຍາຍ​ເປັນ​ຢ່າງ​ດີ ​ແລະ ​ໄດ້​ເປັນ​ພື້ນຖານ​ອັນ​ດີ​ໃຫ້​ແກ່​ການ​ເສີມ​ຂະຫຍາຍ​ສາຍ​ພົວພັນ​ສອງ​ຝ່າຍ​ໃນ​ດ້ານ​ຕ່າງໆ ການ​ພົວພັນ​ຮ່ວມ​ມື​ດ້ານ​ທິດ​ສະ​ດີ, ບົດຮຽນ​ການ​ປົກຄອງ​ລັດ-​ບໍລິຫານ​ປະ​ເທດ, ການ​ກໍ່ສ້າງ​ພັກ, ການ​ຮ່ວມ​ມື​ດ້ານ​ເສດຖະກິດ, ການ​ຄ້າ-​ການ​ລົງ​ທືນ ​ແລະ ອື່ນໆ ນັບ​ມື້​ມີ​ບາດກ້າວ​ຂະຫຍາຍຕົວ​ໄປ​ສູ່​ຄຸນ​ນະພາ​ບ​ໃໝ່, ພວມ​ນຳ​ຜົນ​ປະ​ໂຫຍ​ດຕົວ​ຈິງ​ໃຫ້​ແກ່​ປະຊາຊົນ​ສອງ​ຊາດ​ລາວ-​ຈີນ. ພ້ອມ​ດຽວ​ກັນ​ນີ້ ທັງ​ສອງ​ຝ່າຍ​ເຫັນ​ດີ​ສືບ​ຕໍ່​ຮັກສາ​ກົນ​ໄກ ການ​ແລກປ່ຽນ​ການ​ຢ້ຽມຢາມ ລະຫວ່າງ ການ​ນຳ​ຂັ້ນ​ສູງ ລະຫວ່າງ 2 ພັກ ​ແລະ 2 ລັດ ຢ່າງ​ເປັນ​ປົກກະຕິ, ​ເອົາ​ໃຈ​ໃສ່​ເສີມ​ຂະຫຍາຍ​ກົນ​ໄກ​ການ​ຮ່ວມ​ມື​ຂອງ​ສອງ​ຝ່າຍ​ທີ່​ມີ​ໃນ​ປະຈຸ​ບັນ ​ໃຫ້​ມີ​ປະສິດທິ​ຜົນ​ກວ່າ​ເກົ່າ, ສືບ​ຕໍ່​ສ້າງ​ຄູ່​ຮ່ວມ​ຊາຕາກຳ​ທີ່​ຕັດ​ແຍກ​ອອກ​ຈາກ​ກັນ​ບໍ່​ໄດ້; ສືບ​ຕໍ່​ຈັດ​ຕັ້ງ​ຜັນ​ຂະຫຍາຍ​ແຜນການ​ຮ່ວມ​ມື 2 ພັກ ​ໃນ​ການ​ກໍ່ສ້າງ​ພະນັກງານ​ນຳພາ​ຄຸ້ມ​ຄອງ ຂອງ​ພັກ-​ລັດ ​ລາວ ຢູ່​ຈີນ, ສືບ​ຕໍ່​ເພີ່ມ​ທະວີ​ການ​ຮ່ວມ​ມື ​ເພື່ອ​ເຊື່ອມ​ໂຍງ​ຍຸດ​ທະ​ສາດ “ ໜຶ່ງ​ແລວ ໜື່ງ​ເສັ້ນທາງ ” ຂອງ​ຈີນ ​ເພື່ອ​ນຳ​ເອົາ​ຜົນ​ປະ​ໂຫຍ​ດຕົວ​ຈິງ​ມາສູ່​ປະຊາຊົນ 2 ຊາດ.

ພາຍຫຼັງ​ການ​ພົບ​ປະ​ສອງ​ຝ່າຍ ສະຫາຍ​ເລຂາ​ທິການ​ໃຫ່ຍ ບຸນ​ຍັງ ວໍລະ​ຈິດ  ​ແລະ ສະຫາຍ​ເລຂາທິການ​ໃຫ່ຍ ສີ ຈິ້ນ​ຜິ​ງ ​ໄດ້​ເປັນ​ສັກຂີ​ພິຍານ​ໃນ​ການ​ລົງ​ນາມ​ບັນດາ​ເອກະສານການ​ຮ່ວມ​ມື ຈຳນວນ 17 ສະບັບ​ຄື: ສັນຍາ​ການ​ຮ່ວມ​ມື​ລະຫວ່າງ ກະຊວງ​ການ​ຕ່າງປະ​ເທດ ສປປ ລາວ ​ແລະ ກະຊວງ​ການ​ຕ່າງປະ​ເທດ ສປ ຈີນ ກ່ຽວ​ກັບ​ການ​ເພີ່ມ​ທະວີ​ການ​ຮ່ວມ​ມື​ໃນ​ສະພາບ​ການ​ໃໝ່; ບົດ​ບັນທຶກ​ຄວາມ​ເຂົ້າ​ໃຈ ວ່າ​ດ້ວຍ​ການ​ຮ່ວມກັນ​ກໍ່ສ້າງ​ ​ແລວທາງ​ເສດຖະກິດ​ລາວ-​ຈີນ; ບົດ​ບັນທຶກ​ຄວາມ​ເຂົ້າ​ໃຈ ວ່າ​ດ້ວຍ​ການ​ເພີ່ມ​ທະວີ​ການ​ພັດທະນາ​ເສັ້ນທາງ​ສາຍ​ໄຫມ​ດີ​ຈິ​ຕອນ​ຂໍ້​ມູນ​ຂ່າວສານ ​ເພື່ອ​ຊຸກຍູ້​ການ​ເຊື່ອມ​ຈອດ​ຂໍ້​ມູນ​ຂ່າວສານ; ສັນຍາ​ວ່າ​ດ້ວຍ​ການ​ຮ່ວມ​ມື​ດ້ານ​ວິທະຍາສາດ ​ແລະ ​ເຕັກ​ໂນ​​ໂລ​ຊີ; ບົດ​ບັນທຶກ​ຄວາມ​ເຂົ້າ​ໃຈ​ວ່າ​ດ້ວຍ​ການຈັດ​ຕັ້ງ​ປະຕິບັດ​ຮ່ວມ​ໂຄງການ​ໂຕ​ແບບ ​ໃນ​ການ​ສ້າງ​ສູນ​ຂໍ້​ມູນ​ຂ່າວສານ​ຊັບພະຍາກອນ​ນ້ຳ​ແຫ່ງ​ຊາດ ​ແລະ ການ​ສ້າງ​ແຜນ​ແມ່​ບົດ​ການ​ຄຸ້ມ​ຄອງ​ອ່າງ​ຮັບ​ນ້ຳ​ອູ ​ແລະ ນ້ຳ​ເທີນ-​ນ້ຳ​ກະດິງ; ບົດ​ບັນທຶກ​ຄວາມ​ເຂົ້າ​ໃຈ​ວ່າ​ດ້ວຍ​ການ​ຮ່ວມ​ກັນ​ຊຸກ​ຍູ້​ສ້າງ​ເຂດ​ຕົວ​ແບບ​ພັດທະນາ​ກະສິກຳ​ຄົບ​ວົງ​ຈອນ​ທີ່​ທັນ​ສະ​ໄໝ; ບົດ​ບັນທຶກ​ຄວາມ​ເຂົ້າ​ໃຈ​ກ່ຽວ​ກັບ​ການ​ເພີ່ມ​ທະວີ​ການ​ຮ່ວມ​ມື​ໃນ​ຂົງ​ເຂ​ດພື້ນຖານ​ໂຄ່ງ​ລ່າງ; ບົດ​ບັນທຶກ​ຄວາມ​ເຂົ້າ​ໃຈ ວ່າ​ດ້ວຍ​ການ​ຮ່ວມ​ມື​ດ້ານ​ການ​ຊ່ວຍ​ເຫຼືອ​ໃນ 3 ປີ​ຕໍໍ່ໜ້າ; ບົດ​ບັນທຶກ​ຄວາມ​ເຂົ້າ​ໃຈ​ວ່າ​ດ້ວຍ​ການ​ຮ່ວມ​ມື​ດ້ານ​ພັດທະ ນາ​ຊັບພະຍາກອນ​ມະນຸດ; ສານ​ແລ​ກປ່ຽນ​ວ່າ​ດ້ວຍ​ຝ່າຍ​ຈີນ​ເຫັນ​ດີ​ນຳ​ກົດ​ເອົາ​ໂຄງການ​ປັບປຸງ ​ແລະ ຍົກ​ລະດັບ ລະບົບ ICT ຂອງ​ກະຊວງ​ອຸດສາຫະກຳ ​ແລະ ການ​ຄ້າ ສປປ ລາວ; ສັນຍາ​ຂອບ​ສະໜອງ​ເງີ​ນກູ້​ພິ​ເສດ​ໃຫ້​ແກ່ ສປປ ລາວ ​ເພື່ອຈັດ​ຕັ້ງ​ປະຕິບັດ​ໂຄງການ​ເຂື່ອນ​ໄຟຟ້າ​ຫ້ວຍ​ປາກ​ລາຍ; ບົດ​ບັນທຶກ​ຄວາມ​ເຂົ້າ​ໃຈ​ ການ​ສ້າງ​ຄູ່​ຮ່ວມ​ມື​ຍຸດ​ທະ​ສາດ ດ້ານ​ການ​ຮ່ວມ​ມື​ໄຟຟ້າ; ບົດ​ບັນທຶກ​ຄວາມ​ເຂົ້າ​ໃຈ ວ່າ​ດ້ວຍ​ການ​ຮ່ວມ​ມື​ທາງ​ດ້ານ​ການ​ເງີ​ນ ​ເພຶ່ອສົ່ງ​ເສີມ​ວິ​ສາ​ຫະກິດ​ຂະໜາດ​ນ້ອຍ ​ແລະ ກາງ ​ໃນ ສປປ ລາວ; ສັນຍາ​ເງີ​ນກູ້ພິ​ເສດ​ດອກ​ເບ້​ຍຕ່ຳ ​ໂຄງການ​ເຂື່ອນ​ໄຟຟ້າ​ຫ້ວຍ​ປາ​ຫລາຍ; ສັນຍາ​ເງີ​ນກູ້​ທຸລະ​ກິດ​ໂຄງການ​ສາຍ​ສົ່ງ 115 ( ກິ​ໂລ​ໂວ​ນ ) ຊຽງ​ຮ່ອນ-​ຫົງ​ສາ; ສັນຍາ​ຮ່ວມ​ທຶນ​ສ້າງ​ໂຄງການ​ກໍ່ສ້າງ​ທາງ​ດ່ວນ​ນະຄອນຫຼວງ​ວຽງ​ຈັນ ຫາ​ບໍ່​ເຕັນ​ຕອນ​ທີ່ 1 ນະຄອນຫຼວງ​ວຽງ​ຈັນ​ຫາ​ວັງ​ວຽງ; ສັນຍາ​​ເງິນ​ກູ້​ທຸລະ​ກິດ​ໂຄງການສາຍ​ສົ່ງ 500/230 KV ອ້ອມ​ນະຄອນຫຼວງ​ວຽງ​ຈັນ.

 

​ໃນ​ຕອນ​ຄ່ຳ​ຂອງ​ວັນ​ດຽວ​ກັນ, ສະຫາຍ​ເລຂສທິການ​ໃຫ່ຍ ບຸນ​ຍັງ ວໍລະ​ຈິດ ​ໄດ້​ເປັນ​ເຈົ້າພາບ​ຈັດ​ງານ​ລ້ຽງ​ຕ້ອນຮັບ ​ເປັນ​ກຽດ​ແດ່ ສະຫາຍ​ເລຂາທິການ​ໃຫ່ຍ ສີ ຈິ້ນ​ຜິ​ງ ພ້ອມ​ດ້ວຍ​ຄະນະ​ຜູ້​ແທນ​ຂັ້ນ​ສູນ​ກາງ​ພັກ,ລັດ ຈີນ ທີ່​ທຳນຽບປະທານ​ປະ​ເທດ, ​ໂດຍ​ມີ​ບັນດາ​ການ​ນຳຂັ້ນ​ສູງ​ພັກ-​ລັ​ດ ສປ ຈີນ ​ແລະ ສປປ ລາວ ​ເຂົ້າ​ຮ່ວມ​ຢ່າງ​ພ້ອມພຽງ.

Off

Comments are closed.