13th Oct2017

ສະເຫຼີມສະຫຼອງວັນສ້າງຕັ້ງໜັງສືພິມ ຄວາມສະຫງົບ ຄົບຮອບ 20 ປີ

by somchan

ຄະນະບັນນາທິການຂ່າວສານ ກົມໃຫຍ່ການເມືອງ ປກສ ສະເຫຼີມສະຫຼອງວັນສ້າງຕັ້ງໜັງສືພິມ ຄວາມສະຫງົບ ຄົບຮອບ 20 ປີ ໃນວັນທີ 12 ຕຸລາ 2017 ນີ້. ເປັນກຽດເຂົ້າຮ່ວມໂດຍ ພົຈວ ອາລູ ວາລີຊື ຄະນະພັກກະຊວງ ຫົວໜ້າກົມໃຫຍ່ ການເມືອງ ປກສ ມີຄະນະພັກກົມໃຫຍ່, ກົມກອງອ້ອມຂ້າງກົມໃຫຍ່ການເມືອງຕະຫຼອດຮອດ ແຂກຖືກເຊີນ,ຄະນະບັນນາທິການຂ່າວສານ ປກສ ພ້ອມດ້ວຍພະນັກງານ-ນັກຮົບພາຍໃນຄະນະບັນນາທິການຂ່າວສານ ປກສ ເຂົ້າຮ່ວມ.

ພັທ ພອນສະຫວັນ ອຸດົມເພັດ ຮອງຫົວໜ້າຄະນະບັນນາທິການຂ່າວສານ ປກສ ຜູ້ຊີ້ນຳໜັງສືພິມ ປກສ ໄດ້ຫວນຄືນກ່ຽວກັບມູນເຊື້ອ, ຜົນງານການເຄື່ອນໄຫວຂອງໜັງສືພິມຄວາມສະຫງົບ ໄລຍະ 20 ປີຜ່ານມາ ເຊິ່ງທ່ານໄດ້ກ່າວວ່າ: ໜັງສືພິມຄວາມສະຫງົບໄດ້ຮັບການສ້າງຕັ້ງຂຶ້ນ ແລະ ພິມອອກສູ່ສາຍຕາມວນຊົນ ໃນວັນທີ 12 ຕຸລາ 1997 ເຊິ່ງມາຮອດປີນີ້ມີອາຍຸຄົບຮອບ 20 ປີພໍດີ, ການກຳເນີດໜັງສືພິມຄວາມສະຫງົບ ແມ່ນຄວາມຕັ້ງໃຈຂອງທ່ານລັດຖະມົນຕີ ແລະ ການນຳຂອງກະຊວງພາຍໃນເມື່ອກ່ອນ, ເພື່ອຕອບສະໜອງຄວາມຮຽກຮ້ອງຕ້ອງການຂອງໜ້າທີ່ການເມືອງຂອງພັກ ເປັນຕົ້ນແມ່ນໂຄສະນາແນວທາງນະໂຍບາຍຂອງພັກ ແລະ ແນວທາງປ້ອງກັນຊາດ-ປ້ອງກັນຄວາມສະຫງົບ ທັງເປັນການລິເລີ່ມເປັນຮູບປະທຳ ຂອງຂະແໜງສື່ມວນຊົນໃນກຳລັງປ້ອງກັນຄວາມສະຫງົບ, ມັນແມ່ນປະກົດການໃຫມ່ ເຊິ່ງມີຄວາມໝາຍດ້ານປະຫວັດສາດ ໃນຊີວິດການເມືອງຂອງກຳລັງປ້ອງກັນຄວາມສະຫງົບ, ໜັງສືພິມຄວາມຫງົບ ແມ່ນສື່ສິ່ງພິມຊະນິດໜຶ່ງ, ໃນພາຫະນະສື່ມ່ວນຊົນຂອງກຳລັງ ປກສເອີ່ນວ່າ: ກອງບັນນາທິການໜັງສືພິມປ້ອງກັນຄວາມສະຫງົບ, ມີຖານະທຽມເທົ່າຂັ້ນພະແນກ. ເບື່ອງຕົ້ນໜັງສືພິມຄວາມສະຫງົບແມ່ນໄດ້ເລີ່ມຈາກລາຍເດືອນ, ມີຈຳນວນ 12 ໜ້າ, ຮອດວັນທີ 12 ຕຸລາ 2005 ໄດ້ປັບປຸງຈາກລາຍເດືອນມາເປັນລາຍປັກ 15 ວັນ ແລະ ເພີ່ມຈຳນວນເປັນ 16 ໜ້າ, ຮອດວັນທີ 1 ຕຸລາ 2007 ຫັນຈາກໜັງສືພິມລາຍປັກ 15 ວັນ ມາເປັນລາຍອາທິດ.

ເພື່ອຕອບສະໜອງກັບຄວາມຮຽກຮ້ອງຕ້ອງການຂອງໜ້າທີ່ການເມືອງຂອງພັກ, ກໍຄືວຽກງານຖະແຫຼ່ງຂ່າວໃນກຳລັງປ້ອງກັນຄວາມສະຫງົບໃຫ້ທັນສະໄໝເທື່ອລະກ້າວນັ້ນ, ໜັງສືພິມຄວາມສະຫງົບໄດ້ກະກຽມເງື່ອນໄຂ ເພື່ອພັດທະຕົນເອງໃຫ້ເຕີບໃຫຍ່ຂຶ້ນ ເພື່ອບືນຕົວກ້າວຂຶ້ນເປັນລາຍວັນ, ຮອດວັນທີ 8 ກໍລະກົດ 2013 ເປັນມື້ເປີດໂຕ ເປັນໜັງສືພິມຄວາມສະຫງົບຈາກລາຍອາທິດ ເປັນລາຍວັນ ອອກສູ່ສາຍຕາມວນຊົນຢ່າງເປັນທາງການ, ເພື່ອເປັນການຕໍ່ຍອດການພັດທະນາທີ່ບໍ່ຢຸດຢັ້ງຮອດວັນທີ 4 ເມສາ 2017 ໜັງສືພິມຄວາມສະຫງົບໄດ້ເພີ່ມຈາກ 12 ໜ້າ ເປັນ 16 ໜ້າ, ສອດສີຈາກ 2 ໜ້າ ເປັນ 4 ໜ້າ ແລະ ເພີ່ມການພິມ ຈາກ1.500 ສະບັບ ເປັນ 200 ສະບັບ. ນັບແຕ່ມື້ສ້າງຕັ້ງເປັນຕົ້ນມາ ໜັງສືພິມຄວາມສະຫງົບ ໄດ້ຮັບການປັບປຸງ ແລະ ພັດທະນາ ທາງດ້ານເນື້ອໃນ, ຮູບແບບ ແລະ ສີສັນຢ່າງຕໍ່ເນື່ອງ. ໂອກາດດຽວກັນນີ້ ຍັງໄດ້ມອບໃບຍ້ອງຍໍຂອງລັດຖະມົນຕີກະຊວງ ປກສ ແລະ ໃບຍ້ອງຍໍຂັ້ຍຫົວໜ້າກົມໃຫຍ່ການເມືອງ ປກສ ໃຫ້ແກ່ພະນັກງານ-ນັກຮົບ ຜູ້ທີ່ໄດ້ປະກອບສ່ວນເຂົ້າໃນການເຄື່ອນໄຫວວຽກງານໜັງສືພິມຄວາມສະຫງົບໃນໄລຍະຜ່ານມາ.

 

Off

Comments are closed.