08th Apr2019

ສັບປະດາແຫ່ງຊາດ ດ້ານຄວາມປອດໄພ ທາງຖະໜົນ ໃນຫົວຂໍ້ ຊີວິດປອດໄພຮ່ວມໃຈ ປ້ອງກັນອຸປະຕິເຫດ ປະຈຳປີ 2019

by somchan

ກອງເລຂາຄະນະກຳມະການແຫ່ງຊາດດ້ານຄວາມປອດໄພທາງຖະໜົນໄດ້ຈັດງານສັບປະດາແຫ່ງຊາດດ້ານຄວາມປອດໄພທາງຖະໜົນ ໃນຫົວຂໍ້ ຊີວິດປອດໄພຮ່ວມໃຈປ້ອງກັນອຸປະຕິເຫດ ປະຈຳປີ 2019 ໃນວັນທີ 6 ເມສາ 2019ນີ້ ຢູ່ທີ່ສວນປະຕູໄຊ ນະຄອນຫຼວງວຽງຈັນ ໂດຍການເປັນກຽດເຂົ້າຮ່ວມ ຂອງທ່ານ ວຽງສະຫວັດ ສີພັນດອນ ຮອງລັດຖະມົຕີ ກະຊວງໂຍທາທິການ ແລະ ຂົນສົ່ງ, ພົຈວ ປອ ທອງສະຫວັນ ວົງສະຫວັດ ຮອງຫົວໜ້າກົມໃຫ່ຍຕຳຫຼວດ ກະຊວງປ້ອງກັນຄວາມສະຫງົບ ມີຫົວໜ້າກອງເລຂາຄະນະກຳມະການແຫ່ງຊາດ ດ້ານຄວາມປອດໄພທາງຖະໜົນ, ແຂກຖືກເຊີນຈາກກະຊວງ, ອົງການທີ່ກ່ຽວຂ້ອງ ແລະ ມວນຊົນຊາວນະຄອນຫຼວງວຽງຈັນ ເຂົ້າຮ່ວມ.

ປອ ບຸນຕາ ອ່ອນດາວົງ ຫົວໜ້າກົມຂົນສົ່ງ ກະຊວງໂຍທາທິການ ແລະ ຂົນສົ່ງ ທັງເປັນຫົວໜ້າກອງເລຂາຄະນະກຳມະການແຫ່ງຊາດດ້ານຄວາມປອດໄພທາງຖະໜົນ ໄດ້ກ່າວຈຸດປະສົງ ແລະ ແຜນການຈັດງານສັບປະດາແຫ່ງຊາດດ້ານຄວາມປອດໄພທາງຖະໜົນປະຈຳປີ 2019 ໃນຫົວຂໍ້ ຊີວິດປອດໄພຮ່ວມໃຈປ້ອງກັນອຸປະຕິເຫດ ປະຈຳປີ 2019 ເຊິ່ງທ່ານໄດ້ກ່າວວ່າ ການຈັດງານໃນຄັ້ງນີ້ ແມ່ນຄັ້ງທີ່ 5 ທັງເປັນການປະຕິບັດພັນທະໜຶ່ງຂອງສາທາລະນະລັດ ປະຊາທິປະໄຕ ປະຊາຊົນລາວ ຕໍ່ກັບສາກົນໃນການປະກອບສ່ວນຫຼຸດຜ່ອນການເກີດອຸປະຕິເຫດ ແລະ ການເສຍຊີວິດຂອງຜູ້ໃຊ້ລົດໃຊ້ຖະໜົນໃນທົ່ວໂລກເວົ້າລວມ, ເວົ້າສະເພາະແມ່ນການປະກອບສ່ວນຈັດຕັ້ງປະຕິບັດຍຸດທະສາດ ແລະ ແຜນນະໂຍບາຍຂອງພັກ-ລັດຖະບານຂອງສາທາລະນະລັດ ປະຊາທິປະໄຕ ປະຊາຊົນລາວ ເປັນການປູກຈິດສຳນຶກກ່ຽວກັບຄວາມປອດໄພໃນການໃຊ້ລົດໃຊ້ຖະໜົນໃຫ້ແກ່ສັງຄົມ ໃຫ້ເຫັນໄດ້ເຖິງຄວາມອັນຕະລາຍຂອງການຂັບຂີ່ລົດໄວ, ການດື່ມສິິ່ງມືນເມົາແລ້ວຂັບຂີ່, ໃຫ້ເຫັນໄດ້ຜົນເສຍຫາຍ, ຜົນກະທົບຕໍ່ການເກີດອຸປະຕິເຫດ ເຊິ່ງສ້າງຜົນເສຍຫາຍຕໍ່ຊີວິດ ແລະ ຊັບສິນ.

ເຊິ່ງພາຍໃນງານໄດ້ສ້າງກິດຈະກຳຍ່າງເພື່ອສຸຂະພາບແຕ່ສວນປະຕູໄຊຫາຫໍຄຳ, ກິດຈະກຳແນະນຳການໃຊ້ລົດໃຫ້ຖືກວິທີ ແລະ ກິດຈະກຳຖາມຕອບເອົາຂອງລາງວັນຕ່າງໆ.

ພ້ອມນີ້ ທ່ານ ວຽງສະຫວັດ ສີພັນດອນ ຮອງລັດຖະມົນຕີກະຊວງ ໂຍທາທິການ ແລະ ຂົນສົ່ງ ໄດ້ມີຄຳເຫັນກ່າວເປີດການຈັດງານສັບປະດາແຫ່ງຊາດດ້ານຄວາມປອດໄພທາງຖະໜົນ.

 

 

Off

Comments are closed.