15th Aug2018

ການໃຫ້ສຳພາດຂອງທ່ານຫົວໜ້າດ່ານ ວັງເຕົ່າ – ຊ່ອງເມັກ ເມືອງໂພນທອງ ແຂວງຈຳປາສັກ

by somchan

ຕໍ່ກັບເຫດການຄູກັນນ້ຳເຂື່ອນໄຟຟ້າ ເຊປຽນ-ເຊນ້ຳນ້ອຍ ທີ່ເມືອງສະໜາມໄຊ ແຂວງອັດຕະປື ແຕກ ເມື່ອບໍ່ດົນມານີ້ ອັນໄດ້ສ້າງຄວາມເສຍຫາຍ ໃຫ້ແກ່ຊີວິດ ແລະ ສັບສິນຂອງປະຊາຊົນ ເປັນຈຳນວນຫຼວງຫຼາຍ ພາຍຫຼັງເຫດການເກີດຂື້ນ ໄດ້ມີຫຼາຍພາກສ່ວນທັງພາຍໃນ ແລະ ຕ່າງປະເທດໄດ້ເຂົ້າມາ ໃຫ້ການຊ່ວຍເຫຼືອ ໃນການຊອກຄົ້ນຫາຜູ້ທີ່ຍັງສູນຫາຍ ແລະ ຊ່ວຍເຫຼືອເຄື່ອງບັນເທົາທຸກ ແກ່ປະຊາຊົນ ທີ່ໄດ້ຮັບຜົນກະທົບ ໃນນີ່ດ່ານສາກົນ ວັງເຕົ່າ-ຊ່ອງເມັກ ເມືອງໂພນທອງ ແຂວງຈຳປາສັກ ກໍ່ເປັນອີກດ່ານໜຶ່ງທີ່ປະຊາຊົນ ປະເທດເພືອນບ້ານ ໃຊ້ເປັນເສັ້ນທາງ ເຂົ້າມາໃຫ້ການຊ່ວຍເຫຼືອ ເປັນຈຳນວນຫຼວງຫຼາຍ .ສະນັ້ນຈຶ່ງໄດ້ເກີດມີຫາງສຽງຈາກສັງຄົມ ແລະ ສື່ສັງຄົມອອນລາຍວ່າ ເຈົ້າໜ້າທີ່ພາຍໃນດ່ານ ບໍ່ໃຫ້ການຮ່ວມມື ຕໍ່ກັບບັນຫາດັ່ງກ່າວ ພັຕ ຄຳໜາຍ ໄຊກອງພັນ ຫົວໜ້າຕຳຫຼວດກວດຄົນເຂົ້າ-ອອກເມືອງ ດ່ານສາກົນ ວັງເຕົ່າ – ຊ່ອງເມັກ ເມືອງໂພນທອງ  ແຂວງຈຳປາສັກ ໄດ້ໃຫ້ສຳພາດວ່າ: ພາຍຫຼັງ ຄູກັນນ້ຳເຊປຽນ-ເຊນ້ຳນ້ອຍແຕກ ໃນວັນທີ 23 ກໍລະກົດ 2018 ໄດ້ມີພາຫະນະ ແລະ ຄົນຈາກປະເທດເພືອນບ້ານ ເຂົ້າອອກເປັນຈຳນວນຫຼວງຫຼາຍ ໂດຍສະເພາະຜູ້ທີ່ເຂົ້າມາໃຫ້ການຊ່ວຍເຫຼືອ. ແຕ່ພາຍຫຼັງໄດ້ມີແຈ້ງການຂອງທ່ານ ເຈົ້າແຂວງຈຳປາສັກ ເລີ່ມແຕ່ວັນທີ 24 ກໍລະກົດ ຈົນເຖິງປະຈຸບັນ ແມ່ນມີການຍົກເວັ້ນກ່ຽວກັບການເກັບຄ່າການບໍລິການ ຄ່າທຳນຽມຕ່າງໆ ແກ່ຜູ້ທີ່ເຂົ້າມາໃຫ້ການຊ່ວຍເຫຼືອ.

(ຟັງສຽງ ຫົວໜ້າດ່ານ ວັງເຕົ່າ – ຊ່ອງເມັກ ເມືອງໂພນທອງ  ແຂວງຈຳປາສັກ)

ສ່ວນທ່ານ ແຫວນເພັດ ນາຂ່ວາງ ຮອງຫົວໜ້າພາສີດ່ານສາກົນ ວັງເຕົ່າ-ຊອ່ງເມັກ ເມືອງໂພນທອງ  ແຂວງຈຳປາສັກ ກໍ່ໄດ້ກ່າວວ່າ: ພາຍຫຼັງທີ່ເກີດອຸທົກກະໄພ ຢູ່ເມືອງສະໜາມໄຊ ແຂວງອັດຕະປື ກໍ່ໄດ້ມີການແຕ່ງຕັ້ງ ຄະນະກຳມະການຂັ້ນແຂວງ ປະສານສົມທົບກັບເຈົ້າໜ້າທີ່ ຈັດຕັ້ງປະຕິບັດ ການກວດກາເຄື່ອງອຸປະໂພກ-ບໍລິໂພກ ແລະ ຢາປົວພະຍາດ ທີ່ນຳເຂົ້າມາຊ່ວຍເຫຼືອຢ່າງລະອຽດ ເພື່ອສະກັດກັ້ນບໍ່ໃຫ້ພວກຄົນບໍ່ດີສວຍໂອກາດໃນໄລຍະນີ້.

 

Off

Comments are closed.