27th Jan2016

ສຳເລັດກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ 10 ຂອງພັກປະຊາຊົນ ປະຕິວັດລາວ

by somchan

ABC_7503-(cut)

ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ 10 ຂອງພັກປະຊາຊົນ ປະຕິວັດລາວ ໄດ້ດຳເນີນມາແຕ່ ວັນທີ 18 ຫາ 22 ມັງກອນ 2016 ທີ່ນະຄອນຫຼວງວຽງຈັນ ພາຍໃຕ້ຄຳຂວັນ “ຍົກສູງຄວາມສາມາດນຳພາ ແລະ ລັກສະນະນຳໜ້າຂອງພັກ, ເພີ່ມທະວີມະຫາສາມັກຄີທົ່ວປວງຊົນທັງຊາດ, ຍຶດໝັ້ນແນວທາງປ່ຽນແປງໃຫມ່ຮອບດ້ານ ແລະ ມີຫຼັກການ, ປົກປັກຮັກສາ ແລະ ສ້າງສາພັດທະນາປະເທດຊາດຕາມທິດຍືນຍົງ ສູ່ຈຸດໝາຍສັງຄົມນິຍົມຢ່າງໜັກແໜ້ນ” ເຂົ້າຮ່ວມກອງປະຊຸມໃຫຍ່ຄັ້ງນີ້ ມີຜູ້ແທນສົມບູນ 685 ສຫາຍ, ໃນນັ້ນຜູ້ແທນບົ່ງຕົວ 1 ສະຫາຍ ບັນດາຜູ້ແທນກອງປະຊຸມໃຫຍ່ ເປັນຕົວແທນໃຫ້ແກ່ສະມາຊິກພັກທັງໝົດໃນທົ່ວປະເທດ 252.879 ສະຫາຍ.

ກອງປະຊຸມໃຫຍ່ໄດ້ຄົ້ນຄວ້າຕົກລົງບັນຫາສຳຄັນຂອງພັກ ແລະ ຂອງຊາດ ພາຍໃຕ້ບັນຍາກາດອັນສ້າງສັນ, ມີຄວາມຮັບຜິດຊອບ, ທັງມີຄວາມສາມັກຄີ ເປັນເອກະພາບສູງ ແລະ ສິ້ນສຸດລົງດ້ວຍຜົນສຳເລັດອັນຈົບງາມຊຶ່ງສະແດງອອກດັ່ງນີ້:

DSC_5200-(cut)

  1. ກອງປະຊຸມໃຫຍ່ໄດ້ຄົ້ນຄວ້າຢ່າງເລີກເຊິງ ແລະ ໄດ້ຮັບຮອງເອົາຢ່າງເປັນເອກະສັນລາຍງານການເມືອງ ຂອງຄະນະບໍລິຫານງານສູນກາງພັກ ສະໄໝທີ 9 ທີ່ສະເໜີຕໍ່ກອງປະຊຸມໃຫຍ່ຄັ້ງທີ 10 ໂດຍໄດ້ສະແດງຄວາມເຫັນພ້ອມນຳການສະຫຼຸບຕີລາຄາ ຜົນແຫ່ງການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ 9ຂອງພັກ ເປັນຕົ້ນແມ່ນບັນດາຜົນງານອັນພົ້ນເດັ່ນທີ່ຍາດມາໄດ້ໃນຂົງເຂດວຽກງານປ້ອງກັນຊາດ-ປ້ອງກັນຄວາມສະຫງົບ, ການພັດທະນາເສດຖະກິດ-ສັງຄົມ, ການພັດທະນາລະບົບອຳນາດລັດ, ວຽກງານແນວໂຮມ ແລະ ວຽກງານມະຫາຊົນຂອງພັກ, ວຽກງານການຕ່າງປະເທດ ແລະ ການເຊື່ອມໂຍງສາກົນ, ວຽກງານກໍ່ສ້າງພັກ-ພະນັກງານ. ບັນດາຜົນສຳເລັດທີ່ທີ່ບັນລຸໄດ້ໃນໄລຍະ 5 ປີຜ່ານມາ ໄດ້ສ້າງພື້ນຖານ ແລະ ຖ່ວງທ່າໃໝ່ໃຫ້ແກ່ການສືບຕໍ່ຂະຫຍາຍຕົວຂອງປະເທດຊາດ ໄປຕາມທິດ ແລະ ຈຸດໝາຍທີ່ວາງໄວ້.

ກອງປະຊຸມໄດ້ປະກອບຄວາມຄິດເຫັນຢ່າງກົງໄປກົງມາ ກ່ຽວກັບຂໍ້ຄົງຂ້າງໃນການຊີ້ນຳ-ນຳພາຂອງພັກ ເຊິ່ງເປັນສາເຫດຕົ້ນຕໍອັນໜຶ່ງ ທີ່ເຮັດໃຫ້ການຈັດຕັ້ງປະຕິບັດວຽກງານຈຸດສຸມບາງດ້ານ ບໍ່ບັນລຸຜົນສຳເລັດຕາມຄາດໝາຍທີ່ວາງໄວ້ ແລະ ໄດ້ເລັ່ງທວງໃຫ້ມີມາດຕະການທີ່ແທດເໝາະ ເພື່ອດຳເນີນການແກ້ໄຂຂໍ້ຄົງຂ້າງທີ່ຜ່ານມາຢ່າງຈິງຈັງ ແນໃສການຫັນປ່ຽນອັນຕັ້ງໜ້າຫຼາຍຂຶ້ນໃນການຈັດຕັ້ງປະຕິບັດແນວທາງຂອງພັກຕໍ່ໄປ.

DSC_4184----(cut)

ກອງປະຊູມໄດ້ສະຫຼຸບເອົາ 7 ປະການ ເຊິ່ງເປັນບົດຮຽນອັນປະເສີດ ທີ່ຖອດຖອນໄດ້ຈາກພຶດຕິກຳແຫ່ງການຈັດຕັ້ງນຳພາປະຕິບັດກອງປະຊຸມໃຫຍ່ຄັ້ງທີ 9 ແລະ  30 ປີ ແຫ່ງການປ່ຽນໃຫມ່; ພ້ອມດຽວກັນນັ້ນກໍໄດ້ກຳນົດ 7 ທິດທາງໜ້າທີ່ໃຫຍ່ສຳລັບໃນໄລຍະຕໍ່ໜ້າ. ກອງປະຊຸມໄດ້ມອບໃຫ້ຄະນະບໍລິຫານງານສູນກາງພັກ ສະໄໝທີ 10 ຊີ້ນຳການຈັດຕັ້ງການຄົ້ນຄວ້າຮ່ຳຮຽນມະຕິຂອງກອງປະຊຸມໃຫຍ່ຄັ້ງນີ້ຢ່າງເປັນລະບົບ ເລິກເຊິ່ງ ໂດຍສະເພາະແມ່ນໃຫ້ພະນັກງານ ສະມາຊິກພັກຜູ້ທີ່ເປັນຫຼັກແຫຼ່ງຢູ່ໃນທຸກອົງການ, ຂະແໜງການ, ທຸກທ້ອງຖິ່ນທຸກຂົງເຂດວຽກງານ ແລະ ທຸກຂັ້ນ ໃຫ້ເຂົ້າໃຈຢ່າງຖືກຕ້ອງ ເພື່ອສາມາດຜັນຂະຫຍາຍເຂົ້າສູ່ວຽກງານຕົວຈິງ ທີ່ໃຫຍ່ຫລວງຂຶ້ນເລື່ອຍໆ; ພ້ອມກັນນີ້ກໍມອບໃຫ້ຄະນະບໍລິຫານງານສູນກາງພັກສືບຕໍ່ຄົ້ນຄວ້າ ຫັນທິດທາງໜ້າທີ່ຈຸດສຸມໃນບາງດ້ານ ເປັນມະຕິຂອງຄະນະບໍລິຫານງານສູນກາງພັກ ເພື່ອໃຫ້ຄະນະພັກຂັ້ນຕ່າງໆ ມີບ່ອນອີງອັນລະອຽດ ຈະແຈ້ງຕື່ມອີກ ສຳລັບການຈັດຕັ້ງປະຕິບັດ; ໃນຄະນະດຽວກັນ ກໍ່ຊີ້ນຳອົງການລັດ ໃຫ້ຫັນເປັນນິຕິກຳ, ເປັນແຜນການ ແລະ ໂຄງການວຽກງານລະອຽດໃຫ້ໄວ ເພື່ອຍາດແຍ່ງເວລາຈັດຕັ້ງປະຕິບັດເລີ່ມແຕ່ຫົວທີ ແລະ ໃຫ້ໄດ້ຮັບຜົນສຳເລັດອັນສະຫງ່າງາມ.

IMG_0836---(cut)

 

  1. ກອງປະຊຸມໄດ້ຮັບຟັງລາຍງານກ່ຽວກັບວິໄສທັດຮອດປີ 2030, ຍຸດທະສາດການພັດທະນາເສດຖະກິດ-ສັງຄົມ ໄລຍະ 10ປີ (2016-2020) ແລະ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ 8 (2016-2020) ຊຶ່ງຄຳຂວັນວິໄສທັດ ແລະ ຍຸດທະສາດຂອງການພັດທະນາແມ່ນ “ສູ້ຊົນພັດທະນາປະເທດເຮົາໃຫ້ຫຼຸດພົ້ນອອກຈາກສະຖານນະພາບດ້ອຍພັດທະນາໃນປີ 2020, ກ້າວໄປສູ່ປະເທດກຳລັງພັດທະນາ ທີ່ລາຍຮັບປານກາງສູງ ຕາມທິດການພັດທະນາສີຂຽວ ແລະ ຍືນຍົງ ເມື່ອເຖິງ 2030”. ຍຸດທະສາດ ແລະ ແຜນພັດທະນາດັ່ງກ່າວ ໂດຍມອບໃຫ້ຄະນະບໍລິຫານງານສູນກາງພັກຊີ້ນຳລັດຖະບານ ໃຫ້ຕັ້ງໜ້າຜັນຂະຫຍາຍເປັນແຜນການ, ໂຄງການລະດັບຊາດ, ລວມທັງກຳນົດຂອບການລົງງທຶນສຳລັບໂຄງການເຫຼົ່ານັ້ນ ພ້ອມທັງປຸກລະດົມບັນດາພາກສ່ວນເສດຖະກິດ ແລະ ທົ່ວປວງຊົນ ເຂົ້າໃສ່ການຈັດຕັ້ງປະຕິບັດໃຫ້ເປັນຈິງ.
  2. ກອງປະຊຸມໃຫຍ່ໄດ້ຮັບຮອງເອົາບົດສຳຫຼວດການນຳພາລວມຂອງການນຳພາລວມຂອງການຄະນະບໍລິຫານງານສູນກາງພັກ ສະໄໝ 9, ໂດຍໄດ້ຕີລາຄາສູງ ຕໍ່ຄວາມພະຍາຍາມອັນຕັ້ງໜ້າ ແລະ ຄວາມເປັນເຈົ້າການປະດິດສ້າງ ໃນການເສີມຂະຫຍາຍມູນເຊື້ອ ແລະ ບົດຮຽນຂອງພັກ, ສາມາດນຳພາຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ 9 ໄດ້ຮັບຜົນສຳເລັດອັນສຳຄັນໃນຫຼາຍດ້ານ ແລະ ມີບາງດ້ານກໍ່ລື່ນຄາດໝາຍ; ພ້ອມກັນນັ້ນ ກໍ່ສະແດງຄວາມຊົມເຊີຍຕໍ່ການເປັນຄະນະນຳທີ່ມີຄວາມສາມັກຄີເປັນເອກະພາບໜັກແໜ້ນ, ເປັນແກ່ນສານໃຫ້ແກ່ຄວາມສາມັກຄີ ເປັນເອກະພາບໃນທົ່ວພັກ, ທົ່ວລັດ, ທົ່ວກຳລັງປະກອບອາວຸດ ແລະ ທົ່ວປວງ; ທັງເປັນການເຈົ້າການແກ້ໄຂບັນຫາການເສື່ອມຖອຍດ້ານຄຸນທາດການເມືອງ, ຄຸນສົມບັດ ສິນທຳປະຕິວັດ ແລະ ການກະທຳທີ່ຝືນກັບກົດລະບຽບຂອງພັກໃນຖັນແຖວການນຳຂັ້ນຕ່າງໆ, ພະນັກງານ ສະມາຊິກພັກຈຳນວນໜຶ່ງ.

ກອງປະຊຸມໃຫຍ່ເລັ່ງທວງໃຫ້ຄະນະບໍລິຫານງານສູນກາງພັກສະໄໝທີ 10 ອອກແຮງເສີມຂະຫຍາຍຈຸດດີໃນດ້ານຕ່າງໆ ຢ່າງແຂງແຮງ, ພ້ອມກັນນັ້ນ ກໍ່ວາງມາດຕະການຈຳກັດ ແກ້ໄຂຈຸດບົກພ່ອງ ແລະ ຂໍ້ຄົງຂ້າງທີ່ຜ່ານມາຢ່າງຈິງຈັງ, ຍົກສູງຄວາມສາມາດນຳພາ ແລະ ຄວາມເປັນແບບຢ່າງນຳໜ້າ ຂອງຄະນະນຳຂອງພັກໃຫ້ເດັ່ນຂຶ້ນຕື່ມອີກ.

  1. ກອງປະຊຸມໄດ້ຮັບຟັງລາຍງານກ່ຽວກັບການດັດແປງກົດລະບຽບຂອງພັກ ແລະ ໄດ້ຮັບຮອງເອົາກົດລະບຽບສະບັບປັບປຸງ ສະໄໝທີ 10 ເພື່ອເປັນແນວທາງດ້ານຈັດຕັ້ງ ຮອງຮັບການຈັດຕັ້ງປະຕິບັດແນວທາງການເມືອງໃຫ້ປະກົດຜົນເປັນຈິງ. ກົດລະບຽບຂອງພັກປະຊາຊົນ ປະຕິວັດລາວສະບັບປັບປຸງໄດ້ຖືກຮັບຮອງເອົາຢ່າງເປັນທາງການໂດຍກອງປະຊຸມໃຫຍ່ຄັ້ງທີ 10ແລ້ວ ແລະມີຜົນບັງຄັບໃຊ້ ນັບແຕ່ມື້ກອງປະຊຸມໃຫຍ່ຮັບຮອງເອົາເປັນຕົ້ນໄປ.
  2. ກອງປະຊຸມໃຫຍ່ໄດ້ເລືອກຕັ້ງຄະນະບໍລິຫານງານສູນກາງພັກສະໄໝທີ 10 ເຊິ່ງປະກອບດ້ວຍກຳມະການສົມບູນ 69 ສະຫາຍ ແລະ ກຳມະການສຳຮອງ 8 ສະຫາຍ ເພື່ອແກ່ນສານຳພາ ທົ່ວພັກ, ທົ່ວລັດ, ທົ່ວກຳລັງປະກອບອາບຸດ ແລະ ທົ່ວປວງຊົນ ຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ 10 ຂອງພັກໃຫ້ມີຜົນສຳເລັດໃໝ່, ສ້າງບາດກ້າວບຸກທະລຸໃນການພັດທະນາໃຫ້ເປັນຈິງ ແລະ ພາປະເທດຊາດກ້າວຂຶ້ນຢ່າງໜັກແໜ້ນຕໍ່ໄປ.
  3. ກອງປະຊຸມຄົບຄະນະຄັ້ງປະຖົມມະລືກ ຂອງຄະນະບໍລິຫານງານສູນກາງພັກສະໄໝທີ 10 ທີ່ດຳເນີນໃນຕອນເຊົ້າຂອງວັນທີ 22 ມັງກອນ 2016 ໄດ້ເປັນເອກະພາບເລືອກຕັ້ງກຳມະການກົມການເມືອງສູນກາງພັກ ເຊິ່ງປະກອບດ້ວຍ 11 ສະຫາຍ; ໄດ້ເປັນເອກະພາບຢ່າງສູງເລືອກເອົາ ສະຫາຍບຸນຍັງວໍລະຈິດ ເປັນເລຂາທິການໃຫຍ່ຄະນະບໍລິຫານງານການເມືອງສູນກາງພັກ; ພ້ອມກັນນັ້ນ ກໍ່ເລືອກເອົາ ກຳມະການເລຂາທິການສູນກາງພັກ 9 ສະຫາຍ; ກອງປະຊຸມໄດ້ເລືອກເອົາສະຫາຍ ພັນຄຳ ວິພາວັນ ເປັນຜູ້ປະຈຳການຄະນະເລຂາທິການສູນກາງພັກ; ໃນກອງປະຊຸມຄັ້ງນີ້ໄດ້ເລືອກປະທານ, ບັນດາຮອງປະທານຄະນະກວດກາສູນກາງພັກ ປະກອບດ້ວຍ 9 ສະຫາຍ, ໂດຍແມ່ນສະຫາຍ ບຸນທອງ ຈິດມະນີ ເປັນປະທານ. ສຳລັບການແຕ່ງຕັ້ງທີ່ປຶກສາຂອງຄະນະບໍລິຫານງານສູນກາງພັກສະໄໝທີ 10, ກອງປະຊຸມໄດ້ມອບໃຫ້ກົມການເມືອງສູນກາງພັກເປັນຜູ້ຕົກລົງແຕ່ງຕັ້ງ, ພ້ອມທັງກຳນົດພາລະບົດບາດໜ້າທີ່ລະອຽດຕາມພາຍຫຼັງ.IMG_0856---(cut)
  4. ກອງປະຊຸມໃຫຍ່ໄດ້ສະແດງຄວາມຊົມເຊີຍ ສັນລະເສີນພະນັກງານ, ສະມາຊິກພັກ, ທະຫານ, ຕຳຫຼວດ, ຜູ້ປະກອບການຜະລິດ ທຸລະກິດ, ບໍລິການ ສັງກັດໃນທຸກພາກສ່ວນເສດຖະກິດ ແລະ ປະຊາຊົນລາວບັນດາເຜົ່າ, ບັນດາຊັ້ນຄົນ ໃນຂອບເຂດທົ່ວປະເທດ ແລະ ພີ່ນ້ອງເຊື້ອສາຍລາວຜູ້ຮັກຊາດ ທີ່ດຳລົງຊີວິດຢູ່ຕ່າງປະເທດ ທີ່ໄດ້ປະກອບສ່ວນຢ່າງຕັ້ງໜ້າເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ຕາມມະຕິຈິດໃຈຂອງກອງປະຊຸມໃຫຍ່ຄັ້ງທີ 10 ຕະຫຼອດໄລຍະ 5 ປີຜ່ານມາ ໃຫ້ບັນລຸຜົນສຳເລັດອັນສຳຄັນໃນຫຼາຍດ້ານ ອັນເປັນການສ້າງພື້ນຖານ ແລະ ຖ່ວງທ່າໃຫມ່ ໃຫ້ແກ່ການນຳເອົາປະເທດເຮົາສືບຕໍ່ກ້າວຂຶ້ນສູ່ຈຸດໝາຍທີ່ວາງໄວ້. ພ້ອມກັນນັ້ນ ກໍ່ຂໍສະແດງຄວາມຂອບອົກຂອບໃຈ ແລະ ຄວາມຮູ້ບຸນຄຸນຢ່າງເລິກເຊິ່ງ ມາຍັງບັນດາປະເທດອ້າຍນ້ອງ, ບັນດາປະເທດເພື່ອນມິດ ແລະ ອົງການຈັດຕັ້ງສາກົນ ທີ່ໄດ້ໃຫ້ການສະໜັບ ສະໜູນຊ່ວຍເຫຼືອອັນລ້ຳຄ່າ ແກ່ພາລະກິດພັດທະນາ ສ້າງສາປະເທດຊາດຂອງປະຊາຊົນເຮົາໃນ 5 ປີຜ່ານມາ.
  5. ກອງປະຊຸມໃຫຍ່ ຮຽກຮ້ອງມາຍັງຄະນະພັກທຸກຂັ້ນ, ສະມາຊິກພັກທຸກສະຫາຍ ຈົ່ງເຊີດຊູຄວາມເປັນແບບຢ່າງນຳໜ້າໃນທຸກດ້ານ ນຳພາມະຫາຊົນປະຕິບັດມະຕິຂອງກອງປະຊຸມໃຫຍ່ຄັ້ງນີ້ໃຫ້ປະກົດຜົນເປັນຈິງ. ພ້ອມກັນນີ້ ກໍ່ຮຽກຮ້ອງມາຍັງພະນັກງານ, ນັກຣົບ, ປະຊາຊົນລາວບັນດາເຜົ່າ, ບັນດາຊັ້ນຄົນ ແລະ ພີ່ນ້ອງເຊື້ອສາຍລາວຜູ້ຮັກຊາດ ທີ່ດຳລົງຊີວິດ ແລະ ທຳມາຫາກິນຢູ່ຕ່າງປະເທດ. ຈົ່ງເຊີດຊູນ້ຳໃຈຮັກຊາດ, ເສີມຂະຫຍາຍມານະຈິດບາກບັ່ນ ບຸກບືນ ເຂົ້າໃສ່ໃນການປະຕິບັດໜ້າທີ່ ທຳມາຫາກິນ ແລະ ສ້າງສາພັດທະນາ ເພື່ອສ້າງປະເທດລາວ ໃຫ້ມັ່ງຄັ່ງເຂັ້ມແຂງ, ປະຊາຊົນຮັ່ງມີຜາສຸກ, ສັງຄົມມີຄວາມສາມັກຄີປອງດອງ, ປະຊາທິປະໄຕ ຍຸດຕິທຳ ແລະ ສີວິໄລ. ພ້ອມກັນນັ້ນ ກໍ່ປະກອບສ່ວນຢ່າງສົມກຽດ ເຂົ້າໃນການສ້າງຄວາມຈະເລີນວວັດທະນາຂອງປະຊາຄົມອາຊຽນ ກໍ່ຄືພາລະກິດແຫ່ງການເສີມສ້າງສັນຕິພາບ ສະຖຽນລະພາບ ມິດຕະພາບ ແລະ ການຮ່ວມມື ເພື່ອການພັດທະນາໃນພາກພື້ນ ແລະ ໃນໂລກ.
Off

Comments are closed.