04th Jan2017

ສຳເລັດຝຶກອົບຮົມວຽກງານ ຄວບຄຸມລະບົບວົງຈອນປິດ

by somchan

ພັອ ສະແຫວງ ພົມມະລີ ຫົວໜ້າ ສູນຄວບຄຸມລະບົບວົງຈອນປິດ ໄດ້ສະຫຼຸບລາຍງານຜົນສຳເລັດການຈັດຕັ້ງປະຕິບັດ ແຜນການຈັດຊຸດຝຶກອົບຮົມວຽກງານ ຄວບຄຸມລະບົບວົງຈອນປິດ ໃຫ້ກຳລັງປ້ອງກັນຄວາມສະຫງົບ ທີ່ຮັບຜິດຊອບປະຕິບັດໜ້າທີ່ປະຈຳ ຢູ່ສູນຄວບຄຸມລະບົບວົງຈອນປິດ ຈຳນວນ 41 ຄົນ. ໂດຍໄດ້ຮັບການປະສານສົມທົບຮ່ວມມື ຈາກບໍລິສັດຫົວເວີຍປະຈຳລາວ.

ພັອ ສະແຫວງ ພົມມະລີ ຍັງໃຫ້ຮູ້ອີກວ່າ: ການຈັດຝຶກອົບຮົມຊຸດນີ້ ໃຊ້ເວລາທັງໝົດ 10 ວັນ ໃນການບັນຍາຍເອກະສານ, ຄົ້ນຄວ້າແລກປ່ຽນບົດຮຽນ. ພ້ອມທັງໄດ້ມີການສົນທະນາບັນຫາຕ່າງໆ ທີ່ກ່ຽວຂ້ອງກັບວຽກງານ ແລະ ການປະຕິບັດໜ້າທີ່ຕົວຈິງ ເພຶ່ອຍົກລະດັບຄວາມເຂົ້າໃຈຢ່າງເລິກເຊິ່ງຕໍ່ວຽກງານ, ພັດທະນາຄວາມຮູ້ ຄວາມສາມາດທາງດ້ານວຽກງານວິຊາສະເພາະ ເປັນຕົ້ນແມ່ນຄວາມສາມາດໃນການນຳພາບັນຊາ, ການຕິດຕາມສະພາບ, ການວາງແຜນແກ້ໄຂສະພາບທີ່ເກີດຂື້ນ, ການນຳໃຊ້, ການຮັກສາວັດຖຸອຸປະກອນເຕັກນິກ ແລະ ອື່ນໆ ເຊິ່ງຈະເປັນການປະ ກອບສ່ວນທີ່ສຳຄັນໃນການປ້ອງກັນຄວາມສະຫງົບ, ຄວາມເປັນລະບຽບຮຽບຮ້ອຍຂອງສັງຄົມ, ໂດຍສະເພາະແມ່ນ ການສະກັດກັ້ນແກ້ໄຂປະກົດການຫຍໍ້ທໍ້ຕ່າງໆໄດ້ຢ່າງທັນການ.

ໂອກາດນີ້ ພົຕ ສິນທະວົງ ໄຊຍະກອນ ກຳມະການ ສູນກາງພັກ ຮອງລັດຖະມົນຕີກະຊວງ ປກສ ຍັງໄດ້ມອບໃບຢັ້ງຢືນ ແລະ ໃບຊົມເຊີຍໃຫ້ຜູ້ທີ່ສຳເລັດການຝຶກອົບຮົມ. ພ້ອມກັນນີ້, ທ່ານຍັງໄດ້ເໜັ້ນໜັກໃຫ້ຄະນະບັນຊາ ນາຍ ແລະ ພົນຕຳຫຼວດ ທີ່ປະຈຳຢູ່ສູນຄວບຄຸມລະບົບວົງຈອນປິດໃນສູນບັນຊາໃຫ່ຍ ແລະ ສູນບັນຊາຢູ່ບັນດາເມືອງໃນນະຄອນຫຼວງວຽງຈັນ ເພີ່ມທະວີປະຕິບັດພາລະບົດບາດ, ໜ້າທີ່ດ້ວຍຄວາມຮັບຜິດຊອບສູງ ເພຶ່ອສຳເລັດໜ້າທີ່ການເມືອງທີ່ໄດ້ຮັບມອບໝາຍ.

Off

Comments are closed.