08th Jan2020

ກອງບັນຊາການ ປກສ ແຂວງໄຊຍະບູລີ ເປັນເຈົ້າການຊີ້ນຳ-ບັນຊາ

by somchan

ວາລະການດຳເນີນກອງປະຊຸມສະຫຼຸບວຽກງານ ປ້ອງກັນຄວາມສະຫົງບປະຈຳປີ 2019 ແລະ ທິດທາງແຜນການວຽກງານຈຸດສຸມ 2020, ໃນວັນທີ 8 ມັງກອນນີ້ ພາຍໃຕ້ການເປັນປະທານຂອງ ພົທ ວິໄລ ຫຼ້າຄຳຟອງ ເລຂາທິການສູນກາງພັກ ລັດຖະມົນຕີກະຊວງປ້ອງກັນຄວາມສະຫົງບ.

ໃນກອງປະຊຸມ ບັນດາກົມກອງອ້ອມຂ້າງກະຊວງ ແລະ ບັນດາກອງບັນຊາການ ປກສ ແຂວງ ໄດ້ສືບຕໍ່ປະກອບຄຳຄິດຄຳເຫັນ ໃນນັ້ນມີແຂວງໄຊຍະບູລີ ເຊິ່ງປະກອບໂດຍ ພັອ ຄຳ ແພງເພັດ ຫົວໜ້າກອງບັນຊາການປກສ ແຂວງໄດ້ກ່າວວ່າ: ສຳລັບວຽກງານການປົກປັກຮັກສາຄວາມສະຫົງບຮຽບຮ້ອຍຕາມຊາຍແດນ ກອງບັນຊາການ ປກສ ແຂວງໄຊຍະບູລີ ໄດ້ເປັນເຈົ້າການຊີ້ນຳບັນດາຫ້ອງວິຊາສະເພາະ, ບັນດາປກສເມືອງ ແລະ ດ່ານຊາຍແດນໃນທົ່ວແຂວງ ເອົາໃຈໃສ່ສົມທົບກັບກຳລັງປ້ອງກັນຊາດ ໃນການຕິດຕາມກຳແໜ້ນສະພາບການດ້ານຕ່າງໆໃນບໍລິເວນຊາຍແດນ, ສຸມໃສ່ຫັນກຳລັງລົງກໍ່ສ້າງຮາກຖານການເມືອງ-ພັດທະນາຊົນນະບົດຮອບດ້ານຕິດພັນກັບຂະບວນການແຂ່ງຂັນຮັກຊາດ ແລະ ພັດທະນາ, ຍູ້ແຮງວຽກງານ 3 ສ້າງລົງສູ່ລວງເລິກ ແລະ ໄດ້ຖືເອົາວຽກງານດັ່ງກ່າວເປັນວຽກງານຍຸດທະສາດຕົ້ນຕໍ ໃນການສ້າງຮາກຖານໃຫ້ມີຄວາມໜັກແໜ້ນເຂັ້ມແຂງ, ໂດຍສະເພາະເຂດລຽບຕາມຊາຍແດນ ເພື່ອອັດປ່ອງຂ້າມລອຍ, ສະກັດກັ້ນແກ້ໄຂບັນຫາຢາເສບຕິດ, ບັນຫາຄ້າຂາຍເຖື່ອນ ແລະ ບັນຫາປະກົດການຫຍໍ້ທໍ້ຕ່າງໆ ຄຽງຄູ່ກັນນັ້ນໄດ້ເອົາໃຈໃສ່ປັບປຸງ ປກສ ກຸ່ມ ປກສບ້ານ ຢູ່ລຽບຕາມຊາຍແດນ ໃຫ້ມີຄວາມໜັກແໜ້ນເຂັ້ມແຂງ, ປະຈຸບັນມີກຸ່ມບ້ານລຽບຕາມຊາຍແດນທັງໝົດ 27 ຫ້ອງການ ມີ ຈຳນວນພົນ 149 ສະຫາຍ, ມີປກສ ບ້ານ 752 ສະຫາຍ. ນອກນີ້ໃນກອງປະຊຸມຍັງໄດ້ຮັບຟັງການເຜີຍແຜ່ຂໍ້ຕົກລົງວ່າດ້ວຍລະບອບແບບແຜນວິທີເຮັດວຽກຂອງລັດຖະມົນຕີ ແລະ ຮອງລັດຖະມົນຕີ, ຄຳແນະນຳການຈັດຕັ້ງປະຕິບັດກົດໝາຍວ່າດ້ວຍກຳລັງປ້ອງກັນຄວາມສະຫົງບປະຊາຊົນ ສະບັບປັບປຸງ ກ່ຽວກັບການປະດັບຊັ້ນ, ເລື່ອນຊັ້ນ, ດັດແກ້ຊັ້ນ, ເລື່ອນຂ້າມຊັ້ນ ແລະ ການຍົກຂັ້ນເງິນເດືອນ ໃຫ້ນາຍ ແລະ ພົນຕຳຫຼວດ ແລະ ຂໍ້ຕົກລົງວ່າດ້ວຍການປະສານງານຂອງຫ້ອງວ່າການກະຊວງ ກັບ ກົມກອງອ້ອມຂ້າງກະຊວງ ແລະ ກອງບັນຊາການປ້ອງກັນຄວາມສະຫົງບຂັ້ນແຂວງ ແລະ ນິຕິກຳອື່ນໆອີກ.

Off

Comments are closed.