10th Nov2015

ສື່ມວນຊົນປະກອບສ່ວນຢ່າງຕັ້ງໜ້າ ເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ.

by somchan

ພາຍໃຕ້ການນຳພາຂອງພັກປະຊາຊົນ ປະຕິວັດລາວ ບໍ່ວ່າຈະເປັນໄລຍະຕໍ່ສູ້ກູ້ຊາດ ຫຼື ໄລຍະຈັດຕັ້ງປະຕິບັດປົກປັກຮັກສາ ແລະ ສ້າງສາພັດທະນາປະເທດຊາດ ຕາມແນວທາງປ່ຽນແປງໃຫມ່ຮອບດ້ານຂອງພັກ ວຽກງານສື່ມວນຊົນແມ່ນມີບົດບາດສຳຄັນຢູ່ແຖວໜ້າຂອງວຽກງານສຶກສາອົບອົມການເມືອງແນວຄິດ ເປັນພາຫະນະອັນແຫຼມຄົມຂອງພັກໃນການເຕົ້າໂຮມ, ປຸກລະດົມຂົນຂວາຍປະຊາຊົນບັນດາເຜົ່າເຂົ້າຂະບວນການປະຕິວັດ; ພ້ອມທັງເຮັດໜ້າໜ້າເຜີຍແຜ່ແນວທາງນະໂຍບາຍຂອງພັກ, ລະບຽບກົດໝາຍ ການພັດທະນາເສດຖະກິດ-ສັງຄົມ ຕິດພັນກັບຜົນສຳເລັດການຈັດຕັ້ງປະຕິບັດວຽກງານກໍ່ສ້າງຮາກຖານການເມືອງພັດທະນາຊົນນະບົດຮອບດ້ານ ວຽກງານການສ້າງແຂວງເປັນຫົວໜ່ວຍຍຸດທະສາດ ສ້າງເມືອງເປັນຫວົໜ່ວຍເຂັ້ມແຂງຮອບດ້ານ ສ້າງບ້ານເປັນຫົວໜ່ວຍພັດທະນາ, ຜົນສຳເລັດການປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານຂອງພັກ ແລະ ວຽກງານອື່ນໆໄປສູ່ປະຊາຊົນຊັ້ນຄົນຕ່າງໆໄດ້ຮັບຮູ້ຢ່າງໄວວາ. ຍ້ອນເຫັນໄດ້ຄວາມສຳຄັນ ຍາມໃດພັກ-ລັດຖະບານ ກໍໄດ້ເອົາໃຈໃສ່ຊີ້ນຳ-ນຳພາຢ່າງໃກ້ຊິດ ທັງສ້າງເງື່ອນໄຂໃຫ້ສື່ມວນຊົນໄດ້ເຄື່ອນໄຫວຕາມພາລະບົດບາດ ແລະ ຈັນຍາບັນຂອງຕົນ. ນອກຍີ້ຍັງໄດ້ມີນະໂຍບາຍສົ່ງເສີມການພັດທະນາວຽກງານສື່ມວນຊົນ ໃຫ້ມີການຂະຫຍາຍຕົວຢ່າງກວ້າງຂວາງ-ປະກອບບຸກຄະລະກອນ, ສະໜອງງົບປະມານ, ພາຫະນະ, ອຸປະກອບເຕັກນິກທັນສະໄໝ,ການກະຈາຍ, ການຈຳໜ່າຍ, ການປ້ອງກັນ ແລະ ອື່ນໆ. ໃນນີ້, ສື່ມວນຊົນປ້ອງກັນຄວາມສະຫງົບໃນຖານະເປັນສື່ໜຶ່ງໃນວົງຄະນາຍາດສື່ມວນຊົນແຫ່ງຊາດ ກໍໄດ້ສຸມສະຕິປັນຍາ, ເຫື່ອແຮງເພື່ອເຮັດໃຫ້ການຖະແຫຼ່ງຂ່າວຂອງຕົນມີຫຼາຍສີສັນ ຕອບສະໜອງໄດ້ກັບຄວາມຮຽກຮ້ອງຕ້ອງການຂອງສັງຄົມ, ໄດ້ຖະແຫຼ່ງຂ່າວ ຊີ້ແຈ້ງເຫດການທີ່ເກີດຂຶ້ນໃນສັງຄົມຢ່າງທັນການ, ພ້ອມດຽວກັນນີ້ຍັງໄດ້ເປັນເຈົ້າການເຜີຍແຜ່ປະກົດການຫຍໍ້ທໍ້ຕ່າງໆທີ່ເກີດຂຶ້ນໃຫ້ສັງຄົມໄດ້ຮັບຮູ້ ຕອບຕ້ານຖອຍທຳນອງການໂຈມຕີໃສ່ຮ້າຍປ້າຍສີຂອງອິດທິກຳລັງປໍລະປັກ, ປຸກລະດົມຄວາມສາມັກຄີຄວາມເຊື້ອນໝັ້ນຂອງປະຊາຊົນຕໍ່ການນຳພາຂອງພັກ, ສືບຕໍ່ດຳເນີນພາລະກິດປ່ຽນແປງໃຫມ່ດ້ວຍຄວາມເດັດດ່ຽວໜຽວແໜ້ນ, ຮັກສາສະຖຽນລະພາບທາງດ້ານການເມືອງ, ຄວາມສະຫງົບປອດໄພ ແລະ ຄວາມເປັນລະບຽບຮຽບຮ້ອຍທາງສັງຄົມ. ຖັນແຖວພະນັກງານທີ່ເຮັດວຽກງານສື່ມວນຊົນໃນກຳລັງປ້ອງກັນຄວາມສະຫົງບໄດ້ເຕີບໃຫຍ່ຂະຫຍາຍຕົວທາງດ້ານປະລິມານ ແລະ ຄຸນນະພາບ, ມີທັດສະນະຫຼັກໝັ້ນການເມືອງຈະແຈ້ງ, ສະດຸ້ງໄວ້ ແລະ ມີຄວາມຊຳນຊຳນານທາງດ້ານວຽກງານວິຊາສະເພາະດີຂື້ນ. ປັດຈຸບັນສື່ມວນຊົນປ້ອງກັນຄວາມສະຫງົບປະກອບດ້ວຍ ສື່ສິ່ງພິມ ມີ ໜັງສືພິມ ແລະ ວາລະສານ, ສຳລັບສື່ອີເລັກໂຕນິກມີ ສະຖານີວິທະຍຸກະຈາຍສຽງ ແລະ ສະຖານີໂທລະພາບ. ເຊິ່ງໃນນີ້ ໜັງສືພິມແມ່ນຈຳໜ່າຍເປັນລາຍວັນ, ວາລະສານເປັນລາຍເດືອນ, ວິທະຍຸກະຈາຍສຽງອອກອາກາດ 19 ຊົ່ວໂມງ ມີ 24 ລາຍການ ແລະ ໂທລະພາບອອກອາກາດ 24 ຊົ່ວໂມງ. ເພື່ອຕອບສະໜອງກັບຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່ ສື່ມວນຊົນປ້ອງກັນຄວາມສະຫງົບຍັງໄດ້ມີແຜນການປັບປຸງວຽກງານຂອງແຕ່ລະສື່ເພື່ອເຮັດໃຫ້ສື່ມວນຊົນປ້ອງກັນຄວາມສະຫງົບເຮັດຫຼ້ອນໜ້າທີ່ເປັນເສນາທິການໃນການສະໜອງຂໍ້ມູນ-ຂ່າວສານຢ່າງວອງໄວ ແລະ ທັນການ, ມີເນື້ອໃນທີ່ອຸດົມສົມບູນສາມາສ່ອງແສງສັງຄົມ, ຄວາມສະຫງົບຄວາມເປັນລະບຽບຮຽບຮ້ອຍ, ຜະລິດລາຍການໃຫ້ມີເນື້ອໃນອຸດົມສົມບູນຫຼາຍຮູບຫຼາຍສີ, ມີຊີວິດຊີວາ ແລະ ສາມາດດຶງດູດຫຼື ເປັນທີ່ນິຍົມຊົມຊອບຜູ້ຟັງ-ຜູ້ຊົມ-ຜູ້ອ່ານໄດ້ເປັນຢ່າງດີ.

Off

Comments are closed.