30th Jul2019

ຫົວໜ້າກົມໃຫຍ່ການເມືອງ ກະຊວງ ປກສ ຢ້ຽມຢາມ ແລະ ໂອ້ລົມ ພະນັກງານຫຼັກແຫຼ່ງ ກອງບັນຊາການ ປກສ ແຂວງວຽງຈັນ

by somchan

ໃນ​ວັນ​ທີ 26 ກໍລະກົດ 2019 ຜ່ານມານີ້ ພົຕ ວັນທອງ ກອງມະນີ ຫົວໜ້າກົມໃຫຍ່ການເມືອງ ກະຊວງ ປກສ ພ້ອມຄະນະໄດ້ເຄື່ອນໄຫວ ລົງຢ້ຽມຢາມ ແລະ ໂອລົມ ພະນັກງານຫຼັກແຫຼ່ງ ກອງບັນຊາການ ປກສ ແຂວງວຽງຈັນ ໃຫ້ກຽດຕ້ອນຮັບ ໂດຍ ພົຈວ ປອ ທອງເຄນ ບຸນໜັ້ນ ຫົວໜ້າກອງບັນຊາການ ປກສ ແຂວງວຽງຈັນ ມີຄະນະພັກ-ຄະນະກອງບັນຊາການ, ພະນັກງານຫຼັກແຫຼ່ງຈາກຫ້ອງ,ກອງພັນ, ຄ້າຍຄຸມຂັງ-ດັດສ້າງ ພ້ອມດ້ວຍຄະນະກອງບັນຊາການ ປກສ ເມືອງ 11 ເມືອງເຂົ້າຮ່ວມຢ່າງພ້ອມພຽງ.

ພົຈວ ປອ ທອງເຄນ ບຸນໜັ້ນ ຫົວໜ້າກອງບັນຊາການ ປກສ ​ແຂວງ​ວຽງຈັນ ໄດ້​ລາຍ​ງານ​ສະພາບ​ຈຸດ​ພິ​ເສດ, ທີ່​ຕັ້ງ ​ແລະ ​​ການຈັດຕັ້ງປະຕິບັດໜ້າທີ່​ວຽກງານວິຊາ​ສະ​ເພາະ​ໃນ​ໄລຍະຜ່ານມາ ທີ່​ພົວພັນ​ເຖິ່ງ​ວຽກງານປ້ອງ​ກັນ​ຄວາມ​ສະຫງົບ​ຢູ່​ພາຍໃນແຂວງໂດຍ​ຫຍໍ້ ​ເຊິ່ງ​​​ໄດ້​ຍົກ​ໃຫ້​ເຫັນຜົນງານ​ຫຼາຍດ້ານ​ ທີ່​ພະນັກງານ-ນັກຮົບ​ ຍາດ​ມາ​ໄດ້​ໃນໄລຍະຜ່ານມາ ​ແລະ ບາງບັນຫາຂໍ້ຄົງຄ້າງ​ທີ່​ຈະ​ຕ້ອງ​ໄດ້​ພ້ອມ​ກັນ​ແກ້​ໄຂ​ໃນຕໍ່ໜ້າ. ​ໃນ​ໄລຍະ 1 ປີຜ່ານມາ ຄະນະ​ພັກ – ຄະນະ​ບັນຊາ​ແຕ່ລະຂັ້ນ ​ແມ່ນ​ໄດ້​ຖື​ເອົາວຽກງານສຶກສາ​ອົບຮົມ​ການ​ເມືອງ​ແນວ​ຄິດ     ​ເປັ​ນບັນຫາ​ສຳຄັນ​ຕົ້ນຕໍ ຕິດ​ພັນ​ກັບ​ວຽກງານ​ປ້ອງ​ກັນຊາ​ດ – ປ້ອງ​ກັນ​ຄວາມ​ສະຫງົບ​ ຕັ້ງໜ້າຫັນເອົາພະນັກງານ – ນັກຮົບ ລົງກໍ່ສ້າງຮາກຖານການເມືອງປະຈຳ​ຢູ່​ແຕ່​ລະ​ກຸ່ມບ້ານ ​ເພື່ອ​ພ້ອມ​ກັນສະກັດ​ກັ້ນ ​ແລະ​ ແກ້​ໄຂ​ສະພາບ​ປະກົດ​ການ​ຫຍໍ້​ທໍ້​ດ້ານ​ຕ່າງໆ​ ໃຫ້​ນັບ​ມື້ລຸດໜ້ອຍຖອຍລົງ​ເທື່ອ​ລະ​ກ້າວ ​ເຮັດ​ໃຫ້ພື້ນທີ່​ຂອງ​​ແຕ່ເມືອງ​​ມີ​ຄວາມ​ສະຫງົບ​​ປອດ​ໄພໂດຍ​ພື້ນຖານ, ສັງຄົມ​ມີ​ຄວາມ​ເປັນ​ລະບຽບຮຽບຮ້ອຍ​ດີ ແລະ ວຽກງານອື່ນໆ ກໍ່ໄດ້ເອົາໃຈໃສ່ຢ່າງຕັ້ງໜ້າ.

​ຈາກນັ້ນ​ ພົຕ ວັນທອງ ກອງມະນີ ຫົວໜ້າກົມໃຫຍ່ການເມືອງ ປກສ ໄດ້​ໂອ້​ລົມ ​ແລະ​ ຊີ້ນຳ​ວຽກງານ​ປ້ອງກັນຄວາມສະຫງົບ ເຊີ່ງກ່ອນອື່ນ ທ່ານໄດ້ສະ​ແດງ​ຄວາມ​ຍ້ອງຍໍ​ຊົມ​ເຊີຍ​ຕໍ່ກັບຜົນງານ ທີ່​ບັນດາ​ ​ຄະນະ​ພັກ – ຄະນະ​ບັນຊາ​ ປກສ ແຂວງ ​ ​ແລະ​ ພະນັກງານ-ນັກຮົບ​​ສາ​ມາດຍາດມາ​ໄດ້​ໃນ​ໄລຍະຜ່ານ​ມາ ພ້ອມ​ທັງ ໄດ້​ຮຽກ ຮ້ອງ​ໃຫ້​ຄະນະ​ພັກ -​ ຄະນະ​ບັນຊາ​ ແຕ່ລະ​ຂັ້ນ​ຕ້ອງ​ເອົາ​ໃຈ​ໃສ່​ຕໍ່ວຽກງານ​ສຶກສາ​ອົບຮົມ​ການ​ເມືອງ​ແນວ​ຄິດ​ໃຫ້​ແກ່​ພະນັກງານ-ນັກຮົບ ຢ່າງ​ເປັນ​ປົກະຕິ,​ ເພີ່ມທະວິການເຄືອນໄຫວວຽກງານວິຊາສະເພາະໃຫ້ເຂັ້ມແຂງ, ເປັນຕົ້ນການເກັບກໍາຂ່າວ, ປະມວນຂ່າວ, ເກັບກໍາເປົ້າໝາຍ, ເຂັ້ມງວດກວດກາໃນການຮັບລັດຖະກອນ ຢູ່ໃນສໍານັກງານອົງການ, ຊອກຮູ້ການສະກັດກັ້ນ, ຕ້ານການແຊກຊືມຈາກພາຍນອກ, ສ້າງ​ຄວາມ​ສາມັກຄີ​ພາຍ​ໃນຢ່າງ​ແໜ້ນ​ແຟ້ນ, ຕ້ອງ​ມີ​ຄວາມ​ສະດຸ້ງ​ໄວ, ເອົາ​ໃຈ​ໃສ​ປັບປຸງ​ແບບ​ແຜນ​ວິ​ທີ​ເຮັດ​ວຽກ, ​ແບບ​ແຜນ​ວິທີ​ນຳພາ​​ໃຫ້​ສອດຄ່ອງ​ກັບ​ຕົວ​ຈິງ, ​ເຮັດ​ວຽກຕາມ​ລະບອບ​ລວມສູນ​ປະຊາທິປະ​ໄຕ ​ໂດຍ​ຖື​ເອົາການຄົ້ນຄວ້າ​ປຶກສາ​ຫາລື​ຕົກລົງ​ບັນຫາ​ເປັນໝູ່ຄະນະ, ມອບ​ວຽກໃຫ້​ບຸກຄົນ​ຮັບຜິດຊອບ, ມີ​ການ​ສຳ​ຫຼວດກວດກາ​ຢ່າງ​ເປັນ​ປົກະຕິ, ສຽງສ່ວນ​ນ້ອຍ​ຕ້ອງຂຶ້ນກັບສຽງສ່ວນ​ຫຼາຍ, ພ້ອມ​ນັ້ນຄະນະ​ພັກ – ຄະນະ​ບັນຊາ ​ແຕ່ລະ​ຂັ້ນກໍ່ຕ້ອງ​ເປັນ​ແບບຢ່າງ​ທີ່​ດີ​ໃຫ້​ພະນັກງານ-ນັກຮົບ, ມີ​ຄຸນ​ທາດ​ການ​ເມືອງໜັກ​ແໜ້ນ, ມີທັດສະນະ​ຄຸນສົມບັດ​ດີ, ທັງ​ເປັນ​ທີ່​ເພິ່ງ​ຂອງ​ປະຊາຊົນ, ​ເພື່ອ​ຜົນ​ປະ​ໂຫຍ​ດຂອງປະຊາຊົນ ​ແລະ ​ຮັບ​ໃຊ້​ປະຊາຊົນຢ່າງ​ແທ້​ຈິງ ​​ພ້ອມ​ກັນສືບຕໍ່​ຊີ້ນຳ-ນຳພາ​ພະນັກງານ-ນັກຮົບ​ຂອງ​ຕົນ ເອົາ​ໃຈ​ໃສ່​ຕໍ່ວຽກງານ​ປ້ອງ​ກັນ​ສະກັດ​ກັ້ນ ​ແລະ​ ແກ້​ໄຂ​ປະກົດ​ການ​ຫຍໍ້​ທໍ້​ທີ່​ເກີດ​ຂື້ນ​ໃນ​ສັງຄົມ​ໃຫ້​ໄດ້​ຮັບ​ຜົນສຳ​ເລັດ ​ແລະ ​ມີ​ຜົນງານ​ຍິ່ງ​ໃຫຍ່​ຂຶ້ນກວ່າ​ເກົ່າ. ​.

 

Off

Comments are closed.