10th Aug2017

ຫົວໜ້າກົມໃຫຍ່ສັນຕິບານ ເຄື່ອນໄຫວຊີ້ນຳວຽກງານຢູ່ ປກສ ແຂວງເຊກອງ

by somchan

ວັນທີ 7 ສິງຫາ 2017 ນີ້ ພົຈວ ບຸນມີ ແສງຄຳຢອງ ຄະນະປະຈຳພັກກະຊວງ ຫົວໜ້າກົມໃຫຍ່ສັນຕິບານ ປກສ ພ້ອມດ້ວຍຄະນະໄດ້ເຄື່ອນໄຫວພົບປະ, ຊີ້ນຳວຽກງານຢູ່ກອງບັນຊາການ ປກສ ແຂວງເຊກອງ.

ໃນໂອກາດນີ້ ພັນໂທ ສົມສັກ ຂັດຕິຍະວົງ ຮອງຫົວໜ້າກອງບັນຊາການ ປກສ ແຂວງເຊກອງ ໄດ້ລາຍງານສະພາບທີ່ພົ້ນເດັ່ນພາຍໃນແຂວງ ແລະ ລາຍງານການເຄື່ອນໄຫວວຽກງານໃນໄລຍະຜ່ານມາ ເປັນຕົ້ນແມ່ນການຄຸ້ມຄອງກວດກາ, ຕິດຕາມບັນດາບໍລິສັດທີ່ເຂົ້າລົງທຶນພາຍໃນແຂວງ ມີທັງໝົດ 60 ບໍລິສັດ, ບໍລິສັດພາຍໃນມີ 31 ບໍລິສັດ ຂອງຕ່າງປະເທດມີ 29 ບໍລິສັດ, ມີ 6ປະເທດ, ໄດ້ຮັບອະນຸມັດຂັ້ນແຂວງ 36 ບໍລິສັດ ແລະ ຂັ້ນສູນກາງມີ 24 ບໍລິສັດ, ໂຄງການຊ່ວຍເຫຼືອລ້າຂອງສາກົນມີ 37 ໂຄງການ, ໄດ້ຂຶ້ນສະຖິຕິຄຸ້ມຄອງຈຳນວນພະນັກງານທີ່ເຮັດວຽກນຳໂຄງການຂອງສາກົນ ມີທັງໝົດ 242 ຄົນ ຕ່າງປະເທດ 11 ຄົນ, ມີ 6 ສັນຊາດ, ໃນນັ້ນ ມີໂຄງການທີ່ບໍ່ສັງກັດລັດຖະບານມີ 172 ຄົນ ຕ່າງປະເທດ11 ຄົນ, ພ້ອມກັນນັ້ນ ກໍ່ໄດ້ເອົາໃຈໃສ່ຄຸ້ມຄອງຄົນຕ່າງປະເທດທີ່ແຕ່ງດອງກັບພົນລະເມືອງລາວ, ຂໍຢູ່ລາວຖາວອນ, ຄົນຕ່າງດ້າວດຳເນີນທຸລະກິດ, ອອກແຮງງານມີ 2.322 ຄົນ, ໃນນີ້ ແຕ່ງດອງກັບພົນລະເມືອງລາວ 42 ຄູ່. ຕ່າງປະເທດຂໍຢູ່ລາວຖາວອນມີ 7 ຄອບຄົວ ມີ 17 ຄົນ, ຄົນຕ່າງດ້າວມີ 11 ຄອບຄົວ ລວມມີ 28 ຄົນ, ຄົນຕ່າງປະເທດທີ່ມາດຳເນີນທຸລະກິດ, ອອກແຮງງານ ແລະ ຄ້າຂາຍ ລວມທັງໝົດ 2.220 ຄົນ, ເອກະສານຖືກຕ້ອງມີ 236 ຄົນ, ເອກະສານບໍ່ຖືກຕ້ອງ 1.984 ຄົນ, ຂຶ້ນທະບຽນ ແລະ ອອກບັດອະນຸຍາດເຄື່ອນໄຫວຊົ່ວຄາວໃຫ້ຄົນຕ່າງປະເທດໃນໄລຍະ 1 ປີ ຜ່ານມາມີ: 236 ຄົນ ຍິງ 18ຄົນ, ລວມມີ 5 ສັນຊາດ ແລະ ຄະດີຂອງຄົນຕ່າງປະເທດມີ 09 ລາຍ.

ໂອກາດລົງພົບປະ ແລະ ຊີ້ນຳວຽກງານໃນຄັ້ງນີ້ ພົຈວ ບຸນມີ ແສງຄຳຢອງ ໄດ້ຍ້ອງຍໍຊົມເຊີຍຕໍ່ຜົນງານ ໂດຍສະເພາະແມ່ນກຳລັງສັນຕິບານທີ່ຍາດມາໄດ້ ພ້ອມທັງໄດ້ເໜັ້ນໜັກໃຫ້ຄະນະພັກ-ຄະນະບັນຊາ ເອົາໃຈໃສ່ສືບຕໍ່ນຳພາພະນັກງານ-ນັກຮົບ ເອົາໃຈໃສ່ເກັບກຳສະພາບການເຄື່ອນໄຫວຂອງສັດຕູ ແລະ ພວກຄົນບໍ່ດີ ເພື່ອດຳເນີນການສະກັດກັ້ດແກ້ໄຂໃຫ້ທັນການ ແນໃສ່ຮັບປະກັນໃຫ້ທົ່ວແຂວງມີຄວາມສະຫງົບ ແລະ ເປັນລະບຽບຮຽບຮ້ອຍຢ່າງໜັກແໜ້ນ.

ຂ່າວຍັງໃຫ້ຮູ້ຕື່ມອີກວ່າ:ໃນໄລຍະດຽວກັນນີ້ ພົຈວ ບຸນມີ ແສງຄຳຢອງ ຄະນະປະຈຳພັກກະຊວງປ້ອງກັນຄວາມສະຫງົບ ຫົວໜ້າກົມໃຫຍ່ສັນຕີບານ ພ້ອມຄະນະໄດ້ລົງຢ້ຽມຢາມ ແລະ ເຮັດວຽກຢູ່ ປກສ ແຂວງ ອັດຕະປື.

ພັທ ສີເວີນ ແກ້ວສີວົງສາ ຮອງເລຂາຄະນະພັກ ຮອງກອງບັນຊາການ ປກສ ແຂວງອັດຕະປື ໄດ້ລາຍງານສະພາບຄວາມບໍ່ສະຫງົບໂດຍຫຍໍ້ ເປັນຕົ້ນແມ່ນການລັກລອບຂຸດຄົ້ນຊັບພະຍາກອນທຳມະຊາດໂດຍບໍ່ໄດຮັບອະນຸຍາດເຊັ່ນ: ການຂຸດຄົ້ນຄຳ, ການຂຸດຄົ້ນຫີນອ່ອນຢູ່ເຂດພູກາງໂຮງ, ບັນຫາການເຄື່ອນທາງດ້ານສາສະໜາ ແລະ ບັນຫາການລັກລອບຄ້າຂາຍເຖື່ອນຢູ່ຕາມຂອບເຂດຊາຍແດນ ແລະອື່ນໆ.

ພ້ອມນັ້ນຍັງໄດ້ຮັບຟັງການໂອ້ລົມຈາກທ່ານ ພົຈວ ບຸນມີ ແສງຄຳຢອງ ເຊິ່ງທ່ານໄດ້ເໜັ້ນໜັກ 3 ບັນຫາໃຫຍ່ຄື: ສະພາບພົ້ນເດັ່ນທີ່ສະທ້ອນເຖິງຄວາມບໍ່ສະຫງົບທາງດ້ານການເມືອງ ແລະ ຄວາມບໍ່ເປັນລະບຽບຮຽບຮ້ອຍຂອງສັງຄົມ, ທັດສະນະຂອງກຳລັງ ປກສ ຕໍ່ບັ້ນດຳເນີນຊີວິດການເມືອງປັບປຸງປົວແປງພັກ, ການຍົກຍົກສູງຄຸນນະພາບຂອງກຳລັງ ປກສ ກໍ່ຄືກຳລັງສັນຕິບານ ໃນການປະຕິບັດວຽກງານວິຊາສະເພາະໃຫ້ມີປະສິດທິຜົນສູງ.

Off

Comments are closed.