05th Jun2019

ຫົວໜ້າກົມໃຫ່ຍການເມືອງຕ້ອນຮັບການເຂົ້າຢ້ຽມຂ່ຳນັບຂອງ ພັນເອກ ຫງວຽນ ຊຸຍຊັວດ ກະຊວງຕຳຫຼວດຫວຽດນາມ

by somchan

 

ພົນຕີ ວັນທອງ ກອງມະນີ ຫົວໜ້າກົມໃຫ່ຍການເມືອງ ປ້ອງກັນຄວາມສະຫງົບ ພ້ອມດຽວຄະນະ ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ພັນເອກ ຫງວຽນ ຊຸຍຊັວດ ຮອງຫົວໜ້າກົມຈັດຕັ້ງ, ກະຊວງຕຳຫຼວດຫວຽດນາມ ພ້ອມດ້ວຍຄະນະ ໃນວັນທີ 4 ມິຖຸນາ ນີ້

ຢູ່ທີ່ຫ້ອງຮັບແຂກກະຊວງປ້ອງກັນຄວາມສະຫງົບ, ໃນໂອກາດທີ່ທ່ານໄດ້ມາຢ້ຽມຢາມ ແລະ ເຮັດວຽກຢູ່ສາທາລະນະລັດ ປະຊາທິປະໄຕ ປະຊາຊົນລາວ ຮ່ວມກັບກົມໃຫ່ຍການເມືອງປ້ອງກັນຄວາມສະຫງົບ.

ພັນເອກ ຫງວຽນ ຊຸຍຊັວດ ຮອງຫົວໜ້າກົມຈັດຕັ້ງ, ກະຊວງຕຳຫຼວດຫວຽດນາມ ໄດ້ລາຍງານໃນການເຮັດວຽກງານຮ່ວມກັບຄະນະພັກກົມໃຫ່ຍການເມືອງປ້ອງກັນຄວາມສະຫງົບ ໃຫ້ທ່ານຫົວໜ້າກົມໃຫ່ຍການເມືອງ ປ້ອງກັນຄວາມສະຫງົບ ໄດ້ຮັບຊາບ ເປັນຕົ້ນແມ່ນວຽກງານການພົວພັນຮ່ວມມືຊ່ວຍເຫຼືອເຊິ່ງກັນ ແລະ ກັນທາງດ້ານວຽກງານວິຊາສະເພາະ ເຊັ່ນການພົວພັນຮ່ວມມືໃນການບຳລຸງກໍ່ສ້າງນາຍຕຳຫຼວດໃນກຳລັງປ້ອງກັນຄວາມສະຫງົບ, ການແລກປ່ຽນບົດຮຽນຂອງຄະນະຜູ້ແທນທັງສອງກະຊວງປ້ອງກັນຄວາມສະຫງົບລາວ ແລະ ຫວຽດນາມ ເປັນຕົ້ນແມ່ນກົມໃຫ່ຍການເມືອງປ້ອງກັນຄວາມສະຫງົບ ກັບກົມຈັດຕັ້ງກະຊວງຕຳຫຼວດຫວຽດນາມ ແລະ ວຽກງານອື່ນໆ.

ໃນໂອກາດທີ່ມີຄວາມໝາຍສຳຄັນນີ້ ພົນຕີ ວັນທອງ ກອງມະນີ ຫົວໜ້າກົມໃຫ່ຍການເມືອງ ປ້ອງກັນຄວາມສະຫງົບ ໄດ້ກ່າວສະແດງຄວາມຕ້ອນຮັບຢ່າງອົບອຸ່ນ, ມີໄມຕີຈິດມິດຕະພາບແບບອ້າຍນ້ອງ ແລະ ພ້ອມທັງຕີລາຄາສູງຕໍ່ການມາເຮັດວຽກຂອງຄະນະຜູ້ແທນກົມຈັດຕັ້ງ ກະຊວງຕຳຫຼວດຫວຽດນາມ ແລະ ເຂົ້າຢ້ຽມຂ່ຳນັບໃນຄັ້ງນີ້ ເຊິ່ງເປັນການປະກອບສ່ວນອັນສຳຄັນເຂົ້າໃນການເພີ່ມທະວີຮັດແໜ້ນສາຍພົວພັນມິດຕະພາບ ຄວາມສາມັກຄີພິເສດ ແລະ ການຮ່ວມມືຮອບດ້ານ ທີ່ເປັນມູນເຊື້ອຂອງສອງຊາດ ສອງກຳລັງເວົ້າລວມ, ເວົ້າສະເພາະແມ່ນກົມໃຫ່ຍການເມືອງປ້ອງກັນຄວາມສະຫງົບ ກັບກົມຈັດຕັ້ງກະຊວງຕຳຫຼວດຫວຽດນາມ  ໃຫ້ແໜ້ນແຟ້ນ ແລະ ເຕີບໃຫ່ຍຂະຫຍາຍຕົວຍິ່ງໆ.

ພ້ອມນີ້ ພັນເອກ ຫງວຽນ ຊຸຍຊັວດ ກໍ່ໄດ້ສະແດງຄວາມຂອບໃຈຕໍ່ຫົວໜ້າກົມໃຫ່ຍການເມືອງປ້ອງກັນຄວາມສະຫງົບ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ຈະນຳເອົາເນື້ອໃນຈິດໃຈບົດຮຽນທີ່ໄດ້ຖອດຖອນແລກປ່ຽນກັນໃນຄັ້ງນີ້ນຳໄປຈັດຕັ້ງຜັນຂະຫຍາຍໃຫ້ໄດ້ຮັບໝາກຜົນສູງສຸດໃນຕໍ່ໜ້າ.

Off

Comments are closed.