30th Jul2018

ຫຼາຍພາກສ່ວນມອບນ້ຳໃຈຊ່ວຍເຫຼືອ ໄພນ້ຳຖ້ວມ

by somchan

ໃນວັນທີ 27 ກໍລະກົດ ນີ້ ປອ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການ ສັງຄົມ ພ້ອມຄະນະໄດ້ຮັບເຄື່ອງຊ່ວຍເຫຼືອຈາກ ພາກສ່ວນຕ່າງໆ ເປັນຕົ້ນ ບໍລິສັດ ແດນສະຫວັນ ນ້ຳງື່ມລີຊອດ ມອບເງິນ 6 ຮ້ອຍລ້ານກີບ, ກຸ້ມບໍລິສັດ ຄຳໄພຊະນະກໍ່ສ້າງ ມອບເງິນຊ່ວຍເຫຼືອ 1 ຮ້ອຍລ້ານກີບ, ປະຊາຊົນແຂວງບໍ່ແກ້ວ 1 ຮ້ອຍລ້ານກີບ, ບໍລິສັດຫົວເຫວີຍ 1 ໜື່ນໂດລາ, ບໍລິສັດ ລາວເວີນວິສະວະກຳ ແລະ ກໍ່ສ້າງຈຳກັດ 1 ໜື່ນ ໂດລາ ແລະ ນອກຈາກນີ້ຍັງມີພາກສ່ວນຕ່າງໆ ທີ່ໄດ້ປະກອບສ່ວນ ບໍລິຈາກເປັນຈຳນວນຫຼວງຫຼາຍ ທັງເຄື່ອງຂອງບໍລິໂພກ ແລະ ອຸປະໂພກ ລວມມູນຄ່າຫຼາຍຮ້ອຍລ້ານກີບ, ເພື່ອນຳໄປຊ່ວຍເຫຼືອປະຊາຊົນ ທີ່ຖືກອຸຖົກກະໄພຢູ່ ແຂວງອັດຕະປື.

ຂ່າວຍັງໃຫ້ຮູ້ຕື່ມວ່າ:

ໃນວັນທີ 28 ກໍລະກົດ 2018 ນີ້ ທ່ານ ນາງ ພອນສະຫວັນ ແພງສີດາ ປະທານສະນະພັນແມ່ຍິງ ກະຊວງ ໂຍທາທິການ ແລະ ຂົນສົ່ງ, ໄດ້ຕາງໜ້າໃຫ້ 3 ອົງການຈັດຕັ້ງມະຫາຊົນຄື: ອົງການຈັດຕັ້ງແມ່ຍິງ, ອົງການຈັດຕັ້ງຊາວໜຸ່ມ ແລະ ອົງການຈັດຕັ້ງກຳມະບານ ຂອງກະຊວງໂຍທາທິການ ແລະ ຂົນສົ່ງ ໄດ້ຮັບເຄື່ອງຊ່ວຍເຫຼືອຈາກພາກສ່ວນຕ່າງໆ ເປັນຕົ້ນແມ່ນ ກອງສະໜາມບິນລາວ, ຄອບຄົວພະນັກງານກະຊວງ ຍທຂ ແລະ ຈາກພາກສ່ວນອື່ນໆ ລວມມູນຄ່າ 1 ຮ້ອຍລ້ານກວ່າກີບ ແລະ ຈະໄດ້ນຳເຄື່ອງຂອງດັ່ງກ່າວນີ້, ມອບໃຫ້ກະຊວງແຮງງານ ແລະ ສະຫວັດດີການສັງຄົມ, ເພື່ອນຳໄປມອບຕໍ່ໃຫ້ແກ່ປະຊາຊົນຢູ່ ແຂວງອັດຕະປື ທີ່ຖືກຜົນກະທົບຈາກນ້ຳຖ້ວມຢູ່ໃນປະຈຸບັນນີ້.

Off

Comments are closed.