28th Nov2019

ອົງຄະນະພັກກອງບັນຊາການປ້ອງກັນເຄື່ອນທີ່ ຈັດກອງປະຊຸມໃຫ່ຍທີ 3

by somchan

ອົງຄະນະພັກກອງບັນຊາການປ້ອງກັນເຄື່ອນທີ່, ກະຊວງປ້ອງກັນຄວາມສະຫງົບ, ຈັດກອງປະຊຸມໃຫ່ຍຄັ້ງທີ 3 ໃນວັນທີ 27 ພະຈິກ 2019 ນີ້ ພາຍໃຕ້ການເປັນປະທານຂອງສະຫາຍ ພົຈວ ຈັນສະແຫວງ ທິບຄູນທອງ ຄະນະພັກກະຊວງ, ເລຂາອົງຄະນະພັກ, ຫົວໜ້າກອງບັນຊາການປ້ອງກັນເຄື່ອນທີ່ ໂດຍການໃຫ້ກຽດເຂົ້າຮ່ວມຂອງ ສະຫາຍ ພົຕ ກົງທອງ ພົງວິຈິດ ຮອງເລຂາອົງຄະນະພັກກະຊວງ, ຮອງລັດຖະມົນຕີ ກະຊວງປ້ອງກັນ ຄວາມສະຫງົບ, ມີບັນດາຄະນະພັກ, ຄະນະປະຈຳພັກກອງບັນຊາການ, ພະນັກງານຫຼັກແຫຼ່ງສະມາຊິກພັກສົມບູນ, ສຳຮອງ ແລະ ແຂກຖືກເຊີນເຂົ້າຮ່ວມ.

ພົຈວ ຈັນສະແຫວງ ທິບຄູນທອງ ຄະນະພັກກະຊວງ, ເລຂາອົງຄະນະພັກ, ຫົວໜ້າກອງບັນຊາການປ້ອງກັນເຄື່ອນທີ່ ປະທານກອງປະຊຸມໄດ້ມີຄຳເຫັນກ່າວໄຂກອງປະຊຸມຢ່າງເປັນທາງການ ເຊິ່ງສະຫາຍໄດ້ກ່າວວ່າ ກອງປະຊຸມໃຫ່ຍໃນຄັັ້ງນີ້ແມ່ນມີຄວາມໝາຍ, ຄວາມສຳຄັນເປັນຢ່າງຍິ່ງເພາະເປັນການສະຫຼຸບຕີລາຄາຜົນສຳເລັດໃນການຈັດຕັ້ງປະຕິບັດມະຕິກອງປະຊຸມໃຫ່ຍຜູ້ແທນຄັ້ງທີ 2 ຂອງອົງຄະນະພັກໃນ 5 ປີຜ່ານມາ ດ້ານດີຜົນງານ ແລະ ດ້ານອ່ອນຂໍ້ຄົງຄ້າງທີ່ຈະໄດ້ພ້ອມກັນເອົາໃຈໃສ່ປັບປຸງແກ້ໄຂໃນຕໍ່ໜ້າ ເພື່ອເຮັດສຳເລັດໜ້າທີ່ການເມືອງທີ່ພັກ-ລັດການຈັດຕັ້ງຂັ້ນເທີງ ແລະ ປະຊາຊົນມອບໝາຍໃຫ້ມີຜົນສຳເລັດ.

ຈາກນັ້ນ ພັອ ພູນສະຫວັນ ພັນທະເສນາ ຄະນະປະຈຳພັກ ຮອງຫົວໜ້າກອງບັນຊາການປ້ອງກັນເຄື່ອນທີ່ ໄດ້ຜ່ານບົດລາຍງານການເມືອງສະຫຼຸບຕີລາຄາການຈັດຕັ້ງປະຕິບັດວຽກງານ ໂດຍໄດ້ຍົກໃຫ້ເຫັນດ້ານດີຜົນງານຕະຫຼອດ 5 ປີ ຜ່ານມາ ອົງຄະນະພັກ ກອງບັນຊາການປ້ອງກັນເຄື່ອນທີ່ ແມ່ນສາມາດຍາດໄດ້ຜົນງານ ແລະ ຜົນສຳເລັດຫຼາຍດ້ານ ໄດ້ເອົາໃຈໃສ່ສຶກສາອົບຮົມການເມືອງແນວຄິດໃຫ້ສະມາຊິກພັກ, ພະນັກງານນັກຮົບໃຫ້ມີແນວຄິດອຸ່ນອ່ຽງ, ທຸ່ນທ່ຽງເຊື້ອໜັ້ນຕໍ່ການນຳພາຂອງພັກ ເອົາໃຈໃສ່ກໍ່ສ້າງສະມາຊິກພັກໃຫ້ມີຄຸນທາດການເມືອງໜັກແໜ້ນຈຳແນກໄດ້ມິດ-ສັດຕູຈະແຈ້ງຮັບປະກັນຄວາມສະຫງົບ, ຄວາມເປັນແບບຢ່າງອັນດີ, ເປັນແກນນຳໃນທຸກຂົງເຂດວຽກງານຂອງກົມກອງ, ໄດ້ປັບປຸງການຈັດຕັ້ງຂັ້ນຮາກຖານພັກ, ຍົກຖານະໜ່ວຍພັກເປັນຄະນະພັກຮາກຖານໄດ້ 2 ຮາກຖານ, ນຳພາກໍ່ສ້າງກົມກອງເຂັ້ມແຂງ-ໜ່ວຍພັກ ຮູ້ນຳພາຮອບດ້ານ ຫຼື ກົມກອງປອດໃສ, ເຂັ້ມແຂງ ແລະ ໜັກແໜ້ນໄດ້ 6 ໜ່ວຍ, ຂະຫຍາຍມະຫາຊົນກ້າວໜ້າເຂົ້າເປັນສະມາຊິກພັກສຳຮອງໄດ້ 89 ສະຫາຍ, ເລື່ອນສະມາຊິກພັກສຳຮອງຂື້ນສົມບູນໄດ້ 92 ສະຫາຍ, ຄົ້ນຄວ້າຄັດເລືອກເອົາພະນັກງານ-ນັກຮົບໄປຮຽນຍົກລະດັບດ້ານວຽກງານວິຊາສະເພາະຢູ່ພາຍໃນ ແລະ ຕ່າງປະເທດໄດ້ 292 ສະຫາຍ, ຍິງ 34 ສະຫາຍ, ເອົາໃຈໃສ່ປ້ອງກັນກອງປະຊຸມລະດັບຊາດ, ສາກົນ-ພາກພື້ນ, ປ້ອງກັນແຂກຂັ້ນສູງຂອງພັກ-ລັດທັງພາຍໃນ ແລະ ຕ່າງປະເທດ, ງານບຸນປະເພນີ ພິທີສຳຄັນຕ່າງໆ, ປ້ອງກັນເຄື່ອນຍ້າຍວັດຖຸມີຄ່າແມ່ນສາມາດຮັບປະກັນຄວາມສະຫງົບປອດໄພໄດ້ຮ້ອຍສ່ວນຮ້ອຍ.

ພ້ອມນີ້ຜູ້ແທນກອງປະຊຸມໄດ້ປະກອບຄຳເຫັນເຂົ້າໃສ່ບົດລາຍງານການເມືອງດ້ວຍຄວາມຮັບຜິດຊອບສູງ ແລະ ມີເນື້ອໃນເລິກເຊິ່ງ ແລະ ກອງປະຊຸມຍັງໄດ້ປ່ອນບັດຄັດເລືອກເອົາຄະນະພັກກອງບັນຊາການປ້ອງກັນເຄື່ອນທີ່ຊຸດໃໝ່, ມີຜູ້ລົງສະໜັກ 12 ສະຫາຍ ແລະ ເລືອກເອົາ 9 ສະຫາຍ ໄດ້ຕາມລະດັບຄາດໝາຍ.

Comments are closed.