01st Feb2018

ຮອງລັດຖະມົນຕີກະຊວງ ປກສ ລາຍງານຕໍ່ກອງປະຊຸມສະຫຼຸບວຽກງານ ປກສ ທົ່ວປະເທດ ປະຈຳປີ 2017

by somchan

ພົນຕີ ສິນທະວົງ ໄຊຍະກອນ ຮອງລັດຖະມົນຕີ ກະຊວງ ປກສ ໄດ້ລາຍງານຕໍ່ກອງປະຊຸມສະຫຼຸບ ວຽກງານປ້ອງກັນຄວາມສະຫງົບ ທົ່ວປະເທດ ປະຈຳປີ 2017 ແລະ ທິດທາງແຜນການ ບັນດາວຽກຈຸດສຸມ ໃນປີ 2018 ວ່າ: ໃນ 1 ປີຜ່ານມາ ກຳລັງປ້ອງກັນຄວາມສະຫງົບ ທົ່ວປະເທດ ສາມາດດຳເນີນຄະດີຢາເສບຕິດໄດ້ 2,770 ເລື່ອງ, ຈັບຕົວຜູ້ກະທຳຜິດມາດຳເນີນ ຄະດີໄດ້ 4,241 ຄົນ, ຍິງ 526 ຄົນ, ໃນນີ້ ຄົນຕ່າງປະເທດ 100 ຄົນ, ຢຶດຂອງກາງຢາເສບຕິດປະເພດຢາບ້າ 190 ກິໂລກຣາມ, ເຮໂຣອິນ 68 ກິໂລກຣາມ, ຢາໄອສ 4 ກິໂລກຣາມ, ແປ້ງຝຸ່ນປະສົມຢາເສບຕິດ 56ກິໂລກຣາມ, ຢາຝິ່ນ 84 ກວ່າ ກິໂລກຣາມ, ກັນຊາ 2,966 ກິໂລກຣາມ, ຢືດລົດໃຫຍ່ໄດ້ 48 ຄັນ, ລົດຈັກ 256 ຄັນ, ປືນ 43 ກະບອກ ພ້ອມລູກປືນ 220 ລູກ, ໝາກແຕກ 5 ໜ່ວຍ, ເງິນ 43 ລ້ານກວ່າກີບ ແລະ ເງິນບາດ 592,200 ບາດ ແລະ ເຄື່ອງອື່ນໆ ຖ້າທຽບໃສ່ປີ 2016 ຜ່ານມາແມ່ນເພີ່ມຂຶ້ນ.

ທ່ານຍັງໃຫ້ຮູ້ຕື່ມອີກວ່າ: ທິດທາງໃນປີ 2018 ນີ້ ຄະນະພັກ-ຄະນະນຳ ກະຊວງປ້ອງກັນຄວາມສະຫງົບໃນທົ່ວປະເທດ ຈະສືບຕໍ່ຈັດຕັ້ງປະຕິບັດ 4 ຄາດໝາຍ,  4 ແຜນງານໃຫຍ່ ແລະ 41 ໂຄງການ ແລະ ຈັດຕັ້ງປະຕິບັດຕາມຄຳສັ່ງຕ່າງໆເປັນຕົ້ນ ຈະເອົາໃຈໃສ່ສືບຕໍ່ສະກັດກັ້ນ, ແກ້ໄຂບັນຫາຢາເສບຕິດໃຫ້ມີປະສິດທິຜົນ ແລະ ມີການເຂົ້າຮ່ວມຢ່າງກວ້າງຂວາງຂອງປະຊາຊົນທຸກຊັ້ນຄົນໃນສັງຄົມ, ສຸມໃສ່ເກັບກຳສະພາບການ ການເຄື່ອນໄຫວຕ່າງໆເຊັ່ນ: ກຸ່ມເປົ້າໝາຍ, ກຸ່ມແກ້ງການຜະລິດ-ຂົນສົ່ງ, ຄ້າຂາຍຢາເສບຕິດ ເພື່ອມີວິທີສະກັດກັ້ນ ແລະ ແກ້ໄຂຖືກຕ້ອງທັນການ, ສືຍຕໍ່ລົງໂຄສະນາຜົນຮ້າຍຂອງຢາເສບຕິດຕາມຊຸມຊົນ, ໂຮງຮຽນ, ໂຮງງານ, ບ້ານ ແລະ ອື່ນໆ ໃຫ້ທົ່ວສັງຄົມ ໄດ້ຮັບຮູ້ເຂົ້າໃຈຕໍ່ຜົນຮ້າຍຂອງຢາເສບຕິດ ແລະ ສືບຕໍ່ສະກັດກັ້ນແກ້ໄຂ, ປາບປາມການຜະລິດ, ຄ້າຂາຍແລະ ນຳໃຊ້ຢາເສບຕິດ ຢູ່ໃນປະເທດ ໃຫ້ໝົດໄປຈາກສັງົຄມ.

Off

Comments are closed.