01st Aug2018

ຮອງ​ລັດຖະມົນຕີ ກະຊວງ ປກສ ເຄື່ອນໄຫວ ຢ້ຽມຢາມ ພົບ​ປະ, ຊີ້​ນຳ​ກຳລັງ​ປ້ອງ​ກັນ​ຄວາມ​ສະຫງົບ ​ແຂວງ​ອັດ​ຕະປື

by somchan

ພົຕ ສິນ​ທະ​ວົງ ​ໄຊ​ຍະ​ກອນ ກຳມະການ​ສູນ​ກາງພັກ ຮອງ​ລັດຖະມົນຕີ ກະຊວງ​ປ້ອງ​ກັນ​ຄວາມ​ສະຫງົບ ພ້ອມ​ຄະນະ ​ໄດ້​ເຄື່ອນ​ໄຫວ​ຢ້ຽມຢາມ, ພົບ​ປະ, ຊີ້​ນຳ​ກຳລັງ​ປ້ອງ​ກັນ​ຄວາມ​ສະຫງົບ ​ແຂວງ​ອັດ​ຕະປື ຫ່ຽວ​ກັບ​ການ​ປ້ອງ​ກັນ, ການ​ຄົ້ນ​ຫາ ​ແລະ ຊ່ວຍ​ເຫຼືອ​ປະຊາຊົນ ຊາວ​ເມືອງ​ສະໜາມ​ໄຊ ທີ່​ປະສົບ​ໄພ ​ໃນ​ວັນ​ທີ 30 ກໍລະກົດ 2018 ນີ້ ​ໂດຍ​ການ​ຕ້ອນຮັບ​ຂອງ ພົຈວ ທອງ​ຈັນ ຈັນທະ​ພົງ ຄະນະ​ປະຈຳ​ພັກ​ແຂວງ ຫົວໜ້າ​ກອງ​ບັນຊາ​ການ ປກສ ​ແຂວງ​ອັດ​ຕະປື ທັງ​ເປັນ​ຄະນະ​ຮັບຜິດ ຊອບຊີ້​ນຳ​ຂັ້ນ​ແຂວງ​ກ່ຽວ​ກັບ​ການ​ແກ້​ໄຂ ​ແລະ ຊ່ວຍ​ເຫຼືອ​ຜູ້​ປະສົບ​ໄພ ມີ​ຄະນະ​ພັກ ຄະນະ​ກອງ​ບັນຊາ​ການ ປກສ ​ແຂວງ​ ​ແລະ ບັນດາ​ຫ້ອງ​ອ້ອມ​ຂ້າງ​ເຂົ້າ​ຮ່ວມ.

ພົຈວ ທອງ​ຈັນ ຈັນທະ​ພົງ ​ໄດ້​ລາຍ​ງານ​ໃຫ້​ທ່ານ​ຮອງ​ລັດຖະມົນຕີ​ໄດ້​ຮັບ​ຊາບ ກ່ຽວ​ກັບ​ຜົນ​ການຈັດ​ຕັ້ງ​ປະຕິບັດ​ວຽກ​ງານ​ແກ້​ໄຂ ສະພາບ​ໄພພິບັດ​ນ້ຳ​ຖ້ວມ ທີ່​ເມືອງ​ສະໜາມ​ໄຊ ​ແຂວງ​ອັດ​ຕະປື ຄື​ເຫດການ​ເຂື່ຶອນ​ໄຟ້າ​ເຊ​ປ່ຽນ-​ເຊ​ນ້ຳ​ນ້ອຍ​ແຕກ ​ເຊິ່ງມີ​ປະຊາຊົນ​ໄດ້​ຮັບ​ຜົນ​ກະທົບ​ທັງ​ໝົດ 13 ບ້ານ, ມີ 2,528 ຄອບຄົວ ມີ​ພົນລະ​ເມືອງ 11,805 ຄົນ ​ໃນ​ນີ້​ໄດ້​ຮັບ​ຜົນ​ກະທົບ​ຫຼາຍ​ກວ່າ​ໝູ່​ມີ 6 ບ້ານ ຄື: ບ້ານ​ໃຫ່​ມ, ບ້ານ​ຫີນ​ລາດ, ບ້ານ​ທ່າ​ແສງ​ຈັນ, ບ້ານ​ສະໜອງ, ບ້ານ​ທ່າ​ຫີນ​ໃຕ້ ​ແລະ ບ້ານ​ແທຄຸ້ມ​ໂຄກ​ກ່ອງ.

ຫຼັງ​ຈາກ​ເຫດການ​ເກີດ​ຂື້ນ​ທາງ​ກຳລັງ ປກສ ກໍ​ໄດ້​ຈັດ​ຕັ້ງ​ກຳລັງ​ລົງ​ສົມທົບ​ກັບ​ກຳລັງ ປກສ ​ເມືອງ​ສະໜາມ​ໄຊ ​ເພື່ອ​ຊ່ວຍ​ເຫຼືອ​ປະຊາຊົນ​ຜູ້​ປະສົບ​ໄພ​ຢູ່​ຕາມ​ຈຸດ​ຕ່າງໆ ​ແລະ ປະຈຳ​ຢູ່​ຈຸດ ປະສານ​ງານ​ທີ່​ຫ້ອງ​ວ່າການ​ປົກຄອງ​ແຂວງ​ຈຳນວນ​ໜຶ່ງ.

ນອກ​ນີ້​ທ່ານ​ຍັງ​ໄດ້​ລາຍ​ງານ ສະພາບ​ຄວາມ​ຫຍຸ້ງຍາກ​ ​ໃນ​ການ​ປະຕິບັດ​ໜ້າ​ທີ່​ໃນ​ການ​ຄົ້ນ​ຫາ ​ແລະ ຊ່ວຍ​ເຫຼືອ​ຜູ້​ປະສົບ​ໄພ ​ເຊິ່ງປັດຈຸບັນ ສາມາດ​ຄົ້ນ​ຫາ ​ແລະ ຊ່ວຍ​ເຫຼືອ​ຜູ້​ລອດ​ຊີວິດ​ໄດ້​ຈຳນວນ​ໜື່ງ ຄົ້ນ​ພົບ​ຜູ້​ເສຍ​ຊີວິດ 9 ຄົນ.

​ໂອກາດ​ດຽວ​ກັນ ພົຕ ສິນ​ທະ​ວົງ ​ໄຊ​ຍະ​ກອນ ຍັງ​ໄດ້​ເນັ້ນ​ໜັກ​ໃຫ້​ຄະນະ​ພັກ ຄະນະ​ບັນຊາ​ແຕ່ລະ​ຂັ້ນ ​ເອົາ​ໃຈ​ໃສ່​ລົງ​ໃກ້ຊິດຕິດ​ແທດ ກັບ​ພະນັກງານ​ທີ່​ລົງ​ປະຕິບັດ​ໜ້າ​ທີ່​ຕົວ​ຈິງ ​ເພື່ອ​ຊີ້​ນຳໆ​ພາ​ເຮັດ​ວຽກ​ງານ​ວິຊາ​ສະ​ເພາະ ກໍ​ຄື​ການ​ປ້ອງ​ກັນ​ຄວາມ​ສະຫງົບ ຮັກສາ​ຄວາມ​ເປັນ​ລະບຽບ​ຮຽບຮ້ອຍ​ຕາມ​ແຜນການ, ​ເອົາ​ໃຈ​ໃສ່​ປ້ອງ​ກັນ​ບັນດາ​ຄົນ​ຕ່າງປະ​ເທດ​ທີ່​ເຂົ້າ​ມາ​ຊ່ວຍ​ເຫຼືອ​ຢ່າງ​ລະອຽດ ເພືື່ອສະກັດກັ້ນ ແລະ ຕ້ານການແອບແຝງເຂົ້າມາຂອງພວກຄົນບໍ່ດີ, ເພີ່ມທະວີປະສານສົມທົບກັບກຳລັງ ປກຊ ແລະ ເຈົ້າໜ້າທີ່ກູ້ໄພທັງພາຍໃນ ແລະ ຕ່າງປະເທດ ເພື່ອສືບຕໍ່ຄົ້ນຄວ້າ ແລະ ຊ່ວຍເຫຼືອຜູ້ປະສົບໄພໃຫ້ທັນການ, ເພີ່ມທະວີການປ້ອງກັນໃຫ້ຮັບປະກັນໄດ້ຄວາມສະຫງົບປອດໄພ 100% ແລະ ອື່ນໆ.

ພ້ອມກັນນີ້ ທ່ານຮອງລັດຖະມົນຕີ ກະຊວງ ປກສ ຍັງໄດ້ມອບເງີນ 10 ລ້ານກີບ ໃຫ້ກອງບັນຊາການ ປກສ ແຂວງອັດຕະປື ເພື່ອນຳໃຊ້ບໍລິຫານເຂົ້າໃນການປະຕິບັດໜ້າທີ່ ໃນການຄົ້ນຫາ ແລະ ຊ່ວຍຜູ້ປະສົບໄພ.

ຫຼັງຈາກນັ້ນ ພົຕ ສິນທະວົງ ໄຊຍະກອນ ຍັງໄດ້ເຂົ້າພົບປະກັບ ທ່ານ ເລັດ ໄຊຍະພອນ ເຈົ້າແຂວງອັດຕະປື ກ່ຽວກັບວຽກງານປ້ອງກັນ, ການຄົ້ນຫາ ແລະ ຊ່ວຍເຫຼືອຜູ້ປະສົບໄພ ຈາກນັ້ນກໍຈະລົງພື້ນທີ່ປະສົບໄພ ທີ່ເມືອງສະໜາມໄຊ ຕື່ມອີກ.

Off

Comments are closed.