15th Feb2018

ຮອງ ລມຕ ກະຊວງ ປກສ ລົງຊີ້ນຳວຽກງານ ກໍ່ສ້າງຮາກຖາກການເມືອງຢູ່ເມືອງຈັນທະບູລີ

by somchan

ໃນວັນທີ 13 ກຸມພາ 2018 ນີ້ ພົນຕີ ກົງທອງ ພົງວິຈິດ ຮອງລັດຖະມົນຕີກະຊວງປ້ອງກັນຄວາມສະຫງົບ ທັງເປັນຫົວໜ້າຄະນະຊີ້ນຳວຽກງານກໍ່ສ້າງຮາກຖານ ການເມືອງ ນະຄອນຫຼວງວຽງຈັນ ປະຈຳປີ 2018 ໄດ້ລົງຊີ້ນຳວຽງງານກໍ່ສ້າງຮາກຖານກອງຮ້ອຍ 1 ເມືອງຈັນທະບູລີ. ໃຫ້ການຕ້ອນຮັບໂດຍ ພັທ ໄມວິໄລສຸກ ແສນອຸໄທ ຫົວໜ້າກອງບັນຊາການ ປກສ ເມືອງຈັນທະບູລີ ທັງເປັນຫົວໜ້າກອງກໍ່ສ້າງຮາກຖານການເມືອງກອງຮ້ອຍ 1 ເມືອງຈັນທະບູລີ ພ້ອມຄະນະ ແລະ ພະນັກງານກໍ່ສ້າງຮາກຖານເຂົ້າຮ່ວມ.

ພັທ ໄມວິໄລສຸກ ແສນອຸໄທ ໄດ້ລາຍງານການຈັດຕັ້ງປະຕິບັດການຫັນລົງກໍ່ສ້າງຮາກຖານການເມືອງຕິດພັນກັບການຈັດສັນຄວາມເປັນລະບຽບຮຽບຮ້ອຍຢູ່ເມືອງຈັນທະບູລີ ມີ 5 ກຸ່ມ ມີ 30 ບ້ານ, ມີ 1040 ໜ່ວຍ, ມີ 12,277 ຫຼັງຄາ ມີ 12,422 ຄອບຄົວ, ໃນນີ້ ມີຄົນຕ່າງດ້າວ 425 ຄົນ ແລະ ມີພົນລະເມືອງທັງໝົດ 60,790 ຄົນ. ແບ່ງອອກເປັນ 3 ເຂດບ້ານພັດທະນາ, ມີພະນັກງານກໍ່ສ້າງຮາກຖານການເມືອງ 99 ຄົນ, ເພື່ອເຮັດໃຫ້ບັນລຸຕາມຈຸດປະສົງ ແລະ ຄາດໝາຍ ໃນການຫັນລົງກໍ່ສ້າງຮາກຖານການເມືອງ ຕິດພົວກັບການຈັດສັນຄວາມເປັນລະບຽບຮຽບຮ້ອຍຢູ່ເມືອງຈັນທະບູລີ ປີ 2018 ຄະນະຮັບຜິດຊອບ ແລະ ກອງເສນາ ໄດ້ຄົ້ນຄວ້າປຶກສາຫາລືບັນດາແຜນແມ່ບົດຂອງກະຊວງ ປກສ ເພື່ອຜັນຂະຫຍາຍເປັນແຜນງານ,​ໂຄງການ ແລະ ກິດຈະກຳຂອງວຽກງານການຫັນລົງກໍ່ສ້າງຮາກຖານການເມືອງ ຕິດພັນກັບການຈັດສັນຄວາມເປັນລະບຽບຮຽບຮ້ອຍຢູ່ເມືອງຈັນທະບູລີ ແລະ ພ້ອມກັນເປັນເອກະພາບ ຕົກລົງຮັບຮອງເອົາ 1 ແຜນງານ, 10 ໂຄງການ, 53 ກິຈະກຳ ຂອງກອງຮ້ອຍ 1 ເມືອງຈັນທະບູລີ ເພື່ອເປັນພື້ນຖານບ່ອນອີງໃນການຈັດຕັ້ງປະຕິບັດ, ຊື່ງໄດ້ກຳນົດເອົາບ້ານທົ່ງຂັນຄຳເປັນບ້ານທົດລອງ ການສຳຫຼວດເກັບກຳບັນດາຮ່າງສະຖິຕິຕ່າງໆ ເຊິ່ງຈະໄດ່ເລີ່ມຈັດຕັ້ງປະຕິບັດ ໃນວັນທີ 20 ກຸມພາ ຫາ ວັນທີ 9 ມີນາ 2018.

ໂອກາດດຽວກັນນີ້, ພົຕ ກົງທອງ ພົງວິຈິດ ຮອງລັດຖະມົນຕີກະຊວງ ປກສ ຫົວໜ້າຄະນະຊີ້ນຳວຽກງານກໍສ້າງຮາກຖານການເມືອງນະຄອນຫຼວງວຽງຈັນ ໄດ້ໃຫ້ທິດຊີ້ນຳ ແລະ ເໜັ້ນໜັກໃຫ້ຄະນະຮັບຜິດຊອບ ແລະ ພະນັກງານການກໍ່ສ້າງຮາກຖານກອງຮ້ອຍ 1 ເມືອງຈັນທະບູລີ ຈົ່ງເອົາໃຈໃສ່ໃນການຕິດຕາມກວດກາ , ເກັບກຳສະຖິຕິຕ່າງໆ ເລີ່ມແຕ່ຄອບຄົວເປັນບັນຫາສຳຄັນ ຕິດພັນກັບການແກ້ໄຂບັນຫາ ປະກົດການຫຍໍ້ທໍ້ຕ່າງໆຢູ່ຂັ້ນບ້າ ເພື່ອເຮັດໃຫ້ຂັ້ນຮາກຖານບ້ານກໍຄືເມືອງຈັນທະບູລີມີຄວາມສະຫງົບ, ຄວາມເປັນລະບຽບຮຽບຮ້ອຍໂດຍພື້ນຖານ.

Off

Comments are closed.