25th Nov2016

ເລຂາທິການໃຫຍ່ ຄະນະບໍລິຫານງານສູນກາງ ພັກກອມມູນິດຫວຽດນາມ ເຄື່ອນໄຫວສັນຖະວະໄມຕີ ສປປລາວ

by somchan

ໂດຍຕອບສະໜອງຕາມການເຊີນຂອງສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານ ສູນກາງພັກປະຊາຊົນ ປະຕິວັດລາວ ປະທານປະເທດ ແຫ່ງ ສປປ ລາວ ສະຫາຍ ຫງວຽນຟູຈ້ອງ ເລຂາທິການໃຫຍ່ ຄະນະບໍລິຫານງານ ສູນກາງພັກກອມມູນິດ ຫວຽດນາມ ພ້ອມດ້ວຍຄະນະ ໄດ້ເດີນທາງເຖິງນະຄອນຫຼວງວຽງຈັນ ເພື່ອຢ້ຽມຢາມສັນຖະວະໄມຕີ ສປປ ລາວ ຢ່າງເປັນທາງການ ໃນວັນທີ 24 ພະຈິກ 2016 ນີ. ພິທີຕ້ອນຮັບ ໄດ້ຈັດຢ່າງສົມກຽດ ທີ່ທຳນຽບປະທານປະເທດ ໂດຍແມ່ນ ສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານ ສູນກາງພັກປະຊາຊົນ ປະຕິວັດລາວ ປະທານປະເທດ ແຫ່ງ ສປປ ລາວ ມີບັນດາການນຳຂັ້ນສູງຂອງລາວເຂົ້າຮ່ວມ. ໂອກາດນີ້ ສະຫາຍ ບຸນຍັງ ວໍລະຈິດ ໄດ້ກ່າວສະແດງຄວາມຍິນດີຕ້ອນຮັບ ສະຫາຍ ຫງວຽນຟູຈ້ອງ ພ້ອມດ້ວຍຄະນະ ທີ່ມາຢ້ຽມຢາມສັນຖະວະໄມຕີ ສປປລາວ ຢ່າງເປັນທາງການ ໄດ້ນຳເອົານ້ຳໃຈອັນດູດດື່ມ,  ຄວາມສາມັນຄີພິເສດ,  ອັນສະໜິດສະໜົມຈາກພັກ-ລັດ ແລະ ປະຊາຊົນຫວຽດນາມອ້າຍນ້ອງ ມາສູ່ ພັກ-ລັດ ແລະ ປະຊາຊົນລາວ ແລະ ທ່ານຍັງໄດ້ຕີລາຄາສູງຕໍ່ກັບການມາຢ້ຽມຢາມຂອງສະຫາຍ ຫງວຽນຟູຈ້ອງ ເຊິ່ງເປັນການປະກອບສ່ວນອັນສຳຄັນ ເຂົ້າໃນການເພີ່ມທະວີສາຍພົວພັນ ມິດຕະພາບ ອັນເປັນມູນເຊື້ອ ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງ ສອງພັກສອງລັດ ແລະ ປະຊາຊົນສອງຊາດ ລາວ-ຫວຽດນາມ ທີ່ປະທານໂຮ່ຈີມິນ, ປະທານໄກສອນ ພົມວິຫານ ແລະ ປະທານສຸພານຸວົງ ຜູ້ນຳທີ່ແສນເຄົາລົບຮັກ ເປັນຜູ້ສ້າງ ຖະນຸຖະໜອມ ແລະ ໄດ້ຮັບການເສີມຂະຫຍາຍ ໂດຍບັນດາການນຳຮຸ້ນຕ່າງໆ ບັນດານັກຮົບປະຕິວັດ ແລະ ປະຊາຊົນສອງປະເທດ ໃຫ້ນັບມືໜັກແໜ້ນເລິກເຊິ່ງ ແລະ ເກີດດອກອອກຜົນຍິ່ງຂຶ້ນ.ສະຫາຍ ຫງວຽນຟູຈ້ອງ ເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດ ຫວຽດນາມ ໄດ້ກ່າວສະແດງຄວາມປິຕິຍິນດີເປັນຢ່າງຍິ່ງ ທີ່ໄດ້ນຳພາຄະນະຜູ້ແທນຂັ້ນສູງພັກ-ລັດ ຫວຽດນາມເດີນທາງຢ້ຽມຢາມ ສັນຖະວະໄມຕີ ສປປ ລາວ ຢ່າງເປັນທາງການ ເປັນຄັ້ງທຳອິດ ພາຍຫຼັງໄດ້ຮັບການເລືອກຕັ້ງ ເປັນເລຂາທິການໃຫຍ່ ໃນກອງປະຊຸມໃຫຍ່ ຄັ້ງທີ 12 ຂອງພັກກອມມູນິດຫວຽດນາມ ເຊິ່ງເປັນການສະແດງເຖິງຄວາມມີຊີວິດຊີວາ ແຫ່ງສາຍພົວພັນມິດຕະພາບ ອັນເປັນມູນເຊື້ອຄວາມສາມັກຄີພິເສດ ຫວຽດນາມ-ລາວ. ພ້ອມນັ້ນ, ທ່ານຍັງໄດ້ສະແດງຄວາມຂອບອົກຂອບໃຈຢ່າງສູງ ຕໍ່ການຕ້ອນຮັບອັນສົມກຽດ ແລະ ສະນິດສະໜົມ ບົນນ້ຳໃຈມິດຕະພາບ ອັນຍິ່ງໃຫຍ່ ຄວາມສາມັກຄີພິເສດຖານອ້າຍນ້ອງ ຈາກສະຫາຍການນຳຂັ້ນສູງ ພັກ-ລັດ ແລະ ປະຊາຊົນລາວ ທີ່ມີຕໍ່ຄະນະ ເຊິ່ງສະຫາຍ ຫງວຽນຟູຈ້ອງ ເຊື່ອໝັ້ນວ່າພາຍໃຕ້ການນຳພາຂອງພັກປະຊາຊົນ ປະຕິວັດລາວ ຈະສືບຕໍ່ຍາດໄດ້ຜົນງານອັນໃຫມ່ໃຫຍ່ຫຼວງກວ່າເກົ່າ ຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ 10 ຂອງພັກ ໃຫ້ປະກົດຜົນເປົນຈິງ.ພ້ອມນີ້, ສອງຝ່າຍ ຍັງໄດ້ແຈ້ງສະພາບການທີ່ພົ້ນເດັ່ນ ໃນພາຍພັກຂອງກັນແລະກັນ ພ້ອມທັງຕີລາຄາການພົວພັນຮ່ວມມືໄລຍະຜ່ານມາ ແລະ ປືກສາຫາລືທິດທາງຮ່ວມມືໃນຕໍ່ໜ້າ  ເພື່ອນຳເອົາການພົວພັນພິເສດ ລະຫວ່າງສອງປະເທດ ກ້າວສູ່ຈຸດໝາຍອັນໃຫມ່.ພາຍຫຼັງພົບປະສອງຝ່າຍ ສະຫາຍ ບຸນຍັງ ວໍລະຈິດ ແລະ ສະຫາຍ ຫງວຽນຟູຈ້ອງ ໄດ້ເປັນສັກຄີພະຍານ  ໃນການລົງນາມບັນດາເອກະສານຮ່ວມມື ລະຫວ່າງສອງພັກ-ສອງລັດຖະບານຄື: ບົດບັນທຶກຊ່ວຍຈຳວ່າດ້ວຍການຊ່ວຍເຫຼືອ ການກໍ່ສ້າງຫໍສະພາແຫ່ງຊາດ, ບົດບັນທຶກຊ່ວຍຈຳວ່າດ້ວຍ ການຊ່ວຍເຫຼືອການກໍ່ສ້າງໂຮງຮຽນສາມັນ ຢູ່ແຂວງບໍລິຄຳໄຊ, ບົດບັນທຶກຊ່ວຍຈຳ ລະຫວ່າງກະຊວງໂຍທາທິການ ແລະ ຂົນສົ່ງຄົມມະນາຄົມ ສປປລາວ ແລະ ກະຊວງຄົມມະນາຄົມ ແລະ ຂົນສົ່ງ ສສ ຫວຽດນາມ ວ່າດ້ວຍການສ້າງເສັ້ນທາງດ່ວນວຽງຈັນ-ຮ່າໂນຍ, ຂໍ້ຕົກລົງລະຫວ່າງກະຊວງໂຍທາທິການ ແລະ ຂົນສົ່ງ ສປປ ລາວ ແລະ ກະຊວງຄົມມະນາຄົມ ແລະ ຂົນສົ່ງ ສສ ຫວຽດນາມ ວ່າດ້ວຍການຈັດຕັ້ງປະຕິບັດ ບົດບັນທຶກຍຸດທະສາດການຮ່ວມມື ດ້ານຄົມມະນາຄົມ ແລະ ຂົນສົ່ງໄລຍະ 2016-2020 ຂໍ້ຕົກລົງ ວ່າດ້ວຍການຮ່ວມມືຍຸດທະສາດ ລາວ-ຫວຽດນາມ ຢູ່ແຂວງຫົວພັນ ແລະ ແຂວງຊຽງຂວາງ ຮອດປີ 2020, ຂໍ້ຕົກລົງວ່າດ້ວຍການຮ່ວມມືລະຫວ່າງສູນກາງ ແນວລາວສ້າງຊາດ ແລະ ຄະນະຂົນຂວາຍປະຊາຊົນສູນກາງຫວຽດນາມ.ໃນຕອນບ່າຍຂອງວັນດຽວກັນ ສະຫາຍ ຫງວຽນຟູຈ້ອງ ພ້ອມຄະນະ ຍັງໄດ້ພົບປະຢ້ຽມຢາມ ສະຫາຍ ທອງລຸນ ສີສຸລິດ ກຳມະການກົມການເມືອງສູນກາງພັກ ນາຍຍົກ ລັດຖະມົນຕີ ແຫ່ງ ສປປ ລາວ ພົບປະຢ້ຽມຢາມ ສະຫາຍ ນາງ ປານີ ຢ່າທໍ່ຕູ້ ກຳມະການກົມການເມືອງສູນກາງພັກ ປະທານສະພາແຫ່ງຊາດ ແລະ ຕ້ອນຮັບການເຂົ້າຢ້ຽມຂ່ຳນັບຂອງສະຫາຍ ວິໄລວົງ ບຸດດາຄຳ ກຳມະການສູນກາງພັກ ປະທານກຳມາທິການແຜນການ-ການເງິນ ແລະ ກວດສອບສະພາແຫ່ງຊາດ ທັງເປັນປະທານ ສະມາຄົມມິດຕະພາບ ລາວ-ຫວຽດນາມ ຂັ້ນສູນກາງອີກດ້ວຍ.

Off

Comments are closed.