22nd Mar2017

ແຈ້ງການ

by somchan

ເລື່ອງ:   ​ເຕືອນ​ສະຕິ​ກ່ຽວ​ກັບ ຄວາມ​ສ່ຽງ​ຂອງ​ການ​ກໍ່​ອາ​ຊະ​ຍາ​ກຳ​ທາງ​ດ້ານ ບັດ ATM ປອມ, ຖອນ​ເອົາ​ເງີ​ນຢູ່​ຕູ້ ATM ຂອງ​ທະນາຄານ​ຕ່າງໆ ຢູ່ ສປປ ລາວ.

​ໃນ​ປະຈຸ​ບັນ​ນີ້ ​ໃນ​ສະພາບ​ສັງຄົມ ມີ​ການ​ຜັນ​​ແປ​​ໄປ​ຢ່າ​ງສັບສົນ, ການ​ເຄື່ອນ​ໄຫວ​ຂອງ​ບັນດາ​ກຸ່ມກໍ່​ອາຊະຍາ​ກຳ​ປະ​ເທດ​ຕ່າງໆ ​ແມ່ນ​ໄດ້​ໃຊ້​ຫຼາຍ​​ເລ້​ລ່ຽມ ທີ່​ເລິກ​ເຊິ່ງ ​ແລບ​ແນບ​ນຽນ ​ແລະ ວັດຖຸ​ເຕັກນິກ ທີ່​ທັນ​ສະ​ໄໝ​ເຂົ້າ​ໃນ​ການ​ກໍ່ອາ​ຊະ​ຍາ​ກຳ ​ເຊັ່ນ: ການ​ນຳ​ໃຊ້​ບັດ ATM ປອມ, ​ເພື່ອ​ລັກລອບ​ຖອນ​ເອົາ​ເງີ​ນຢູ່ ຕູ້ ATM ຂອງ​ບັນດາທະນາຄານ​ຕ່າງໆ ຢູ່​ນະຄອນຫຼວງ​ວຽງ​ຈັນ ​ແລະ ​ແຂວງ​ຕ່າງໆ​ ຢູ່​ໃນ ສປປ ລາວ, ພວກ​ກຸ່ມ​ຄົນ​ບໍ່​ດີ​ທີ່​ເຄື່ອນ​ໄຫວ​ກໍ່​ອາ​ຊະ​ຍາ​ກຳ​ດັ່ງກ່າວ ​ແມ່ນ​ມີ​ກາ​ນນຳ​ໃຊ້​ເຄື່ອງ ອີ​ເລັກ​ໂທ​ນິກ ​ເພື່ອ​ລັກລອບ​ຖອນ​ເງີ​ນ ຂອງ​ພໍ່​ແມ່​ປະຊາຊົນ ດ້ວຍ​ຫຼາຍ​ຮູບ​ແບບ, ຫຼາຍ​ວິທີ​ການ, ພວກ​ເຂົາ​ໄດ້​ມີ​ການວາງ​ແຜນ, ​ເປັນ​ກຸ່ມ​ແກ້ງ, ມີ​ການຈັດ​ຕັ້ງ​ເປັນ​ເຄືອ​ຄ່າ​ຍທັງ​ຢູ່​ພາຍ​ໃນ ​ແລະ ຕ່າງປະ​ເທດ ​ເຊິ່ງ​ເຮັດ​ໃຫ້​ມີ​ຜົນ​ກະທົບ​ຢ່າງ​ໃຫ່ຍຫຼວງ ຕໍ່​ລະບົບ​ເສດຖະກິດ​ຂອງ​ປະ​ເທດ​ເຮົາ, ​ເຮັດ​ໃຫ້​ຊັບ​ສິນ, ​ເງີ​ນຄຳ​ຂອງ​ປະຊາຊົນ​ຖືກ​ເສຍ​ຫາຍ.

ມາ​ເຖິງ​ປະຈຸ​ບັນ ​ໄດ້​ມີ​ຜູ້​ຖືກ​ເສຍ​ຫາຍ​ເປັນ​ຈຳນວນ​ຫຼາຍ, ​ເຊິ່ງ​ເປົ້າ​ໝາຍ​ກໍ່​ອາ​ຊະ​ຍາ​ກຳ ສ່ວນ​ຫຼາຍ​ເປັນ​ຄົນ​ຕ່າງປະ​ເທດ, ​ເຈົ້າ​ໜ້າ​ທີ່​ຕຳຫຼວດ ຈຶ່ງ​ເຕືອນ​ສະຕິ ​ໃຫ້​ແກ່​ພໍ່​ແມ່​ປະຊາຊົນ, ພະນັກງານ, ທະຫານ ຕຳຫຼວດ, ພໍ່ຄ້າ​ຊາວ​ຂາຍ,​ແລະ ບັນດາ​ທະນາຄານ​ທຸລະ​ກິດ ​ເອົາ​ໃຈ​ໃສ່​ຄຸ້ມ​ຄອງ ຕີ​ດຕາມ​ກວດກາ ການ​ນຳ​ໃຊ້​ບັດ ATM ​ເພື່ອ​ເປັນ​ຫູ, ​ເປັນຕາ ຊ່ວຍ​ເຈົ້າ​ໜ້າ​ທີ່ ​ໃຜ​ຮູ້​ເຫັນ ມີ​ຂໍ້​ມູນ​ຫຼັກ​ຖານ​ອັນ​ໃດ ກ່ຽວ​ກັບ​ກຸ່ມ​ຄົນ ທີ່​ເຄື່ອນ​ໄຫວ ກໍ່​ອາ​ຊະ​ຍາ​ກຳ ທາງ​ດ້ານ ການ​ນຳ​ໃຊ້ ບັດ ATM ປອມ, ​ໃຫ້​ລາຍ​ງານ​ຕໍ່​ເຈົ້າໜ້າ​ທີ່​ຕຳຫຼວດ​ໂດຍ​ດ່ວນ, ​ເພື່ອ​ຈັບ​ຕົວ​ພວກ​ກ່ຽວ ມາ​ດຳ​ເນີນ​ຄະດີ ຕາມ​ລະບຽບ​ກົດໝາຍ. ດັ່ງ​ນັ້ນ, ກົມ​ຕຳຫຼວດ​ເສດຖະກິດ , ກົມ​ໃຫ່ຍຕຳຫຼວດ ກະຊວງ​ປ້ອງ​ກັນ​ຄວາມ​ສະຫງົບ ຈິ່ງ​ແຈ້ງ​ມາ​ຍັງ​ບັນດາ​ທ່ານ ຈົ່ງ​ຮັບ​ຮູ້ ​ແລະ ພ້ອມ​ກັນ​ມີ​ສະຕິ ລະວັງ​ຕົວ ທັງ​ໝົດ​ນີ້ ກໍ່​ເພື່ອ​ເຮັດ​ໃຫ້​ສັງຄົມ​ຮັບ​ຮູ້, ​ເພື່ອ​ຮັກສາ​ສິດຜົນປະ​ໂຫຍ​ດ ​ແລະ ວັກ​ຖຸຊັບ​ສິນ ຂອງ​ປະຊາຊົນ​ລາວ​ບັນດາ​ເຜົ່າ ບໍ່​ໃຫ້​ຕົກ​ເຮ່ຍ​ເສຍ​ຫາຍ​ ຄື​ກໍລະນີ​ດັ່ງກ່າວ​ນີ້.

Off

Comments are closed.