22nd Nov2019

ໃສ່ເຄື່ອງແບບຕຳຫຼວດຊອກປຸ້ນເອົາລົດ

by somchan

ເຈົ້າໜ້າທີ່ພະແນກຕຳຫຼວດສືບສວນ-ສອບສວນ ປກສ ແຂວງ ຈຳປາສັກ ໃຫ້ຮູ້ວ່າ:ໄດ້ຕິດຕາມຈັບຕົວຄົນຮ້າຍທີ່ນຸ່ງເຄື່ອງແບບຕຳຫຼວດຂັບຂີ່ລົດຈັກຊອກກັກລົດຈັກຂອງປະຊາຊົນ ຕາມທາງເທດສະບານແຂວງໄດ້ 2 ຄົນ; ພ້ອມຂອງກາງເຄື່ອງແບບຕຳຫຼວດ ແລະ ລົດຈັກທີ່ໃຊ້ກໍ່ເຫດ ພາຍຫຼັງຕິດຕາມມາໄດ້ເກືອບເດືອນ ຢູ່ຫ້ອງເຊົ່າແຫ່ງໜຶ່ງ ເຂດບ້ານຈັດສັນ ນະຄອນປາກເຊ ໃນວັນທີ 28 ຕຸລາ 2019 ເຊິ່ງພວກກ່ຽວໄດ້ກໍ່ເຫດມາແລ້ວ 7 ຄັ້ງ, ຜູ້ຖືກຫາຊື່ທ້າວ ນວນ ອາຍຸ 23 ປີ ແລະ ທ້າວ ອາໂຈ ອາຍຸ 20 ປີ ທັງສອງຢູ່ບ້ານ ວັດຫຼວງ ເມືອງໄຊເສດຖາ ແຂວງອັດຕະປື.

ຜ່ານການສືບສວນ-ສອບສວນຂອງເຈົ້າໜ້າທີ່ ພວກກ່ຽວຮັບສາລະພາບວ່າ: ໄດ້ຮ່ວມກັບໝູ່ຊື່ທ້າວ ຫຼ້າ ອາຍຸ 22 ປີ ຢູ່ບ້ານຫຼັັກ 3 ເມືອງສາມັກຄີໄຊ ແຂວງອັດຕະປື ທີ່ເຊົ່າຫ້ອງແຖວຢູ່ເຂດບ້ານຈັດສັນ ນະຄອນປາກເຊ ເຄື່ອນໄຫວປຸ້ນເອົາລົດຈັກມາແລ້ວ 7 ຄັ້ງ ໄດ້ລົດຈັກ 7 ຄັນ, ນັບແຕ່ເດືອນຕຸລາ 2019 ເປັນຕົ້ນມາ.

ສຳລັບເຄື່ອງຂອງກາງທີ່ປຸ້ນມາໄດ້ແຕ່ລະຄັ້ງພວກກ່ຽວໄດ້ນຳໄປຂາຍເອົາເງີນປັນກັນ ແລ້ວໃຊ້ຈ່າຍຫຼີ້ນກິນຟຸມເຟືອຍຈົນໝົດ, ສ່ວນເຄື່ອງຂອງກາງທີ່ເກັບກູ້ຄືນໄດ້ມີໂທລະສັບມືຖື 3 ໜ່ວຍ, ກ້ອງຖ່າຍຮູບ 1 ໜ່ວຍ, ລົດຈັກ 1 ຄັນ ຍີ່ຫໍ້ ຢາມາຮາ ລຸ້ນ R15 ສີຟ້າ ປ້າຍທະບຽນ ຈມ 6549 ຈຳປາສັກ.

Off

Comments are closed.