02nd Jul2014

ໄຂຄວາມຈິງກ່ຽວກັບຂ່າວລືຄົນຕ່າງດ້າວ ລັກເດັກນ້ອຍລາວໄປຂ້າເພື່ອເອົາ ອະໄວຍະວະ

by admin

​ໃນ​ໄລຍະ​ຜ່ານ​ມາ​ເຫັນ​ວ່າ​ສັງຄົມ​ລາວ​ໄດ້​ຮັບ​ຜົນ​ກະທົບ ​ດ້ານ​ລົບ​ຈາກ​ການ​ປ່ອຍ​ຂ່າວ​ລື​ບໍ່​ມີ​ມູນ​ຄວາມ​ຈິງ ຍ້ອນ​ມີ​ກຸ່ມ​ຄົນທີ​ບໍ່​ດີ​ໄດ້​ພາກັນ​ສ້າງ​ຄວາມ​ປັ່ນ​ປ່ວນ​ ຍຸ​ແຍ່​ໃຫ້​ເກີດ​ສະພາບ​ຄວາມ​ບໍ່​ສະຫງົບ ​ແລະ ​ເພື່ອ​ຜົນ​ປະ​ໂຫຍ​ດດ້ານ​ອື່ນໆ ຊຶ່ງ​ເປັນ​ເຫດ​ເຮັດ​ໃຫ້​ສັງຄົມ​ຈຳນວນ​ໜຶ່ງ​ແຕກ​ຕືນຢ້ານ​ກົວ​ດັ່ງ​ນັ້ນ ກະຊວງ​ປ້ອງ​ກັນ​ຄວາມ​ສະຫງົບ​ໄດ້​ກວດກາ​ສືບ​ຫາ​ທີ່​ໄປ​ທີ​ມາ ​ແລະ ກວດ​ຫາ​ຄວາມ​ຈິງ​ຢູ່​ບັນດາ​ແຂວງ​ຕ່າງໆ​ໃນ​ທົ່ວ​ປະ​ເທດ​ບໍ່​ພົບ​ເຫັນ​ຢູ່​ບ່ອນ​ໃດ​ເລີຍ​ເປັນ​ພຽງ​ແຕ່​ຂ່າວ​ລື​ເທົ່າ​ນັ້ນ

     ດັ່ງນັ້ນ, ຫ້ອງ​ວ່າການ​ກະຊວງ​ປ້ອງ​ກັນ​ຄວາມ​ສະ​ຫງົບ​ຈຶ່ງ​ອອກ​ແຈ້ງ​ການ​ສະບັບ​ເລກທີ 1484/ຫວກ ລົງ​ວັນ​ທີ 26 ມິຖຸນາ 2014 ວ່າ: ຂ່າວ​ລື​ກ່ຽວ​ກັບ​ຄົນ​ຕ່າງ​ດ້າວ​ລັກ​ເດັກນ້ອຍ​ແມ່ນ​ບໍ່​ມີ​ຄວາມ​ຈິງ. ຫ້ອງ​ວ່າການ​ກະຊວງ​ປ້ອງ​ກັນ​ຄວາມ​ສະຫງົບ​ຈິ່ງ​ແຈ້ງ​ມາ​ຍັງ​ສຳນັກງານ-​ອົງການ, ອຳນາດ​ການ​ປົກຄອງ​ທ້ອງ​ຖິ່ນ ພະນັກງານ ທະຫານ ຕຳຫຼວດ ​ແລະ ພໍ່​ແມ່​ປະຊາຊົນ​​ບັນດາ​ເຜົ່າ​ໃນ​ຂອບ​ເຂດ​ທົ່ວ​ປະ​ເທດ​ຊາບ​ວ່າ: ຜ່ານ​ການ​ກວດກາ​ຕົວ​ຈິງ​ຂອງ​ກຳລັງ​ປ້ອງ​ກັນ​ຄວາມ​ສະຫງົບ ​ໂດຍສະ​ເພາະ​ຢູ່​ບັນດາ​ແຂວງ​ທີ່​ພົວພັນ​ກັບ​ຂ່າວ​ລື​ວ່າ​ມີ​ກຸ່ມ​ຄົນ​ບໍ່​ດີ ​ເປັນ​ກຸ່ມ​ຄົນ​ຕ່າງ​ດ້າວ​ລັກ​ຈັບ​ເດັກນ້ອຍ​ເພື່ອ​ຂ້າ​ເອົາ​ອະ​ໄວ​ຍະ​ວະ​ຕ່າງໆ ຊຶ່ງ​ເຮັດ​ໃຫ້​ສັງຄົມ​ຈຳນວນ​ໜຶ່ງ​ແຕກ​ຕືນຢ້ານ​ກົວ ​ແລະ ​ເກີດ​ມີ​ຫາງ​ສຽງວິພາກ​ວິຈານ​ໃນ​ສັງຄົມ​ທົ່ວ​ໄປ​ຢູ່​ຫຼາຍ​ແຂວງ​ເຊັ່ນ: ​ແຂວງ ສາລະ​ວັນ, ຄຳ​ມ່ວນ, ວຽງ​ຈັນ ​ແລະ ນະຄອນຫຼວງ ​ເລື່ອງ​ດັ່ງກ່າວ​ບໍ່​ມີ​ມູນ​ຄວາມ​ຈິງ, ທັງ​ໝົດ​ເປັນ​ກົນອຸບາຍ​ເລ້​ລ່ຽມ​ຂອງ​ພວກ​ສັດຕູ ​ແລະ ກຸ່ມ​ຄົນ​ບໍ່​ດີ ​ເພື່ອ​ສ້າງ​ຄວາມ​ປັ່ນ​ປ່ວນຍຸ​ແຍ່​ໃສ່​ຮ້າຍ​ປ້າຍ​ສີ​ໃຫ້​ສັງຄົມ​ພວກ​ເຮົາ​ບໍ່​ມີ​ຄວາມ​ສະຫງົບ ​ແລະ ​ເພື່ອ​ຜົນ​ປະ​ໂຫຍ​ດດ້ານ​ອື່ນໆ​ທີ່​ພວກ​ມັນ​ຕ້ອງການ.

     ​ເພື່ອ​ຍົກ​ສູງ​ສະຕິ​ລະວັງ​ຕົວ​ຕອບ​ຕ້ານ​ທຸກ​ກົນອຸບາຍ​ຂອງ​ພວກ​ສັດຕູ ​ແລະ ກຸ່ມຄົນ​ບໍ່​ດີ​ ຈຶ່ງ​ສະ​ເໜີ​ວ່າ: ບໍ່​ໃຫ້​ຫຼົງ​ເຊື່ອ​ຕໍ່​ກົນອຸບາຍ​ປັ່ນ​ປ່ວນ​ຂ່າວ​ລື​ທີ່​ບໍ່​ມີ​ມູນ​ຄວາມ​ຈິງ​ດັ່ງກ່າວ, ຖ້າ​ບຸກຄົນ​ໃດ​ພົບ​ເຫັນ, ​ໄດ້​ຍິນ​ຫາງ​ສຽງ​ຂ່າວ​ລື​ຕ່າງໆ​ທີ​ບໍ່​ດີ​ຕໍ່​ສັງຄົມ​ໃຫ້​ລາຍ​ງານ​ຕໍ່​ເຈົ້າໜ້າ​ທີ, ອຳນາດ​ການ​ປົກຄອງ​ບ້ານ ຫຼື ພາກສ່ວນ​ທີ​ກ່ຽວຂ້ອງ ​ເພື່ອ​ສະກັດ​ກັ້ນ ​ແລະ ​ແກ້​ໄຂ​ໃຫ້​ທັນ​ເວລາ ດັ່ງນັ້ນຈຶ່ງ​ແຈ້ງ​ມາ​ເພື່ອ​ຊາບ ​ແລະ ຮັບ​ຮູ້​ໃຫ້​ທົ່ວ​ເຖີ່​ງກັນ.

     ​ແຈ້ງ​ການ​​ໂດຍ​ຫົວໜ້າ​ຫ້ອງ​ວ່າການ​ກະຊວງ​ປ້ອງ​ກັນ​ຄວາມ​ສະຫງົບ​ຄົງ​ຈະ​ເຮັດ​ໃຫ້​ສັງຄົມ​ລາວ​ມີ​ສະຕິ​ຕໍ່​ການ​ບໍລິ​ໂພ​ກຂໍ້​ມູນ​ຂ່າວສານ​ຕ່າງໆ​ຢ່າງຮອບ​ຄອບ​ຕື່ມ​ອີກ​ ໜຶ່ງ​ໃນ​ນັ້ນກໍ​ແມ່ນ​ການ​ຕົບ​ແຕ່ງ​ແປງ​ຮູບ​ໃນ​ໂລກ​ອອນ​ໄລ​ນ໌ທີ່​ຜູ້​ຊົມ​ໃຊ້​ບາງ​ຄົນ​ຍັງ​ຮູ້​ເທົ່າ​ບໍ່​ເຖີ່​ງການ ຈິ່ງ​ນຳ​ໄປ​ສູ່​ການ​ຫຼົງ​ເຊື່ອ​ຂໍ້​ມູນ​ຂ່າວສານ​ທີ່​ບໍ່​ໄດ້​ຮັບ​ການ​ກັ່ນ​ຕອງ​ຖືກ-​ຜິດ-​ດີ-​ຊົ່ວ ​ເຊີ່ງ​ໄລຍະ​ຜ່ານ​ມາ​ກໍ່​ເຄີຍ​ມີ​ບັນຫາ​ຂ່າວ​ລື​ຫຼາຍ​ເລື່ອງ​ໂດຍ​ບໍ່​ມີ​ການ​ຢັ້ງຢືນ​ວ່າ​ມີ​ຄວາມ​ຈິງ​ຫຼື​ບໍ່ ມີ​ແຕ່​ໄດ້​ຍິນ​ຄົນ​ອື່ນ​ເວົ້າ​ເລົ່າ​ຕໍ່​ກັນ​ໄປ​ຈົນ​ກາຍ​ເປັນຄວາມ​ບໍ່​ສະຫງົບ ສຸດ​ທ້າຍ​ເຈົ້າໜ້າ​ທີ​ລົງ​ໄປ​ຕິດຕາມ​ກວດກາ ສືບສວນ-​ສອບ​ສວນ​ຕົວ​ຈິງ ຊ້ຳພັດ​ເປັນ​ພຽງ​ແຕ່​ຂ່າວ​ລື​ເທົ່າ​ນັ້ນ.

ແຈ້ງການ

Off

Comments are closed.