09th Oct2019

ໄວໜຸ່ມກໍ່ເຫດອາລະວາດຕີກັນ ຢູ່ເຂດບ້ານ ຊ້າງຄູ້ ເມືອງໄຊທານີ ນະຄອນຫຼວງວຽງຈັນ

by somchan

ຈາກເຫດການໄວໜຸ່ມກໍ່ເຫດອາລະວາດຕີກັນ ຢູ່ເຂດບ້ານ ຊ້າງຄູ້ ເມືອງໄຊທານີ ນະຄອນຫຼວງວຽງຈັນ ຕາມຄິບວີດີໂອທາງສື່ສັງຄົມອອນລາຍໄດ້ໂພດ-ແຊ ລົງເຟດບຸກ ຈົນເກີດຫາງສຽງວິພາກວິຈານຕ່າງໆ-ນາໆ ຈາກສັງຄົມ ຕໍ່ກັບເຫດການດັ່ງກ່າວ ເຈົ້າໜ້າທີ່ ປກສ ເມືອງໄຊທານີ ນະຄອນຫຼວງວຽງຈັນ

ຈຶ່ງໄດ້ກວດກາສັນນະສູດແຫຼ່ງຂ່າວເຫັນວ່າມີມູນຄວາມຈິງແທ້ ເບື້ອງຕົ້ນສາມາດຮູ້ໄດ້ວ່າຜູ້ຖືກທຳຮ້າຍຊື່ ທ້າວ ກົງໃຈ ຫຼື ແດງ ອາຍຸ 19 ປີ ນັກສຶກສາຢູ່ບ້ານ ຕານມີໄຊ ເມືອງໄຊທານີ ນະຄອນຫຼວງວຽງຈັນ.

ຜ່ານການສືບສວນ-ສອບສວນ ທ້າວ ກົງໃຈ ຫຼື ແດງ ໃຫ້ການຕໍ່ເຈົ້າໜ້າທີ່ວ່າ ໃນວັນທີ 30 ສິງຫາ 2019 ຕົນເອງພ້ອມດ້ວຍໜູ່ອີກ 5 ຄົນ ໄດ້ພາກັນໄປສ້າງສັນຢູ່ຮ້ານບັນເທີງແຫ່ງໜຶ່ງ ເຂດບ້ານ ດອນໜູນ ເມືອງໄຊທານີ ນະຄອນຫຼວງວຽງຈັນ ຈາກນັ້ນຈຶ່ງພາກັນກັບບ້ານ ພໍມາຮອດເຂດບ້ານ ຊ້າງຄູ້ ເມືອງໄຊທານີ ນະຄອນຫຼວງວຽງຈັນ ຕົນເອງກັບໝູ່ຈຶ່ງວ່າກັນຈອດລົດໄວ້ແຄມທາງ ເພື່ຶອຊື້ໜີ່ຢູ່ຮ້ານມິນິມາກ ແລະ ໄດ້ມີພວກໄວໜຸ່ມ ທີ່ຈອດລົດໄວ້ໜ້າຮ້ານ ມິນິມາກ ໄລ່ຕາມຫຼັງມາປະມານເກືອບ 20 ຄົນ, ຮ່ວມກັນໃຊ້ກຳລັງໄລ່ທຸບຕີຕົນເອງ ຈົນສະຫຼົບໝົດສະຕິ ສ່ວນກຸ່ມໄວໜຸ່ມທີ່ທຳຮ້າຍຕົນເອງນັ້ນແມ່ນກຸ່ມຂອງ ທ້າວລຳນ້ອຍ ຫຼື ລຳເງີນ ອາຍຸ 23 ປີ ບ້ານທາດຫຼວງ ເມືອງໄຊເຊດຖາ ນະຄອນຫຼວງວຽງຈັນ ມາຮອດວັນທີ 20 ກັນຍາ 2019 ເຈົ້າໜ້າທີ່ຈຶ່ງນຳໂຕຜູ້ກ່ຽວມາສືບສວນ-ສອບສວນ ເບື້ອງຕົນ ທ້າວລຳນ້ອຍ ຫຼື ລຳເງີນ ຮັບສາລະພາບວ່າ ໄດ້ຮ່ວມກັບໝູ່ທຳຮ້າຍ ທ້າວ ກົງໃຈ ຫຼື ແດງ ແທ້ ສາເຫດແມ່ນໄດ້ຍິນໝູ່ເວົ້າວ່າພວກ ທ້າວ ແດງ ມາຫາເລື່ອງພວກຕົນຕອນນັ່ງສ້າງສັນຢູ່ຮ້ານບັນເທີງແຫ່ງໜຶ່ງ.

ປະຈຸບັນເຈົ້າໜ້າທີ່ຕຳຫຼວດແມ່ນສືບສວນ-ສອບສວນ ແລະ ຊອກຫາຜູ້ຮ່ວມກະທຳຜິດມາລົງໂທດຕາມລະບຽບກົດໝາຍ.

Comments are closed.