15th Nov2017

ກອງປະຊຸມສະໄໝສາມັນເທື່ອທີ 4 ຂອງສະ ພາແຫ່ງຊາດຊຸດທີ 8 ຮັບຮອງເອົາຮ່າງ ກົດໝາຍວ່າດ້ວຍການດຳເນີນຄະດີອາຍາ

by somchan

ການ​ດຳ​ເນີນ​ກອງ​ປະຊຸມ​ສະ​ໄໝ​ສາມັນ​ເທື່ອ​ທີ່4 ຂອງ​ສະພາ​ແຫ່ງ​ຊາດ​ຊຸດ​ທີ 8 ​ໃນ​ວັນ​ທີ 14 ພະຈິກ ນີ້ ພາຍ​ໃຕ້​ການ​ເປັນ​ປະທານ​ຂອງ ທ່ານ ສົມ​ພັນ ​ແພງ​ຄຳ​ມີ ຮອງ​ປະທານ​ສະພາ​ແຫ່ງ​ຊາດ, ຜູ້​ແທນກອງ​ປະຊຸມ​ໄດ້​ສືບຕໍ່​ປະ​ກອບ​ຄຳ​ເຫັນ​ ​ໃສ່​ຮ່າງ​ກົດໝາຍ​ວ່າ​ດ້ວຍ ການ​ດໍາ​ເນີນ​ຄະດີ​ອາຍາ ຊຶ່ງ​ເປັນ​ຮ່າງ​ກົດໝາຍ​ສະບັບ​ປັບປຸງ​ໃໝ່ ສຳລັບ​ກົດໝາຍ​ວ່າ​ດ້ວຍ​ການ​ດຳ​ເນີນ​ຄະດີ​ອາຍາ​ສະບັບ​ປີ 2012 ປະກອບ​ມີ 15 ພາກ, 31 ໝວດ ​ແລະ 275 ມາດຕາ, ຜ່ານ​ການຈັດ​ຕັ້ງ​ປະຕິບັດ​ເປັນ​ເວລາ 5 ປີ ຜ່ານ​ມາ ​ແລະ ຜ່ານ​ການ​ປັບປຸງ​ໃນ​ເທື່ອ​ນີ້ ​ໂຄງ​ສ້າງ​ຂອງ​ກົດໝາຍ​ສະບັບ​ປັບປຸງ​ໃໝ່​ຈຳນວນ​ພາກ, ໝວດ, ມາດຕາ ​ແລະ ​ເລກ​ລຳດັບ​ຂອງ​ບັນດາ​ມາດຕາ ​ແມ່ນ​ຍັງ​ຮັກສາ​ໄວ້​ຄື​ເກົ່າ, ສ່ວນ​ເນື້ອ​ໃນ​ຕົ້ນ​ຕໍ​ຂອງ​ການ​ປັບປຸງ​ແມ່ນ​ກ່ຽວ​ກັບ​ພາກ​ການ​ດຳ​ເນີນ​ການ​ສືບສວນ-​ສອບ​ສວນ, ວິທີ​ການ​ສືບສວນ-​ສອບ​ສວນ ​ແລະ ມາດ​ຕະການ​ສະກັດ​ກັ້ນ, ການ​ດຳ​ເນີນ​ຄະດີ​ຢູ່​ສານ​ຂັ້ນ​ຕົ້ນ, ຂັ້ນ​ອຸທອນ ​ແລະ ຂັ້ນ​ລົບ​ລ້າງ ​ແລະ ອື່ນໆ. ​ເຫດຜົນ ​ແລະ ຄວາມ​ຈຳ​ເປັນ​ໃນ​ການ​ປັບປຸງ​ຮ່າງ​ກົດໝາຍ​ສະບັບ​ນີ້ ກໍ່​ເພື່ອ​ໃຫ້​ສອດຄ່ອງ​ກັບ​ລັດຖະທຳ​ມະນູນ​ສະບັບ​ປີ 2015, ກົດໝາຍ​ວ່າ​ດ້ວຍ​ສະພາ​ປະຊາຊົນ​ຂັ້ນ​ແຂວງ, ກົດໝາຍ​ວ່າ​ດ້ວຍ​ການ​ປົກຄອງ​ທ້ອງ​ຖີ່​ນ ​ແລະ ກົດໝາຍ​ວ່າ​ດ້ວຍ​ການ​ດຳ​ເນີນ​ຄະດີ​ແພ່ງ ​ໄປ​ພ້ອມ​ກັບ​ການ​ສ້າງ​ກົນ​ໄກ, ຂັ້ນ​ຕອນ, ວິທີ​ການ ​ແລະ ມາດ​ຕະການ​ປະຕິບັດ​ໜ້າ​ທີ່​ວຽກ​ງານ​ຂອງ​ອົງການ​ດຳ​ເນີນ​ຄະດີ​ອາຍາ ​ແລະ ອົງການ​ກ່ຽວຂ້ອງ​ໃຫ້​ມີ​ປະສິດທິພາບ​ກວ່າ​ເກົ່າ ຕອບ​ສະໜອງ​ກັບ​ຄວາມ​ຮຽກຮ້ອງ​ຕ້ອງການ​ຂອງ​ການ​ພັດທະນາ​ເສກ​ຖະກິດ-​ສັງຄົມ ​ໃນ​ໄລຍະ​ໃໝ່ ​ແລະ ​ເພື່ອ​ໃຫ້​ສອດຄ່ອງ​ກັບ​ລະບົບ​ການ​ດຳ​ເນີນ​ຄະດີ​ອາຍາ​ຂອງ​ພາກ​ພື້ນ ​ແລະ ສາກົນ.

ສຳລັບ​ການ​ປະກອບ​​ຄຳ​ເຫັນ ຂອງ​ສະມາຊິກ​ສະພາ​ແຫ່ງ​ຊາດ ​ເຂົ້າ​ໃສ່​ຮ່າງ​ກົດໝາຍ​ສະບັບ​ນີ້ ​ແມ່ນ​ມີ​ບັນຍາກາດ​ຫຼາຍ​ເນື້ອ​ໃນ​ສຳຄັນ ​ເພື່ອ​ໃຫ້​ມີ​ເນື້ອ​ຮັດກຸມ ​ແລະ ຄົບ​ຖ້ວນ​ສົມບູນ​ຂື້ນ​ກວ່າ​ເກົ່າ.

ພັທ ​ແອ່ນ ອຸ່ນ​ອາ​ນົງນຸດ ສະມາຊິກ​ສະພາ​ແຫ່ງ​ຊາດ ຈາກ​ເຂດ​ເລືອກ​ຕັ້ງ​ທີ່ 8 ​ແຂວງ​ຫົວພັນ ປະກອບ​ຄຳ​ເຫັນ​ໃສ່​ມາດຕາ 71, ມາດຕາ 123 ​ແລະ ມາດຕາ 138 ກ່ຽວ​ກັບ​ການ​ດຳ​ເນີນ​ຄະດີ​ທາງ​ອາຍາ ​ເປັນ​ຕົ້ນ​ສິດ​ໜ້າ​ທີ່​ຂອງ​ທະນາຍ​ຄວາມ, ການກວດ​ຄົ້ນ​ເຄຫາ​ສະຖານ ​ແລະ ບັນຫາ​ອື່ນໆ ທີ່​ເຫັນ​ວ່າ​ຍັງ​ບໍ່​ທັນ​ມີ​ເນື້ອ​ໃນ​ຄົບ​ຖ້ວນ ​ແລະ ຈະ​ແຈ້ງ.

ພົຈວ ພູມີ ວັນ​ດີ​ໄຊ ສະມາຊິກ​ສະພາ​ແຫ່ງ​ຊາດ ຈາກ​ເຂດ​ເລືອກ​ຕັ້ງ​ທີ່ 18 ​ແຂວງ​ໄຊ​ສົມບູນ ​ໄດ້​ມີ​ຄຳ​ເຫັນ​ສະ​ເໜີ​ແລກປ່ຽນ​ປະກອບ​ເຂົ້າ​ໃສ່ ມາດຕາ 30 ວ່າ​ດ້ວຍ​ການ​ເກັບ​ໂຮມ ​ແລະ ການ​ເກັບ​ຮັກສາ​ຫຼັກ​ຖານ​ທາງ​ດ້ານ​ວັດຖຸ ຫຼື ຂອງ​ກາງ​ຄະດີ​ ມາດຕາ 47.

ພາຍຫຼັງ​ສະມາຊິກ​ສະພາ​ແຫ່ງ​ຊາດປະກອບ​ຄຳ​ເຫັນ​ສຳ​ເລັດ, ຄະນະ​ຮັບຜິດຊອບ​ສ້າງ​ຮ່າງ​ກົດໝາຍ​ສະບັບ​ນີ້ ​ໄດ້​ຊີ້​ແຈ້ງ ​ແລະ ອະທິບາຍ​ຕໍ່​ຄຳ​ຊັກ​ຖາມ ​ແລະ ການ​ປະກອບ​ຄຳ​ເຫັນ​ຂອງ​ສະມາຊິກ​ສະພາ​ແຫ່ງ​ຊາດ. ຈາ​ກນັ້ນ ທ່ານ ສົມ​ພັນ ​ແພງ​ຄຳ​ມີ ຮອງ​ປະທານ​ສະພາ​ແຫ່ງ​ຊາດ​ໄດ້​ມີ​ຄຳ​ເຫັນສະຫຼຸບ​ສັງ​ລວມ ການ​ປະກອບ​ຄຳ​ເຫັນ ຂອງ​ສະມາຊິກ​ສະພາ​ແຫ່ງ​ຊາດ ​ແລະ ສະ​ເໜີ​ໃຫ້​ສະມາຊິກ​ສະພາ​ແຫ່ງ​ຊາດ ​ລົງ​ຄະ​ແນນສຽງ​ຮັບຮອງ​ເອົາ​ຮ່າງ​ກົດໝາຍ​ວ່າ​ດ້ວຍ​ການ​ດຳ​ເນີນ​ຄະດີ​ອາຍາ ສະບັບ​ປັງ​ປຸງ​ດ້ວຍ​ຄະ​ແນນ​ສຽງ​ເຫັນ​ດີ​ເປັນ​ສ່ວນ​ຫຼາຍ.

Off

Comments are closed.