21st Jan2016

10 ປີຂ້າງໜ້າວາງ 7 ຍຸດທະສາດ ເພື່ອພັດທະນາເສດຖະກິດສັງຄົມ

by somchan

ສະຫາຍ ທອງສິງ ທຳມະວົງ ກຳມະການກົມການເມືອງສູນກາງພັກ ໄດ້ສະເໜີຍຸດທະສາດ ໃນວາລະດຳເນີນ ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ 10 ຂອງພັກປະຊາຊົນ ປະຕິວັດລາວ ໃນວັນທີ 18 ມັງກອນ 2016 ໂດຍຍົກໃຫ້ເຫັນທິດທາງ ແລະ ຄາດໝາຍສູ້ຊົນ ໃນໄລຍະ 10 ປີຂ້າງໜ້າ ແມ່ນຈະສຸມໃສ່ປະຕິບັດ 7 ຍຸດທະສາດລະດັບຊາດ ເພື່ອການພັດທະນາເສດຖະກິດ-ສັງຄົມ ຄື: ການພັດທະນາເສດຖະກິດຕໍ່ເນື່ອງຕາມທິດຄຸນນະພາບ, ສີຂຽວ ແລະ ຍືນຍົງ; ພັດທະນາປະເທດຊາດໃຫ້ຫຼຸດພົ້ນອອກຈາກສະຖານະພາບດ້ອຍພັດທະນາ ແລະ ປະຕິບັດເປົ້າໝາຍການພັດທະນາແບບຍືນຍົງ; ການພັດທະນາຊັບພະຍາກອນມະນຸດ, ການປົກປັກຮັກສາ ແລະ ນຳໃຊ້ຊັບພະຍາກອນທຳມະຊາດຢ່າງມີປະສິດທິຜົນ ຕາມທິດສີຂຽວ ແລະ ຍືນຍົງ; ເພີ່ມທະວີຄວາມສັກສິດຂອງລະບົບປົກຄອງດ້ວຍກົດໝາຍຂອງລັດປະຊາທິປະໄຕ ປະຊາຊົນ; ເລັ່ງເຊື່ອມໂຍງ ແລະ ເຊື່ອມຈອດ ກັບພາກພື້ນ-ສາກົນ ແລະ ຍຸດທະສາດຫັນເປັນອຸດສາຫະກຳທັນສະໄໝໃຫ້ມີຜົນສຳເລັດສູງ.

ບັນບັນດາຍຸດທະສາດດັ່ງກ່າວຈະປະກອບສ່ວນສຳຄັນໃຫ້ເສດຖະກິດຂະຫຍາຍຕົວຕໍ່ເນື່ອງ ແລະ ໝັ້ນທ່ຽງດ້ວຍຈັງຫວະສະເລ່ຍ 7,5% ຕໍ່ປີ, ເສດຖະກິດມະຫາພາກມີສະຖຽນລະພາບ, ຄວາມທຸກຍາກສືບຕໍ່ຫຼຸດລົງ, ຊີວິດການເປັນຢູ່ຂອງປະຊາຊົນໄດ້ຮັບການຍົກລະດັບດີຂຶ້ນ, ທັງຮັບປະກັນການຜະລິດສະບຽງອາຫານໃຫ້ພຽງພໍກັບຄວາມຕ້ອງການພາຍໃນ ແລະ ມີສິນຄ້າສົ່ງອອກຈຳນວນໜຶ່ງ, ມີການຈັດສັນເຂດພັດທະນາ ແລະ ຈັດວາງກຳລັງການຜະລິດຕາມເຂດແຄຂ້ນຢ່າງເປັນລະບົບ. ສ່ວນເປົ້າໝາຍຕໍ່ໄປແມ່ນສຸມໃສ່ປະຕິບັດໃຫ້ຫຼຸດພົ້ນອອກຈາກສະຖານະພາບດ້ອຍພັດທະນາໃຫ້ສຳເລັດໃຫ້ປີ 2020 ແລະ ເປົ້າໝາຍການພັດທະນາແບບຍືນຍົງ. ເລັ່ງໃສ່ພັດທະນາຊັບພະຍາກອນມະນຸດໃຫ້ມີຄຸນສົມບັດສິນທຳປະຕິວັດ, ມີສະຕິປັນຍາ, ມີສຸຂະພາບແຂງແຮງ, ປັບປຸງ ແລະ ປະຕິຮູບລະບົບການສຶກສາ, ຍົກປະສິດທິພາບຂອງແຮງງານ, ສົ່ງເສີມວຽກງານໂພສະນາການ ແລະ ຍົກສູງຄຸນຄ່າທາງດ້ານວັດທະນະທຳອັນດີງາມຂອງຊາດ. ພ້ອມນັ້ນກໍ່ຕ້ອງເອົາໃຈໃສ່ປົກປັກຮັກສາ ແລະ ນຳໃຊ້ຊັບພະຍາກອນທຳມະຊາດແບບຍືນຍົງ ກໍມີຄວາມສຳຄັນຍິ່ງ ເປັນຕົ້ນ: ທີ່ດິນ, ປ່າໄມ້, ແຮ່ທາດ, ແຫຼ່ງນ້ຳ, ອາກາດ ແລະ ອື່ນໆ ໃຫ້ເກີດປະໂຫຍດສູງສຸດ ມີທິດຍືນຍົງຕາມທິດສີຂຽວ ແລະ ຮັບປະກັນການປັບຕົວເຂົ້າກັບສະພາບການຂອງດິນຟ້າອາກາດ.

ສະຫາຍ ທອງສິງ ທຳມະວົງ ກ່າວຕື່ມວ່າ: ຕ້ອງເພີ່ມຄວາມສັກສິດຂອງລະບົບການປົກຄອງດ້ວຍກົດໝາຍ ແລະ ສ້າງລະບົບກົງຈັກການປົກຄອງ ໃນການບໍລິຫານລັດໃຫ້ເຂັ້ມແຂງມີປະສິດທິຜົນສູງຂຶ້ນ, ປັບປຸງບັນດາອົງການຈັດຕັ້ງຂອງລັດໃຫ້ກະທັດຮັດ, ບັນດານິຕິກຳ, ນະໂຍບາຍ ແລະ ລະບຽບການຕ່າງໆໃຫ້ຄົບຖ້ວນ ຈະແຈ້ງ; ເພີ່ມທະວີການມີເພື່ອນມິດ, ຮັດແໜ້ນຄວາມສາມັກຄີ ແລະ ຂະຫຍາຍການພົວພັນຮ່ວມມືພາກພື້ນ ສາກົນໃຫ້ກວ້າງຂວາງ ໂດຍເພີ່ມຂີດຄວາມສາມາດໃນການແຂ່ງຂັນ ແລະ ເຂົ້າຮ່ວມໃນເຂືອຄ່າຍການຜະລິດໃນຂົງເຂດດັ່ງກ່າວ. ຍົກປະສິດທິພາບ ແລະ ປະສິດທິຜົນຂອງການຜະລິດໃນໂຄງປະກອບເສດຖະກິດແຫ່ງຊາດ, ມີການນຳໃຊ້ ແລະ ພັດທະນາເຕັກໂນໂລຊີທີ່ທັນສະໄໝ, ສະອາດເປັນມິດກັບສິ່ງແວດລ້ອມ, ສຸມໃສ່ຂະແໜງອຸດສາຫະກຳເສົາຄ້ຳເຊັ່ນ: ອຸດສາຫະກຳໄຟຟ້າ, ອຸດສາຫະກຳປຸງແຕ່ງ, ອຸດສາຫະກຳທ່ອງທ່ຽວ ພ້ອມກັນນັ້ນ ກໍເອົາໃຈໃສ່ຂະແໜງການປິ່ນອ້ອມເຊັ່ນ: ກະສິກຳ ແລະ ປ່າໄມ້, ທະນາຄານ, ໂທລະຄົມມະນະຄົມ, ການບໍລິການຜ່ານ ແລະ ອື່ນໆ.

Off

Comments are closed.